EZEQUIEL.
15.
Ix yalanxi Jehová d'ayin icha tic: 
Ach anima, ¿tom ec'b'al yelc'och ste'al te' uva d'a yichan̈ junoc te te'? 
A ste'al te' uva chi' malaj yopisio te', max yal-laj yoch te' locteal, max yalpaxlaj sb'o junoc tas d'a te'. 
Tato tz'och te' c'atzitzal, stz'ab'at te', a stzac'aq'uil te' chi', malaj tz'ochi. 
Ayic manto tz'a te' chi', malaj tz'och te', ¿tom ato val yic stz'ab'at te', ichato chi' tz'och yopisio te'? 
Yuj chi' a in Jehová in tic svala': Icha yaj te' uva tz'ic'jielta d'a scal te te' yic sn̈usjitz'a te', icha chi' ol aj vac'anoch syaelal eb' cajan d'a Jerusalén chi'. 
A in val ay in och ajc'olal d'a eb'. Vach'chom ol el lemnaj eb' d'a jun yaelal chi', palta a yaelal chi' ol satanel eb'. Ayic ol in och ajc'olal d'a eb', ol nachajel eyuuj to a in ton Jehová e Diosal in. 
A in val Jehová Yajal in svala' to ol vac'can tz'inan jun chon̈ab' chi', yujto maj in sc'anab'ajej eb', xchi Jehová.