1 Korintoo awuye.
13.
Hare̱e̱ mo̱ i de ke̱yaale̱ŋ e̱se̱ŋsa ke̱sa‑rɔ ne̱ a gye̱ ase̱sɛ lee, bɛɛɛ Wuribware̱ mbɔɔ ne̱ bo̱ bo̱ so̱so̱‑ɔ lee ne̱e̱ ooo, ne̱ mo̱ e̱ ma kpa mo̱ bɛɛko̱ ase̱ŋ, n du ne̱e̱ fe̱yɛ aŋko̱re̱ kpaŋkpaŋ ne̱ o de e̱lawo̱‑ɔ. 
Mo̱ i de ke̱yaale̱ŋ a m bo̱ tɔwe̱ ke̱tɔ ne̱ Wuribware̱ a lee bo̱ kaapo̱ mo̱‑ɔ, ne̱ mo̱ i nu atɔ ne̱ Wuribware̱ a taa bo̱ kwe̱e̱rɔ bo̱ko̱ se̱‑ɔ kaase̱, ne̱ mo̱ ko̱kɔɔre̱gyi kyɔ, hare̱e̱ gbaa mo̱ e̱ taare̱ a n sa a ke̱be̱e̱ ko̱so̱ le̱e̱ mfe̱ŋ ne̱ ke̱ dɛɛ ke̱ ye̱re̱‑ɔ, ne̱ mo̱ e̱ ma kpa mo̱ bɛɛko̱ ase̱ŋ, amo̱ fe̱raa mo̱ŋ gye̱ sɛye̱. 
Hare̱e̱ gbaa mo̱ ya swii mo̱ ate̱tɔmo̱ŋta pɛɛɛ bo̱ ke atiripo̱, bɛɛɛ mo̱ a sa ne̱ baa kywɛɛ mo̱ de̱e̱kpa‑rɔ mɔɔ, amo̱ fe̱raa mo̱ŋ nya sɛye̱. 
Ɔke̱maa ne̱ ɔ kpa mò̱ bɛɛko̱ ase̱ŋ‑ɔ de kanyite, ne̱ ɔ be̱e̱ o bware. Ɔ maa ka ko̱kwe̱e̱, ne̱ ɔ be̱e̱ ɔ maa kaapo̱ mò̱ e̱ye̱e̱. 
Ɔ mo̱ŋ de akatɔle̱ŋ, ne̱ ɔ be̱e̱ ɔ maa saare̱ bo̱ko̱. Ɔ maa ye̱re̱ bo̱ko̱ fe̱yɛ bo̱ waa ke̱tɔ ne̱ ɔ kpa‑ɔ. Mò̱ duŋ maa fwii, ne̱ ɔ mo̱ŋ de ɔko̱ do̱ŋdaa. 
A mo̱ŋ bo̱ mò̱ kɔne̱ fe̱yɛ se̱sɛ a waa bɔye̱‑ɔ, amaa se̱sɛ ya waa itimaa fe̱raa, a bo̱ mò̱ kɔne̱. 
Ɔke̱maa ne̱ ɔ kpa mò̱ bɛɛko̱ ase̱ŋ‑ɔ i nyite mò̱ ke̱tɔ ke̱maa‑rɔ. Ɔ kɔɔre̱ mò̱ bɛɛko̱ o gyi atɔ ke̱maa‑rɔ. O de mò̱ te̱maa‑rɔ fe̱yɛ mò̱ bɛɛko̱ ma waa ke̱tɔ ne̱ ke̱ mo̱ŋ bo̱ daŋ‑ɔ, ne̱ mò̱ kanyite‑o mo̱ŋ de kɛɛ. 
Ke̱kpa maa lo̱we̱, ke̱kpa mo̱ŋ de kɛɛ. Amaa ke̱yaale̱ŋ ne̱ bo̱ de ba tɔwe̱ ke̱tɔ ne̱ Wuribware̱ a lee bo̱ kaapo̱ bamo̱‑ɔ, na ke̱yaale̱ŋ ne̱ bo̱ de ba sa se̱ŋsa ko̱ ne̱ bamo̱ fɔŋfɔŋ maa nu mò̱‑rɔ‑ɔ e̱ gye̱ kɛɛ. Ane̱ kanyiase̱ŋ pɛɛɛ e̱ kyo̱ŋ. 
Ane̱ maa taare̱ a ane̱ gyii ke̱tɔ ke̱maa mbe̱yɔmɔ. Ane̱ maa taare̱ a ane̱ tɔwe̱ ke̱tɔ ne̱ ke̱ e̱ ba‑ɔ pɛɛɛ. 
Amaa kake nsiŋ ne̱ ane̱ i ŋu mò̱ ne̱ ɔ bo̱ daŋ ɔ kyo̱ŋ ke̱tɔ ke̱maa‑ɔ ke̱ba‑ɔ, kake nsiŋ amo̱ ke̱tɔ ke̱maa ne̱ ke̱ mo̱ŋ bo̱ daŋ kyɛɛkyɛɛ‑ɔ e̱ lo̱we̱. 
Mo̱ a gye̱ keegyi‑o, mo̱ se̱ŋsa na mo̱ mfɛɛre̱ na ane̱ŋ ne̱ mo̱ e̱ fa m bɔ atɔ se̱‑ɔ gye̱ keegyi lee ne̱e̱, amaa mo̱ a bo̱ kii ke̱yaafɔre̱‑ɔ, mo̱ a yɔwe̱ ayaagyise̱ŋ‑ɔ. 
Kaye̱ mɔ‑rɔ atɔ du ne̱e̱ fe̱yɛ mbo̱re̱ŋ‑ɔ. A du ne̱e̱ fe̱yɛ ane̱ a de̱e̱re̱ diki ne̱ ɔ mo̱ŋ ke̱e̱‑rɔ nɛɛnɛɛ‑ɔ. Amaa kake nsiŋ ne̱ Yeesuu e̱ ba‑ɔ, ane̱ i ŋu mò̱ akatɔ‑rɔ. Ke̱tɔ ne̱ ŋ nyi mbe̱yɔmɔ‑ɔ gye̱ kafwe̱e̱ ko̱ ne̱e̱. Amaa kake nsi amo̱‑ɔ mo̱ i gyii ke̱tɔ ke̱maa, fe̱yɛ ane̱ŋ ne̱ Wuribware̱ nyi mo̱ mbe̱yɔmɔ‑ɔ. 
Aketɔ pɛɛɛ e̱ kyo̱ŋ, amɔ aketɔ asa kpeŋ, amo̱ e̱ gye̱ ko̱kɔɔre̱gyi na te̱maa na ke̱kpa. Amaa amo̱ asa‑rɔ, ke̱mo̱ ne̱ ke̱ gye̱ bre̱sɛ‑ɔ e̱ gye̱ ke̱kpa.