1 Iwe, lupwen Mortokai a rong meinisin mine a fis, a kamwei üfan fän an letipeta, a üföüf üf seni tuk o uwätä falangen ekkei won möküran. A pwal feila lukalapen ewe telinimw o kechü me puchör fän leüömong. 2 Mürin a feila ren asamalapen imwen ewe king, nge esap tolong lon, pun esap wor eman a tongeni tolong lon asamalapen imwen ewe king fän üfan seni tuk. 3 Iwe, lon iteiten sop meinisin ia än ewe king allük a tori ie, a fis letipeta lein ekewe chon Juta. Ra echikefel, ra kechü o ngüngüres, nge chomong leir ra üföüf üf seni tuk o mot lon falangen ekkei.

4 Iwe, lupwen nöün Ester chon angang fefin me ekewe chon angang mwän ra feito ren o apworausa usun mine Mortokai a föri, kiwiin Ester a fokun weitifengeni. Iwe, a tinala üf ren Mortokai pwe epwe pwilitawu üfan seni tuk o üföüfolong. Nge Mortokai esap mochen angei. 5 Mürin, Ester a körato Hatak, eman nöün ewe king kewe chon angang mi wisen tümwünü Ester. A tinala ren Mortokai pwe epwe aisini met popun a föri ei. 6 Iwe, Hatak a feila ren Mortokai lon ewe lenien chulap lon ewe telinimw, a nom mwen asamalapen imwen ewe king. 7 Nge Mortokai a apworausa ngeni Hatak meinisin mine a fis ngeni, pwal usun ükükün ewe moni Haman a pwon pwe epwe iseis lon än ewe king lenien iseis fän iten mälan chon Juta meinisin. 8 Mortokai a pwal ngeni echö kapiin ewe allük a pwüngüla lon Susa usun ar repwe mäla. Epwe ngeni Ester o awewe ngeni masouan, epwe pwal pesei pwe epwe feila ren ewe king o tüngor an epwe ümöümöch ngeni, epwe pwal tüngor fän iten manauen aramasan. 9 Iwe, Hatak a liwinla ren Ester o apworausa ngeni mine Mortokai a üreni. 10 Mürin, Ester a kapas ngeni Hatak pwe epwe uwala ei pworaus ngeni Mortokai, 11 “Nöün ewe king chon angang meinisin, pwal aramas meinisin mi nom fän nemenien ewe king ra silei pwe ika eman mwän ika eman fefin epwe tolong fän mesen ewe king, nge esap mwo köri, ewe aramas epwe chök mäla, pun epwe küüw pwüngün ewe allük. Nge are ewe king epwe eiti ngeni eman wokun wokun nemenem mi för seni kolt, ewe aramas epwe manau. Iwe, ewe king esap chüen köriei pwe üpwe feila ren lon ükükün ilik rän.”

12 Iwe, Hatak a apworausa ngeni Mortokai usun mine Ester a apasa. 13 Mürin, Mortokai a tinala ren Ester mine a eäni pälüen, “Kosap ekieki pwe kopwe towu seni ewe feiengau epwe tori chon Juta meinisin, pokiten ka nonom lon imwen king. 14 Pun are ka fanafanala lon ei fansoun, alilisin me ngasalan chon Juta epwap fis seni pwal eu leni. Nge en me aramasom oupwe mäla. Eli fen iei popun ka wiseni ewe wisen kiwiin fän äsengesin ei sokun lapalap mi fis lon ei fansoun?” 15 Mürin, Ester a tinala pälüan ngeni Mortokai, 16 “Kopwe feila o achufengeni ekewe chon Juta mi nom lon Susa o echikefel fän itei. Ousap mongö ika ün lerän me lepwin lon ükükün ülüngat rän. Nge ngang me nei chon angang fefin aipwe pwal echikefel usun ämi. Mürin üpwe feila ren ewe king, inamwo ika üpwe purätiu ewe allük. Iwe, ika üpwe mäla, üpwe chök mäla.” 17 Mürin, Mortokai a feila o föri meinisin mine Ester a üreni.