3
1 Iwe, pokiten oua manausefäl fiti Kraist, iei mine oupwe anomu ämi ekiek won ekewe mettoch mi nom läng ia Kraist a mot ie won an lenien mot mi nom lepelifichin Kot. ✡ Kölf 110.1 2 Oupwe tipeni ekewe mettoch mi nom läng, nge sap ekewe mettoch mi nom ikei won fanüfan. 3 Pun oua fen mäla, iwe, manauemi a opola ren Kraist lon Kot. 4 Kraist i wesewesen ämi manau, nge lupwen i epwe pwä, mürin pwal ämi oupwe pwä fiti i lon lingan.
Ewe manauen lom me ewe manau mi fö
3.5-17
5 Iei mine oupwe amäloi ekewe mochenian fanüfan mi nom remi: sokopaten föförün lisowu, lüangau, mocheisou, mocheniangau me tipemong. (Pun tipemong och sokun angang ngeni anümwäl.) 6 Pun pokiten ekei mettoch än Kot song epwe tori chokewe resap aleasochis ngeni. 7 Me lom pwal ämi oua soun manaueni ei sokun manau, lupwen oua nom fän nemenien ekei sokun mochenia.
8 Nge iei oupwe fokun ükütiu le föri ekei sokun föför: song, lingeringer me koput. Esap wor kapasen turunufas ika kapasingau epwe towu seni lon awemi. 9 Ousap kapas chofona lefilemi, pun oua pwilitawu ewe manauen lom me föförün, ✡ Ef 4.22 10 nge oua pwilitalong ewe manau mi fö. Iei ewe aramas mi fö Kot a förätä, epwe pwal akasöfösefäli lon püsin lapalapan, pwe ämi silei Kot epwe unusöch. ✡ Ken 1.26; Ef 4.24 11 Iwe, pokiten ei, esap chüen wor sokofesenin lefilen chon lükün Israel me chon Juta, chon sirkomsais me chon resap sirkomsais, chon ekis, chon kichiniwel, ekewe amanau me ekewe aramas mi ngas, pun Kraist chök a aüchea seniir meinisin a pwal nom lor meinisin.
12 Ämi chon fil me ren Kot, ämi chon pin kana i a echenikemi, oupwe pwilitalong womi tong, kirikiröch, tipetekison, lukpwetete me mosonotam. ✡ Ef 4.2 13 Oupwe songomangfengen o amusamusfengen are eman a chou ngeni eman. Oupwe fokun amusamusfengen usun ach Samol a amusala ämi tipis. ✡ Ef 4.32 14 Nge lükün ekei föför meinisin oupwe echenifengenikemi lefilemi, pun chen a pilüküfengeni ekei mettoch meinisin, pwe ra unusöch lon ar chufengen. 15 Iwe, ewe kinamwe Kraist a ngenikemi epwe nemeni letipemi, pun Kot a körifengenikemi lon eu chök inis ngeni ei kinamwe. Iwe, oupwe kilisou ngeni Kot. 16 Än Kraist kapas mi fokun aüchea epwe nonom lon letipemi. Oupwe aiti ngeni eman me eman lefilemi ei kapas o fönööfengenikemi fän mirit. Oupwe kölü ekewe kölfel, ekewe kölün lamalam me ekewe köl mi pin. Oupwe köl ngeni Kot fän kilisou lon letipemi. 17 Iwe, meinisin mine oupwe föri ika apasa, oupwe föri fän iten ach Samol Jesus o oupwe kilisou ngeni Samach Kot ren i. ✡ Ef 5.19-20
Usun ach ririfengen lon ewe manau mi fö
3.18–4.1
18 Ämi fefin kana, oupwe aleasochis ngeni pwülüemi, pun iei met oupwe föri lon ämi souläng. ✡ Ef 5.22; 1.Pet 3.1 19 Ämi mwän kana, oupwe echeni pwülüemi, nge ousap pöchökül ngeniir. ✡ Ef 5.25; 1.Pet 3.7 20 Ämi nau kana, oupwe aleasochisi sememi me inemi lon mettoch meinisin, pun iei met Kot a pwapwa ren. ✡ Ef 6.1 21 Ämi sam me in kana, ousap asonga nöümi kana ren ämi apwüngüchouur, pwe resap apilükingau. ✡ Ef 6.4 22 Ämi amanau kana, oupwe aleasochisi ämi samol lon ei fanüfan lon mettoch meinisin, sap lupwen chök ar nenengenikemi pokiten oua mochen aitöchükemi. Nge oupwe föri ämi angang fän wenecharen letipemi, pun oua meniniti ach Samol. ✡ Ef 6.5-8 23 Meinisin mine oua föri, oupwe angang ngeni ren unusen letipemi usun itä nge oua angang ngeni ach Samol, nge sap ngeni aramas. 24 Oupwe chechemeni pwe ach Samol epwe ngenikemi liwinimi mine a iseis fän iten nöün aramas. Pun Kraist i wesewesen ämi Samol oua angang ngeni. 25 Nge aramas meinisin mi föri mine a ngau repwe angei liwinin ar föför, pun Kot esap lifilifil aramas lon an apwüngüür. ✡ Tut 10.17; Ef 6.9