1 Iwe, ewe ät Samuel a angang ngeni ewe Samol mi Lapalap fän emwenien Eli. Lon ena fansoun än ewe Samol mi Lapalap kapas esap kon nien chööw, esap pwal wor künaen aramas fän chomong.

2 Lon eu pwin Eli a kon lon lenian, nge mesan a toputopula pwe esap chüen tongeni küna mwan. 3 Nge Samuel a annut lon imwenfelin ewe Samol mi Lapalap, ia än Kot we pworofel a nom ie. Iwe, wünümweerän, lupwen ewe lenien atittin esamwo kunula, 4 ewe Samol mi Lapalap a kökkö, “Samuel, Samuel!” Nge Samuel a üra, “Ngang iei.” 5 A säla ren Eli o apasa, “Ngang iei, en ka kökköriei.” Nge Eli a üreni, “Ngang üsap köruk, kopwe liwinla o konsefälila.” Iei mine Samuel a feila o konola. 6 Iwe, ewe Samol mi Lapalap a kökkösefäl, “Samuel!” Samuel a pwätä, a feila ren Eli o üreni, “Ngang iei, en ka kökköriei.” Nge Eli a üreni, “Üsap kökköruk nei, kopwe liwinla o konsefälila.” 7 Lon ei fansoun Samuel esamwo silei ewe Samol mi Lapalap, pun ewe Samol mi Lapalap esamwo kapas ngeni fän eu. 8 Lupwen ewe Samol mi Lapalap a körisefäli Samuel fän aülüngatin, Samuel a pwätä, a feila ren Eli o üreni, “Ngang iei, en ka kökköriei.” Mürin, Eli a mefi pwe ewe Samol mi Lapalap a köri ewe ät. 9 Iei mine Eli a üreni Samuel, “Kopwe feila o kon. Nge are Kot epwe köruk, kopwe apasa, ‘Kopwe kapas ai Samol mi Lapalap, pun ngang noum chon angang üa aüseling.’ ” Iei mine Samuel a feila o kon lon lenian.

10 Iwe, ewe Samol mi Lapalap a feito, a ütä o kökkö usun me mwan, “Samuel, Samuel!” Samuel a üreni, “Kopwe kapas, ngang noum chon angang üa aüseling.” 11 Mürin, ewe Samol mi Lapalap a üreni Samuel, “Nengeni, ngang üpwe föri och lon Israel, nge iteiten eman me eman mi rongorong usun epwe mäirü ren. 12 Lon ewe rän üpwe apwönüetä ngeni Eli meinisin mine üa kapas usun chon leimwan seni lepoputan tori lesopolan. 13 Pun üa fen üreni pwe iei üpwe apwüngü chon leimwan tori feilfeilachök, pokiten a silei ewe föföringau nöün kewe mwän ra turunufaseei ren, nge esap apwüngüür. 14 Iei mine üa pwon fän akapel ngeni chon leimwen Eli, pwe ar föföringau esap tongeni musala ren sokopaten asor tori feilfeilachök.”

15 Iwe, Samuel a konola tori lesosor. Mürin a pwätä o suki asamalapen imwen ewe Samol mi Lapalap. Nge Samuel a niuokus le apworausa ngeni Eli künan. 16 Mürin, Eli a köri Samuel o üreni, “Samuel, nei ät.” Nge Samuel a apasa, “Ngang iei.” 17 Iwe, Eli a üreni, “Met ewe, Kot a ürenuk? Kosap tukumala och seniei. Kot epwe apwünguk, are kosap üreniei meinisin mine a ürenuk.” 18 Iei mine Samuel a apworausa ngeni meinisin, nge esap tukumala och seni. Nge Eli a apasa, “Nemen chök ewe Samol mi Lapalap. Epwe föri mine a öch me ren.”

19 Iwe, Samuel a mämäritä. Nge ewe Samol mi Lapalap a eti. Esap wor eu an kapas esap pwönüetä. 20 Iei mine chon Israel meinisin seni Tan tori Peersepa ra silei pwe Samuel wesewesen eman nöün ewe Samol mi Lapalap soufos. 21 Iwe, ewe Samol mi Lapalap a pwäsefäl me lon Silo. Ikenan a püsin pwä ngeni Samuel o kapas ngeni. Iwe, chon Israel meinisin ra aüselinga än Samuel kapas.