1 Feiengauemi ämi mi nonomöch lon Sion, ämi mi mefi kinamwe lon Samaria, pwal ämi mwän mi iteföüla mi nom lon eu mwü mi iteföüla, ämi chokewe chon Israel ra feito remi pwe repwe kütta alilisir senikemi. 2 Oupwe feila o katol ewe telinimw Kalne. Seni ikenan oupwe feila Hamat ewe telinimw mi watte, mürin oupwe feitiu Kat ewe telinimwen chon Filistia. Ifa usun, ekei mwü ra öch seni mwün Juta me Israel? Ifa usun, fanüer a watte seni fanüemi? 3 Ämi ousap mochen lükü pwe ewe ränin feiengau a arap, nge ren ämi föför oua chök amüttirato ewe rän.

4 Feiengauemi ämi mi kon won peet mi fout ngeni ngiin äläfant o asösö won lenien mot mi pwetete, ämi mi ochei fituken nienifön sip me fituken nienifön kow mi kitinup. 5 Oua köl fän kitar usun Tafit o föri pisekin likettik. 6 Oua ün wain lon sepi o epitikemi lö mi fokun pwokus, nge ousap letipeta pwe Israel a tala. 7 Iei mine ämi oupwe akom lein chokewe repwe oola. Ämi kewe kametip me fansoun pwapwa repwe ükütiu.

8 Iwe, Kot ewe Samol mi Lapalap a eäni akapel püsin itan, Kot ewe Samol mi Unusen Manaman a apasa, “Üa oput än ekewe chon Israel lamalamtekia o anioputa imwer kewe mi watte o ling. Üpwe asechalong ar we telinimw me meinisin mine a nom lon lepöün chon oputeer.”

9 Iwe, are a chüen wor engol aramas lon eu imw, ir meinisin repwe mäla. 10 Mürin, märärin ewe aramas mi mäla, ätewe mi wisen föri angangen peias, epwe uwawu ewe somä seni lon ewe imw. Iwe, epwe kökkölong ren ewe mi chüen manau lon ewe imw, “Ifa usun, mi chüen wor eman a nom reöm?” Nge ätewe epwe pälüeni, “Apwi.” Mürin epwe üralong ren, “Kopwe fanafanala. Pun sisap fokun föüni iten ewe Samol mi Lapalap.”

11 Iwe, lupwen ewe Samol mi Lapalap epwe atowu an allük, ekewe imw watte me ekewe imw kükün repwe tatakisitiu. 12 Ifa usun, oris ra sä won achau? Ifa usun, eman a tuw won achau ren ätemwänin kow? Nge ämi oua sorei pwüngüöch ngeni poison, nge pwüng oua sorei ngeni pwüngingau. 13 Oua aingaing pokiten oua liapeni ewe telinimw Lotepar * wewen Lotepar esor, oua sikesik o apasa, “Aia liapeni Karnaim † wewen Karnaim mächä asisilen pöchökül ren püsin äm pöchökül.” 14 Nge iei alon Kot ewe Samol mi Unusen Manaman, “Üpwe awarato chon eu mwü pwe repwe maun ngenikemi, ämi chon Israel. Repwe ariaföüükemi seni ewe al mi ale ngeni Hamat mi nom efeng tori ewe öüwön Arapa mi nom ör.”