1 Ex aj satchaan̈, alec vach' lolonel d'a Jehová. Alec vach' lolonel d'ay to syal yuj smasanil, te b'inajnac.

2 Alec vach' lolonel d'a Jehová icha d'a smojal. Aq'uequem e b'a d'ay d'a stemplo te vach' yilji.

3 A Jehová Dios te nivan yelc'ochi, tz'ab'chaj sjaj d'a yib'an̈ a' mar. A tz'ac'an c'an̈ c'u, a tz'ac'an mandar d'a yib'an̈ a' oval mar chi'.

4 A sjaj Jehová tz'ab'chaji, man̈ jantacoc spoder. Yuj sjaj chi' scheclaji to te nivan yelc'ochi.

5 Yuj yav Jehová sjecchajcanb'at te' c'ute'. Yuj Jehová spojcan juntzan̈ te' nivac c'ute' d'a Líbano.

6 A juntzan̈ lum nivac vitz yic Líbano yed' lum yic Sirión, tz'ib'xi lum yuj Jehová. Sq'ue b'achnaj lum vitz chi', icha sq'ue chennaj junoc noc' quelem vacax.

7 A yav Jehová, a tz'ac'ancot copnaj leb'lon.

8 A yav Jehová tz'ac'an ib'xoc lum tz'inan luum. A' tz'ac'an ib'xoc lum tz'inan luum yic Cades.

9 A yuj yav Jehová tz'el jequeljoc sc'ab'tac te' ji, axon̈ej yib' te' scan d'a sat lum vitz. Axo d'a stemplo tz'alchaj vach' lolonel d'ay yuj eb' anima smasanil.

10 A Jehová ac'annac yajalil d'a jun a' oval a' mucvajum. Yajal yaj d'a masanil tiempo.

11 A tz'ac'an yip eb' schon̈ab'. Yuj svach'il sc'ool Jehová, syac' junc'olal d'ayon̈ a on̈ schon̈ab' on̈ tic.