1 Iwe, üa pwal küna och mi ngau won fanüfan a fokun aweiresi aramas: 2 Are Kot a ngeni eman aramas wöü me pisek me iteüöch pwe esap wor an osupwang ren mine a mochen, a tongeni fis pwe Kot esap mwüt ngeni pwe epwe alomota wöün we, nge eman chon ekis a alomota. Iwe, ei pön chök, ewer, iei eu riaföü mi watte. 3 Are eman mwän a wor ipükü nöün, are a pwal manauatam, inamwo ika fite ierin manauan, are esap tongeni alomota feiöchün manauan, esap pwal fisiöch angangen won peiasan, üa mefi pwe eman mönükol mi mwetela a feiöch seni. 4 Pun eman mönükol mi mwetela esap wor lomotan, epwe feilong lon rochopwak, nge rochopwak epwe pwölüöla itan. 5 Esap küna akkar, esap pwal silei och mettoch, nge a fen kinamwe seni ena mwän 6 esap tongeni alomota wöün, inamwo ika a manau lon ruongeröü ier. Ifa usun, ir me ruoman resap feila lon eu chök leni?

7 Aramas meinisin ra angang weires fän iten ener mongö chök, nge ar moneiti mongö esap fokun wes. 8 Iwe, ren met eman mi mirit a feiöch seni eman mi umwes? Ifa än eman chon wöüngau feiöch, are a silei mine epwe föri lon manauan? 9 A mürina än eman epwe menemenöch ren mine a nom ren lap seni an mocheniaiti pwal och. Pun ei pön chök, a usun chök turufi asepwäl.

10 Meinisin mine a fis a fen akot seni me lom, nge a pwal sil sokun lapalapen aramas. Iwe, esap wor eman aramas a tongeni pälüeni eman mi pöchökül seni. 11 Ia a wor chomong kapas ie, a pwal wor chomong kapas mi lomotongau o pön. Nge met lomotan ngeni eman aramas? 12 Iwe, iö a tongeni silei mine a mürina ngeni eman aramas lon ränin manauan mi mochomoch o pön usun chök ngünüan? Nge iö a tongeni aiti ngeni eman aramas mine epwe fis won fanüfan mürin an mäla?