6
1 Amo̱se̱‑ɔ, ane̱ ne̱ ane̱ i suŋ ane̱ e̱ sa Wuribware̱‑ɔ, ane̱ e̱ ko̱re̱ mo̱ne̱ ne̱e̱ fe̱yɛ atɔ dabe̱ ne̱ ɔɔ waa sa mo̱ne̱‑ɔ ma twe̱e̱ kwaa. 2 Mo̱nꞌ nu ke̱tɔ ne̱ Wuribware̱ a tɔwe̱ mò̱ abware̱se̱ŋ wo̱re̱‑ɔ‑rɔ‑ɔ fe̱yɛ,
“Amo̱ a fo̱ saŋ fe̱yɛ ŋ ŋu mo̱ne̱ e̱wɛɛ‑ɔ,
mo̱ a nu mo̱ne̱ kanɔ.
Kake nsiŋ ne̱ mo̱ a waa mfɛɛre̱ fe̱yɛ m mo̱rɔwe̱ mo̱ne̱‑ɔ,
ne̱ mo̱ a kya mo̱ne̱‑rɔ.”* Isaya 49.8.
Mo̱ e̱ tɔwe̱ mo̱ i gywii mo̱ne̱ fe̱yɛ ndɔɔ a kake mɔ e̱ gye̱ saŋ ne̱ Wuribware̱ i ŋu mo̱ne̱ e̱wɛɛ, na ɔ mo̱rɔwe̱ mo̱ne̱‑ɔ.
Awo̱re̱fɔɔ ne̱ Pɔɔl na mò̱ bɛɛko̱‑ana Yeesuu a ayaa‑rɔ aye̱re̱po̱‑ɔ a gyi‑o
3 M be̱e̱ mo̱ i lee bamo̱ ne̱ ba po̱rɔ ane̱ ke̱bɔye̱ ko̱ se̱‑ɔ kanɔ fe̱yɛ bo̱ nu ane̱ŋ ne̱ ane̱ i suŋ abware̱se̱ŋ ko̱tɔwe̱ kusuŋ‑o. Ane̱ mo̱ŋ waa ko̱tɔko̱ ne̱ kaa sa ne̱ ase̱sɛ a lwee e̱bɔye̱‑rɔ‑ɔ, a le̱e̱ fe̱yɛ ane̱ maa kpa fe̱yɛ ɔko̱ ŋu kusuŋ‑o‑ro ke̱bɔye̱ ko̱.
4 Ane̱ a kaapo̱ fe̱yɛ ane̱ gye̱ Wuribware̱ ayaafɔre̱, bo̱ le̱e̱ fe̱yɛ kanyite‑ro ne̱ ane̱ a gyi awo̱re̱fɔɔ ŋu ase̱ŋ na tɔɔraa ke̱tɔ ke̱maa ne̱ kaa waa ane̱‑ɔ‑rɔ.
5 Baa da ane̱, ne̱ baa tii ane̱,
ne̱ ase̱sɛ akwii akwii a wo̱re̱ ane̱.
Saŋ ko̱ ane̱ a suŋ kpo̱ne̱ bwe̱e̱tɔ,
ne̱ ane̱ mo̱ŋ nya saŋ di idi,
ne̱ ane̱ a nare̱ ako̱ŋ.
6 Awo̱re̱fɔɔ de̱maŋte̱ mɔ ne̱ ane̱ a gyi‑o gbaa ooo,
ane̱ a ba itimaa na kanyiase̱ŋ na kanyite
na ke̱dame̱naŋsɛ bo̱ ka ane̱ ado̱ŋ ko̱kɔ.
Ase̱sɛ a ŋu Wuribware̱ a kufwiiŋe timaa‑o
a suŋ kusuŋ ane̱ kakye̱na‑rɔ, ne̱ baa ŋu fe̱yɛ
ke̱kpa ne̱ ane̱ e̱ kpa bo̱ko̱ ase̱ŋ‑ɔ gye̱ kase̱ŋtiŋ.
7 Baa nu ane̱ a gyi kase̱ŋtiŋ,
ne̱ baa ŋu Wuribware̱ ke̱yaale̱ŋ ne̱ o de‑o.
Kase̱ŋtiŋ kigyi ne̱ ane̱ a bo̱ waa ane̱ ado̱ŋtɔ
ne̱ ane̱ de ane̱ e̱ kɔ bamo̱ ne̱ ba kɔ ane̱‑ɔ,
ne̱ ane̱ de ane̱ e̱ kɔ ane̱ e̱ kɔɔre̱ ane̱ e̱ye̱e̱.
8 Bo̱ko̱ i bu ane̱, bo̱ko̱ mɔ maa bu ane̱ pɛɛɛ‑ɔ.
Bo̱ko̱ e̱ kyo̱rɔ ane̱, bo̱ko̱ mɔ e̱ po̱rɔ ane̱
fe̱yɛ ane̱ e̱ waa e̱bɔye̱.
Ane̱ i gyi kase̱ŋtiŋ, amaa bo̱ko̱ e̱ po̱rɔ ane̱
fe̱yɛ ane̱ gye̱ ape̱nnapo̱ ne̱e̱.
9 Bo̱ mo̱ŋ de ane̱ ba te̱e̱ sɛye̱,
amaa ane̱ ke̱nyare̱ a yɔ to̱ŋ ke̱maa.
Ba fa fe̱yɛ ane̱ e̱ kpa a ane̱ wu ne̱e̱,
amaa ane̱ saŋ ane̱ te.
Ba gyiiri ane̱ ke̱se̱bɔ,
amaa bo̱ mo̱ŋ taare̱ mɔɔ ane̱.
10 Ba ŋu fe̱yɛ ane̱ i gyi awo̱re̱fɔɔ bwe̱e̱tɔ,
amaa ane̱ akatɔ a gyi saŋ ke̱maa.
Bo̱ ke̱e̱ kitiri ne̱ ane̱ i wu‑o,
amaa ane̱ e̱ sa ne̱ bo̱ko̱ e̱ nya ŋyure.
Ba fa fe̱yɛ ane̱ mo̱ŋ de sɛye̱,
amaa ane̱ de ke̱tɔ ke̱maa.
11 Korintoo awuye, ane̱ i gyi mo̱ne̱ kase̱ŋtiŋ fe̱yɛ ane̱ mo̱ŋ taa sɛye̱ bo̱ kwe̱e̱rɔ mo̱ne̱ se̱. 12 N gye̱ ane̱ e̱ gye̱ ne̱ ane̱ mo̱ŋ buŋŋi ane̱ ŋkpo̱nɔ‑rɔ kpa mo̱ne̱, amaa mo̱ne̱ e̱ gye̱ ne̱ mo̱ne̱ mo̱ŋ buŋŋi mo̱ne̱ lee‑ro kpa ane̱. 13 Mo̱ e̱ sa se̱ŋsa mo̱ i gywii mo̱ne̱ ne̱e̱ fe̱yɛ mo̱ne̱ a gye̱ mo̱ gyi‑ana‑ɔ. Ane̱ a tɛɛ buŋŋi ane̱ ŋkpo̱nɔ‑rɔ kpa mo̱ne̱‑ɔ, mo̱ne̱ mɔ, mo̱nꞌ buŋŋi mo̱ne̱ ŋkpo̱nɔ‑rɔ kpa ane̱.
Mo̱ne̱ ma kaŋ sa a mo̱ne̱ aa bamo̱ ne̱ bo̱ mo̱ŋ de ko̱kɔɔre̱gyi‑o waa ko̱ŋko̱
14 Mo̱ne̱ ma kaŋ sa a mo̱ne̱ aa bamo̱ ne̱ bo̱ mo̱ŋ kɔɔre̱ Kristoo gyi‑o waa ko̱ŋko̱. A le̱e̱ fe̱yɛ ke̱dame̱naŋsɛ na daa bɔye̱ kpaa ntɔse̱ŋ? Ke̱laŋŋe̱rɔ na kibugyii e̱ taare̱ a a kye̱na saŋ ko̱ŋko̱ aaa? 15 Kristoo na Ɔbɔnsam e̱ taare̱ a bo̱ waa kanɔ aaa? Ɔkɔɔre̱gyipo̱ na ɔko̱ ne̱ ɔ mo̱ŋ kɔɔre̱ gyi‑o kpaa ntɔse̱ŋ? 16 Wuribware̱ aye̱ na ikisi aye̱ e̱ taare̱ a a tii abɛɛ se̱ waa ko̱ko̱ŋko̱ aaa? Daabii pɛɛɛ! Ane̱ Kristoo awuye ŋkpo̱nɔ‑rɔ ne̱ Wuribware̱ ne̱ mò̱ wo̱re̱ dooo i de ŋkpa‑ɔ a tɔwe̱ fe̱yɛ ɔ kye̱na. Fe̱yɛ ane̱ŋ ne̱ Wuribware̱ a tɔwe̱ mò̱ abware̱se̱ŋ wo̱re̱‑ɔ‑rɔ‑ɔ,
“Mo̱ e̱ kye̱na bamo̱‑rɔ, na mo̱ aa bamo̱ nare̱ saŋ ke̱maa mɔ.
Mo̱ i kii bamo̱ nyaŋpe̱, na bamo̱ mɔ bo̱ kii mo̱ ase̱sɛ.”* Ko̱lɔŋŋɔ mbraa 26.12; Yɛrɛme̱ya 32.38; Isikiyɛl 37.27.
17 Amo̱se̱ se̱‑ɔ, Wuribware̱ a tɔwe̱ mò̱ wo̱re̱‑ɔ ke̱be̱gya ko̱‑rɔ fe̱yɛ,
“Mo̱ ase̱sɛ, mo̱nꞌ dare̱e̱ le̱e̱ bamo̱‑rɔ mfe̱ŋ,
na mo̱nꞌ kye̱na ko̱kwe̱e̱!
Mo̱ne̱ e̱ ma dabo̱rɔ ke̱tɔ ke̱maa ne̱ ki de iyisi‑o,
amo̱ fe̱raa mo̱ e̱ kɔɔre̱ mo̱ne̱.”* Isaya 52.11.
18 Ne̱ baa be̱e̱ kyo̱rɛɛ waa abware̱se̱ŋ wo̱re̱‑ɔ‑rɔ fe̱yɛ,
“Bo̱-e̱le̱ŋ‑ɔ‑kyo̱ŋ‑ɔke̱maa-Bware̱ yɛ, ‘Mo̱ne̱ e̱ te̱e̱ mo̱ fe̱yɛ mo̱ne̱ se̱,
na mo̱‑ɔ mɔ n te̱e̱ mo̱ne̱ fe̱yɛ mo̱ agyi nyaŋsɛ na akye̱e̱sɛ.’ ”* 2 Samuwɛl 7.14.