1 Amwo ämi oupwe songomang ngeniei, inamwo ika üa aloni alon eman esap mirit. Ouse mochen oupwe föri iei usun. 2 Üa lukomong womi, usun chök Kot a lukomong womi. Ämi oua wewe ngeni eman föpwül mi limelimöch, üa pwon pwe epwe pwülüeni eman chök mwän, iei i Kraist. 3 Nge ngang üa niuokus pwe usun ewe serepenit a atupu Efa ren an tipachemsolä, iei usun ämi ekiek epwe tokola seni ämi enletin echeni Kraist fän allükülük. ✡ Ken 3.1-5,13 4 Pun ämi oua pwapwa ika eman a feito o afalafala ngenikemi usun eman Jesus mi sokola seni ewe eman aia fen afalafal usun, ika oua angei eman ngün mi sokola seni ewe ngün oua fen angei, ika oua pwal angei eu pworausen manau mi fokun sokola seni ewe aia aiti ngenikemi.

5 Üa ekieki pwe üsap fokun kuf ren ätekewe oua aita ngeniir “soukünö mi lap”. 6 Inamwo ika ngang üsap angangöch le kapas, nge a fokun alolol ai silelap. Äm aia afata ei ngenikemi fansoun meinisin pwal lon mettoch meinisin.

7 Üa afalafala ngenikemi ewe Pworausen Manau seni Kot, nge ousap möni ngeniei och. Üa püsin atekisonaeitiu, pwe ämi oupwe tekiatä. Ifa usun, üa tipis ren ei? 8 Lupwen üa angang leimi, ekoch ekewe mwichefel ra tinato alilisi, pwe üpwe tongeni angang ngenikemi. Ren ei usun itä nge üa soläniir. 9 Lon fansoun üa nom remi, üsap aweiresikemi lupwen üa nom lon osupwang. Pun pwiich kewe mi feito seni Masetonia ra uwato meinisin met üa osupwang ren. Usun mine üa föri lon ekewe fansoun me mwan, iei usun üpwe pwal föri lon kan fansoun mwach: Üsap fokun aweiresikemi! ✡ Filip 4.15-18 10 Pokiten än Kraist we let mi nom loi üa pwon pwe ai ei aingaing esap wor eman epwe aükätiu lon unusen ewe fanü Akaia. 11 Ifa usun, üa apasa ei pokiten üsap echenikemi? Kot a silei pwe üa echenikemi!

12 Iwe, ngang üpwe chök sopwela le föri mine üa föri iei, pun üa mochen pinei än ekewe pwal ekoch “soukünö” aingaing pwe ra föri ar angang usun chök äm. 13 Pun ekei mwän ir soukünö mi chofona, chon angang mi atuputup, ra siwili lapalaper usun itä nge ir wesewesen nöün Kraist soukünö. 14 Sisap mairü ren ei sokun föför, pun Satan a püsin siwili lapalapan usun itä nge i eman chon längin saram! 15 Iei mine sisap mairü ren are nöün Satan chon angang ra siwili lapalaper pwe repwe usun itä nge ir chon angangen ewe Kot mi pwüng. Iwe, sopolan manauer repwe chök küna liwinin ar föför.

16 Iwe, üpwe aliwinisefäli mine üa apasa: Esap wor eman epwe ekieki pwe üsap mirit. Nge are oua ekieki pwe üsap mirit, oupwe chök etiwaei usun eman esap mirit, pwe epwe wor popun ai üpwe ekis aingaing. 17 Ewer, met üpwe apasa iei, esap iei met ach Samol a mochen üpwe apasa. Ren ei sokun aingaing üa wesewesen kapas usun eman esap mirit. 18 Nge pokiten a wor chomong mi aingaing won mettochun ei fanüfan, pwal ngang üpwe aingaing. 19 Püsin ämi oua fokun tipachem, iei mine oua songomang ngeni chokewe resap mirit! 20 Ousap song ngeni chokewe mi nöünikemi amanau, ika chokewe mi ariaföüükemi, ika chokewe mi aliapakemi, ika chokewe mi lamalamtekia womi me chokewe mi pösapeikemi. 21 Ngang üa säw ai üpwe pwärätä pwe aia kon apwangapwang le föri ekei sokun föför!

Nge ngang üa aloni alon eman esap mirit. Are eman a pwora an epwe aingaing won och mettoch, ngang üpwe pwal pwora lon ai aingaing. 22 Ra apasa pwe ir re Ipru, pwal ngang. Ra apasa pwe ir chon Israel, pwal ngang. Ra apasa pwe ir mwirimwirin Apraham, pwal ngang. 23 Ra apasa pwe ir nöün Kraist chon angang. Üa aloni alon eman mi umwes, ngang eman nöün Kraist chon angang mi mürina seniir! Üa fokun angang weires lap seniir, üa nom lon imwen fötek lap seniir, üa angei wichiwich lap seniir, üa arap ngeni ar repwe nieila lap seniir. ✡ Föf 16.23 24 Lon limu fansoun ekewe chon Juta ra wichiei fän ilik me tiu. ✡ Tut 25.3 25 Fän ülüngat ekewe chon Rom ra wichiei, fän eu ra mone ngeniei fau. Fän ülüngat üa küna wata me le matau, fän eu üa ämmün le matau lon ükükün rüwe me rüanü awa. ✡ Föf 16.22; 14.19 26 Lon ai saifeil fän chomong üa nom lon feiengauen puun chanpupu, pwal feiengau seni chon achomau, feiengau me ren aramasei ekewe chon Juta me feiengau me ren ekewe chon lükün Israel. A wor afeiengau lon ekewe telinimw, afeiengau lon fanüapö, afeiengau me le matau, pwal afeiengau seni ekewe souläng chofona. ✡ Föf 9.23; 14.15 27 Mi wor ai angang weires, fän chomong üsap möür. Üa echik me kaka, fän chomong esap naf anei, üa föü, esap wor üfei. 28 A pwal wor ekoch me lükün ekei riaföü üsap föüni. Iteiten rän üa nom fän weiresin ai öürek fän iten ekewe mwichefel meinisin. 29 Lupwen eman a apwangapwang, ngang üa pwal mefi apwangapwang. Lupwen eman a tur lon tipis, ngang üa fokun riaföü.

30 Are ngang üpwe fokun aingaing, üpwe aingaing won ekewe mettoch mi pwärätä ai apwangapwang. 31 Ewe Kot, i Semen ach Samol Jesus a silei pwe üsap chofona. Itan epwe feiöch tori feilfeilachök! 32 Lupwen üa nom Tamaskus, ewe kepina mi nom fän ewe king Aretas a anomu chon mas, pwe repwe mamasa asamalapen ewe telinimw pwe repwe turufiei. 33 Nge chiechiei kewe souläng ra aürüeitiu lon eu paskit seni eu asamachon tittin ewe telinimw. Iwe, üa sü seni.