1 Iwe, ewe Samol mi Lapalap a kapas ngeniei, 2 “Nöün aramas, kopwe amefi ngeni Jerusalem an kewe föför mi anioput. 3 Iwe, kopwe üreni Jerusalem, pwe iei alon Kot ewe Samol mi Lapalap ngeni: Poputän fanüom Kanaan, pun ka uputiu ikenan. Semom eman re Amor, nge inom eman fin Hit. 4 Lon ewe rän ka uputiu lon esap wor eman a pökü tarom, esap wor eman a atütuk pwe kopwe limöch, esap pwal wor eman a toofi ngonuk salt ika filiti ngonuk ro. 5 Esap wor eman a eäni tong ngonuk, pwe epwe föri eu lein ekei sokun föför ngonuk. Nge ra pöütukela lemal lon ränin om uputiu, pun ra oputok.

6 Mürin üa pwereto o küna pwe ka fares lon chaom. Nge lupwen üa küna pwe ka kula ren chaom, üa ürenuk, ‘Kopwe manau 7 o märitä usun chök efoch irän lemäl.’ Iwe, ka mämäritä o wattela tori ka eman föpwül mi fokun liöch. Oupwum a fis, mökürom a pwal langatamala, nge ka fokun selela.

8 Lupwen üa pwal pwereto, üa küna pwe a tori fansoun om kopwe tongeni pwüpwülü. Iwe, üa ameresala üfei womw o pwölüela om selela, üa pwal pwon ngonuk pwe üpwe tongeek. Ewer, üa eäni eu pwon fän akapel ngonuk pwe sipwe pwüpwülü. Iwe, ka wiliti pwülüei,” iei alon Kot ewe Samol mi Lapalap. 9 “Mürin üa atütuk ren koluk, üa talü senuk chaom o epiti ngonuk noppuk. 10 Iwe, üa aüföüfa ngonuk üf mi chü o eipweipwa ngonuk sus seni silin man mi aüchea, üa filiti ngeni inisum mangaku mi pwechepwech o pwölü ngonuk silik. 11 Iwe, üa foute ngonuk chomong sokun fout: lälän won poum me mwärämwärin fän üom, 12 ringen won pwötum me niouten won selingom, üa pwal ämwärämwära ngeni mökürom epa mwärämwär mi fokun ling. 13 Iei usun a wor foutom seni kolt me silifer, ka üföüf üf seni mangaku mi pwechepwech me silik me mangaku mi chü. Anom mongö pilawa mi mürina, ünümom chönün chunen, üa pwal ngonuk apüra seni föün olif. Iwe, ka fokun liöchüla o tolong lon wisen kiwin. 14 Iteüöchum a tori mwün fanüfan pokiten liöchum, pun ka fokun ling ren mine üa foute ngonuk,” iei alon Kot ewe Samol mi Lapalap.

15 “Nge ka chök lükü püsin liöchum, ka pwal alomotongaua iteüöchum ren om wiliti eman fin lisowu. Ka lisowu ngeni iteiten eman me eman mi feito reöm. 16 Iwe, ka angei ekoch üfom, pwe kopwe eäniir le alinga ekewe lenien fel won ekewe leni tekia fän itom, ka pwal amömö inisum ngeni meinisin mi feito reöm usun eman fin lisowu. Ena sokun esap öch pwe a fis, esap pwal öch an epwe fis lon kan fansoun repwe feito. 17 Ka pwal angei foutom mi ling seni kolt me silifer üa foute ngonuk me mwan, nge ka föri seniir uluulun mwän fän itom pwe kopwe lisowu ngeniir. 18 Iwe, ka angei üfom mi chü o pwölü ngeni ekewe uluulun mwän, ka pwal eäni asor ngeniir ai apüra me ai apach mi pwokus. 19 Üa amongöü ngonuk pilawa mi mürina, üa pwal ngonuk apüra seni föün olif o aünü ngonuk chönün chunen, nge en ka chök angei mine üa ngonuk o eäniir asor ngeni ekewe uluulun anümwäl, pwe repwe öch ngonuk. Ina usun mine ka föri,” iei alon Kot ewe Samol mi Lapalap. 20 “Iwe, noum kewe mwän me fefin, ka nöüniir fän itei, ka eäniir asor ngeni ekewe uluulun anümwäl pwe repwe kek. Ifa usun, esap fen naf pwe ka kirikiringau ngeniei? 21 Nge iei ka pwal niela nei kana o eäniir asoren kek ngeni ekewe uluulun anümwäl. 22 Nge lon om kewe föför mi anioput me om lisowu meinisin kosap chechemeni lekükünum, lupwen ka fokun selela o fares lon chaom.”

23 Iwe, iei alon Kot ewe Samol mi Lapalap, “Feiengauom, feiengauom, pun iei soposopun om kewe föföringau, 24 pwe ka pwal senätä leni mi ekis tekia fän itom o föri om kewe lenien fel ngeni uluulun anümwäl lon ekewe lenien amwicheich meinisin. 25 Ka aüetä om kewe lenien fel ngeni uluulun anümwäl lepopun ekewe al meinisin o alimengaua liöchum. Ka pwal amömö inisum ngeni iteiten eman me eman mi feito reöm o alapala om angangen lisowu. 26 Iwe, ka amömö inisum ngeni chon Isip, chon arum mi mocheisou, ka pwal alapala om angangen lisowu, pwe üa song ren. 27 Iei mine üa ü ngonuk o apwünguk. Üa akisikisala fanüom me rei o äsechukula ngeni chon oputok, ngeni ekewe chon Filistia mi notä ren om angangen mocheisou. 28 Iwe, pokiten kosap menemenöch, ka pwal amömö inisum ngeni chon Asiria. Ewer, ka lisowu ngeniir, iei mwo nge kosap pwal menemenöch ren. 29 Mürin ka alapala om angangen lisowu ngeni ekewe chon Papilon, ir seni ewe fanüen chon amömö, nge ren ei kosap pwal menemenöch.”

30 Iwe, Kot ewe Samol mi Lapalap a apasa, “A wiliwilikis lelukom, pwe ka chök föri ekei sokun föför usun eman mi amömö inisin o fokun säwemang. 31 Ka senätä om kewe leni mi ekis tekia lepekin ekewe al meinisin o föri om kewe lenien fel ngeni uluulun anümwäl lon ekewe lenien amwicheich meinisin. Nge kosap angei moni usun chokewe mi amömö inisir. 32 Ka eman fin lisowu mi etiwa chon ekis, nge kosap etiwa püsin pwülüom. 33 Mwän ra möni ekewe fin lisowu, nge en ka lifang ngeni chokewe ka lisowu ngeniir. Ka ngeniir om kewe lifangen amichimich, pwe repwe feito reöm seni ekis meinisin o kon reöm. 34 Iwe, ka fokun sokofesen seni ekewe lusun fefin mi amömö inisir, pun esap wor eman a püsin küttok, pwe en ka kütteer o möniir, nge kosap angei liwinum. Ren ei ka fokun sokola seniir.”

35 Iei mine Jerusalem, en eman fin lisowu, kopwe rongorong mine ewe Samol mi Lapalap a apasa. 36 Iei alon Kot ewe Samol mi Lapalap, “Ka pwilitawu üfom usun eman fefin mi amömö inisin. Ka fangala inisum ngeni noum kewe kamwet, pwal ngeni om kewe uluulun anümwäl mi anioput. Iwe, ka pwal niela noum kana o eäniir asor ngeniir. 37 Iei mine üpwe achufengeni noum kewe kamwet meinisin, chokewe ka efich, pwal chokewe ka oput. Üpwe achufengeniir seni ekis meinisin pwe repwe ü ngonuk, üpwe pwal aselelok fän meser pwe repwe küna om selela. 38 Iwe, üpwe apwünguk fän iten om lisowu me nimanau. Üpwe apwünguk fän ai song me lingeringer, pwe kopwe ninnila. 39 Iwe, üpwe atolongok fän nemenien noum kewe kamwet. Ir repwe atai ekewe leni ia ka amömö inisum ie o aturala om kewe lenien fel ngeni uluulun anümwäl. Repwe kamwei senuk üfom, repwe pwal angei senuk foutom mi ling o likitukela lon om selela. 40 Iwe, repwe amwichafengeni chomong aramas, pwe repwe monei ngonuk fau o atatakisiik ren nöür ketilas. 41 Repwe keni imwom kana, repwe pwal apwünguk fän mesen chomong fefin. Üpwe aükätiu om amömö inisum, kosap pwal chüen möni noum kewe kamwet. 42 Mürin üsap chüen song ngonuk ika niköökö womw. Üpwe awesi ai song o kinamwela. 43 Iwe, pokiten kosap chechemeni mine üa föri ngonuk lekükünum, nge ka asongaei ren ekei sokun föföringau meinisin, iei mine üpwe püsin liwini ngonuk liwinin om kewe föför. Pwota ka föri ekewe angangen mocheisou o achu ngeni om kewe angangen anioput?”, iei alon Kot ewe Samol mi Lapalap.

44 Ewe Samol mi Lapalap a apasa, “Meinisin mi silei mwiitun repwe eäni ei mwiitun usum, Jerusalem, ‘Usun lapalapen eman inelap, ina usun lapalapen nöün fefin.’ 45 En wesewesen nöün inom mi pöütala pwülüan me nöün kewe. En ka wesewesen usun chök pwiüm kewe mi pöütala pwülüer me nöür kewe. Inemi eman fin Hit, nge sememi eman re Amor. 46 Pwiüm we watte a iteni Samaria, a nom efeng me wisoposopun kewe. Nge pwiüm we kükün a iteni Sotom, a nom ör me wisoposopun kewe. 47 Nge en kosap chök fetal lon ipwer, kosap pwal chök apirü ar kewe föför mi anioput. Pwe mürin ekis chök fansoun ka alapala om föföringau lap seniir. 48 Mwo manauei, ngang Kot ewe Samol mi Lapalap üa apasa: Pwiüm Sotom me wisoposopun kewe resap föföringau usun en me wisoposopum kewe. 49 Iei tipisin pwiüm we Sotom: I me wisoposopun kewe ra lamalamtekia, ra mongömong, ra pwal nonomöch fän kinamwe, nge resap alisi chon wöüngau me mwelele. 50 Iwe, ra lamalamtekia o föri föför mi anioput me mwei. Iei mine üa aroserela, lupwen üa küna ar kewe föför. 51 Samaria esap föri esopun om tipis. En ka föri chomong föför mi anioput lap seni. Iei popun pwiüm kewe ra usun chök chon pwüng pokiten chomongun om föför mi anioput. 52 Iei kopwe püsin uwei om itengau, en mi apwüngü pwiüm kewe me lom. Pun om tipis a anioput seni ar tipis, iei mine ra usun chök pwe ra pwüng me lükum. Ewer, kopwe säw o uwei om itengau, pun ren om föför ka föri pwe pwiüm kewe ra usun chök chon pwüng.

53 Iwe, üpwe aüsefälietä Sotom me wisoposopun kewe, üpwe pwal aüsefälietä Samaria me wisoposopun kewe. Lon ena chök fansoun üpwe pwal aüsefäliiketä, 54 pwe kopwe säw o uwei om itengau pokiten meinisin mine ka föri. Ren ei pwiüm kewe repwe küna chip. 55 Iwe, repwe usun chök me lom, Sotom me wisoposopun kewe, pwal Samaria me wisoposopun kewe. Pwal en me wisoposopum kewe oupwe usun chök me lom. 56 Ifa usun, kosap eäni kapasen lamalamtekia ngeni pwiüm Sotom lon fansoun om lamalamtekia, 57 mwen esamwo pwä om kewe föföringau? Nge iei ka usun chök Sotom, pun ka küna turunufas me ren ekewe chon Etom me chon arur, pwal me ren ekewe chon Filistia. Iwe, chon arum meinisin ra turunufaseek. 58 Kopwe angei liwinin om mocheisou me om kewe föför mi anioput,” iei alon Kot ewe Samol mi Lapalap.

59 Ewer, iei alon Kot ewe Samol mi Lapalap, “Üpwe liwini ngonuk liwinin om föför, pun en ka aücheangaua ai we pwon fän akapel ngonuk ren om atai ewe pwon. 60 Nge ngang üpwe chechemeni ai we pwon ngonuk lupwen lekükünum, üpwe pwal afisätä eu pwon esemüch lefilach. 61 Mürin kopwe chechemeni om kewe föför meinisin o säw rer, lupwen üpwe aliwini ngonuk pwiüm kewe watte me kükün, pwe repwe noum fefin, inamwo ika esap alongolong won ai pwon ngonuk. 62 Iei usun üpwe försefälietä ai we pwon ngonuk, nge kopwe silei pwe ngang ewe Samol mi Lapalap. 63 Iwe, lupwen üpwe amusala om kewe föför mi ngau meinisin, en kopwe chechemeniir o säw rer, pwe kosap chüen apasa och,” iei alon Kot ewe Samol mi Lapalap.