1 Iwe, ewe Samol mi Lapalap a üreni Samuel, “Ifa ükükün fansoun om kopwe letipeta usun Saul, pun üa aturätiu seni wisan wisen king lon Israel? Kopwe alölöü om rume ngeni lö o feila Petleem ren eman mwän itan Jesi, pun üa filätä fän itei eman me lein nöün kewe mwän pwe epwe king.” 2 Nge Samuel a üreni, “Ifa usun ai üpwe tongeni feila? Are Saul a rong usun, epwe nieila.” Iwe, ewe Samol mi Lapalap a apasa, “Kopwe uwei eman nienifön kow o üreniir pwe ka feito pwe kopwe eäni eu asor ngeni ewe Samol mi Lapalap. 3 Kopwe köri Jesi pwe epwe eti ewe asor, nge ngang üpwe aiti ngonuk mine kopwe föri. Kopwe epiti fän itei ätewe üpwe aiti ngonuk.” 4 Iwe, Samuel a föri usun mine ewe Samol mi Lapalap a allük ngeni o feila Petleem. Nge ekewe souakomwen ewe telinimw ra feito fän chechech pwe repwe churi. Iwe, ra aisini, “Ka feito fän kinamwe?” 5 Nge Samuel a pälüeniir, “Ewer, üa feito fän kinamwe. Üa feito pwe üpwe eäni eu asor ngeni ewe Samol mi Lapalap. Oupwe apinikemi o etiei le asor.” Iwe, Samuel a apini Jesi me nöün kewe mwän o köriir pwe repwe eti ewe asor.

6 Iwe, lupwen ra feito, Samuel a nenengeni Eliap o ekieki, “Ellet, iei i ätewe ewe Samol mi Lapalap a epiti, iei a ütä me fän mesan.” 7 Nge ewe Samol mi Lapalap a üreni Samuel, “Kosap nengeni an lapalapöch ika an mwänetam, pun üa pöütala. Pun ngang üsap nenengeni usun aramas ra nenengeni. Aramas ra nenengeni lapalapen mesen eman, nge ngang üa nenengeni leluken aramas.” 8 Mürin, Jesi a köri Apinatap pwe epwe pwerela mwen Samuel. Nge Samuel a üra, “Ewe Samol mi Lapalap esap pwal filätä ätei.” 9 Mürin, Jesi a emwenato Sama mwen Samuel, nge Samuel a üra, “Ewe Samol mi Lapalap esap pwal filätä ätei.” 10 Iwe, Jesi a emwenato füman nöün kewe mwän mwen Samuel. Nge Samuel a üreni Jesi, “Ewe Samol mi Lapalap esap fokun filätä eman lein ätekei.” 11 Mürin, Samuel a aisini Jesi, “Ifa usun, ikkei ir chök noum kewe mwän meinisin?” Nge Jesi a pälüeni, “Mi chüen wor eman setiputur, nge a tümwünü ekewe sip.” Iwe, Samuel a üreni Jesi, “Kopwe tinala eman pwe epwe emwenato, pun kich sisap mot ngeni mongö tori epwe war.” 12 Iei mine Jesi a tinala eman pwe epwe emwenato. Iwe, Tafit a woparapar, a mesesaramaram o äteöch. Ewe Samol mi Lapalap a üreni Samuel, “Iei i ätewe üa filätä. Kopwe epiti.” 13 Iwe, Samuel a angei ewe rumen lö o epiti Tafit me fän mesen pwin kewe. Iwe, Ngünün ewe Samol mi Lapalap a fokun feitiu won Tafit seni lon ewe rän tori feilfeila. Mürin, Samuel a ütä o liwiniti Rama.

14 Iwe, Ngünün ewe Samol mi Lapalap a feil seni Saul, nge eman ngün mi afeiengau seni ewe Samol mi Lapalap a ariaföüü. 15 Iwe, nöün Saul kewe chon angang ra üreni, “Nengeni, eman ngün mi afeiengau seni Kot a ariaföüuk. 16 Äm samol, kopwe allük ngenikem pwe aipwe kütta eman mwän mi silelap le ettik kitar. Iwe, lupwen ewe ngün mi afeiengau seni Kot epwe feitiu womw, i epwe ettiki ewe kitar pwe kopwe chikarsefäl.” 17 Iei mine Saul a üreni nöün kewe chon angang, “Oupwe kütta fän itei eman mwän mi silelap le ettik kitar o emwenato rei. 18 Iwe, eman lein ekewe chon angang a üra, “Üa küna eman mwän nöün Jesi ewe re Petleem, a silelap le ettik. I eman mwän mi pwora, eman soumaun, a pwal silelap le fos o äteöch, nge ewe Samol mi Lapalap a eti.” 19 Mürin, Saul a tinala chon künö ren Jesi pwe repwe üreni, “Kopwe tinato rei Tafit noum we mwän mi nom ren ekewe sip.” 20 Iei mine Jesi a tinala Tafit ren Saul fiti eman nienifön kuuch, eman aas mi uwou pilawa me eu rumen wain. 21 Iwe, Tafit a feito ren Saul o tolong lon an angang ngeni. Nge Saul a fokun tongei Tafit, iei mine a filätä i pwe epwe uwei an pisekin maun. 22 Mürin, Saul a tinala pworaus ren Jesi o apasa, “Kopwe mwüt ngeni Tafit pwe epwe angang ngeniei, pun üa fokun echeni.” 23 Iwe, iteiten fansoun, lupwen ewe ngün mi afeiengau seni Kot a feitiu won Saul, Tafit a angei ewe kitar o ettiki. Mürin, Saul a kinamwela o chikarsefäl, nge ewe ngün mi afeiengau a sü seni.