1 Iwe, ämi pwii kana, üa mochen pwe oupwe silei met a let usun ekewe lifang seni ewe Ngünmifel. 2 Oua fen silei, pwe lupwen ousamwo souläng, oua tokola lon chomong sokun lapalap, pwe ämi oupwe fel ngeni ekewe uluulun anümwäl resap manau. 3 Iei mine üa mochen ämi oupwe silei, pwe esap wor eman epwe tongeni apasa fän emwenien ewe Ngünün Kot, “Jesus epwe anümamau,” esap pwal wor eman a tongeni pwärätä, “Jesus i Samol”, are ewe Ngünmifel esap emweni.

4 Mi wor sokopaten lifangen ngün, nge eman chök Ngün a fangeto. 5 Mi wor sokopaten angang, nge kich meinisin sia angang ngeni eman chök Samol. 6 Mi wor sokopaten tufich ach sipwe föri angang, nge ewe eman chök Kot a ngeni aramas meinisin ewe tufich fänäsengesin en me an angang. 7 Ewe Ngünmifel a pwäla lon sokopaten lapalap lon manauen eman me eman leich, pwe epwe wor ach feiöch meinisin. 8 Ewe Ngün a lifang ngeni eman aramas an epwe afalafala ewe kapas fän tipachem, pwal ewe chök Ngün a lifang ngeni eman an epwe afalafala ewe kapas fän silelap. 9 Ewe chök Ngün a lifang ngeni eman an epwe wor an lükülük, nge ngeni pwal eman a lifang ewe tufich an epwe apöchöküla aramas. 10 Ewe Ngün a lifang ngeni eman aramas ewe tufich an epwe föri manaman, a pwal lifang ngeni eman ewe tufich an epwe afalafala än Kot kapas, nge pwal ngeni eman an epwe tufichin alefila lefilen ekewe lifang mi pop seni ewe Ngünmifel me ekewe lifang resap pop seni. Ngeni eman aramas a lifang ngeni tufichin an epwe fos lon kapasen ekis, nge ngeni pwal eman a lifang ewe tufichin an epwe awewei met eman a apasa. 11 Nge ewe eman chök Ngün a föri ekei mettoch meinisin, a ngeni eman me eman aramas ekewe sokopaten lifang usun an mochen. ✡ Rom 12.6-8

12 Iwe, usun inisich a chök eu o a wor chomong kifetin, inamwo ika a sokopat ekewe kifet, nge ra nom lon eu chök inis. Ina chök usun Kraist. ✡ Rom 12.4-5 13 Iei usun oukich meinisin, ese lifilifil ika chon Juta ika chon lükün Israel, ika amanau ika aramas mi ngas, kich meinisin sia papatais lon eu chök inis ren eman chök Ngün, kich meinisin sia pwal ün seni eman chök Ngün.

14 Pun inisich esap fis ren eu chök kifet, nge a fis ren chomong kifet. 15 Are pechech epwe apasa, “Pokiten ngang üsap efoch pau, üsap chu ngeni ewe inis,” ei esap tongeni imwüwu seni an epwe eu kifetin inisich. 16 Nge are selingach epwe apasa, “Pokiten ngang üsap eföü mas, üsap chu ngeni ewe inis,” ei esap tongeni imwüwu seni an epwe eu kifetin inisich. 17 Are unusen eu inis epwe chök eföü mas, epwe ifa usun an epwe tongeni rongorong? Nge are epwe chök eu seling, epwe ifa usun an epwe tongeni tini och? 18 Iei usun Kot a anomu ekewe sokopaten kifet won inisich usun met mochenin letipan. 19 Esap wor eu inis are unusan meinisin epwe eu chök kifet! 20 Iei usun a wor chomong kifet, nge eu chök inis.

21 Iei mine mesach esap tongeni apasa ngeni pöüch, “Esap wor lomotom ngeniei.” Pwal mökürach esap tongeni apasa ngeni pechech, “Esap wor lomotom ngeniei.” 22 Nge a fokun lomot ngenikich ekewe kifetin inisich usun nge sia ekieki pwe itä ra apwangapwang. 23 Iwe, ekewe kifet sia ekieki pwe esap wor aüchear, sia fokun achocho ngeni ach sipwe kütta met repwe aüchea ren. Nge ekewe kifet resap nien lapalapöch, sia kütta met sipwe pwölürela ren, pwe esap pwä asäwir. 24 Nge ekewe kifet ra fen lapalapöch, esap lomot ach sipwe pwölürela. Püsin Kot a achufengeni inisich lon eu sokun lapalap pwe a fokun alinga ekewe sokun kifet esap wor linger. 25 Iei mine esap wor kinikinfesen lon ewe inis, nge ekewe sokopaten kifet meinisin repwe chüngüfengeniir lefiler. 26 Are eu kifet a riaföü, ekewe lusun kifet meinisin ra eti le riaföü, nge are eu kifet a iteüöch, ekewe lusun kifet meinisin ra eti lon an pwapwa.

27 Ämi meinisin inisin Kraist, nge eman me eman leimi kifetin. 28 Iwe, Kot a awiser meinisin lon en me lenian lon imwenfel: Akomwan ekewe soukünö, aruan ekewe soufos, nge aülüngatin ekewe sense. Mürin chokewe mi föri manaman, pwal chokewe mi wor ar tufichin apöchöküla aramas, chokewe mi alisi aramas, chokewe ir souemwen, pwal chokewe mi fos lon kapasen ekis. ✡ Ef 4.11 29 Ifa usun, ir meinisin ra soukünö, ika soufos, ika sense? Ifa usun, ir meinisin a wor rer tufichin föri manaman, 30 ika tufichin apöchöküla aramas, ika tufichin fos lon kapasen ekis, ika tufichin awewei ekewe kapasen ekis? 31 Iwe, oupwe achocho le kütta ämi oupwe eäni ekewe lifang mi fokun aüchea. Nge iei üpwe aiti ngenikemi eu sokun manau mi mürina seni meinisin.