1 Iwe, ewe Samol mi Lapalap a kapas ngeniei, 2 “Nöün aramas, kopwe üreni ewe samolun Tirus, pwe iei aloi ngang Kot ewe Samol mi Lapalap: Ka lamalamtekia lon lelukom, ka pwal ikeeketä ren om apasa, ‘Ngang eman kot. Üa mot won lenien motun eman kot lukalapen matau.’ Nge ka chök eman aramas, sap eman kot, inamwo ika ka ekieki pwe ka tipachem usun eman kot. 3 Mwa met, ka tipachem seni Taniel. Ifa usun, esap wor och mi monomon a monola senuk? 4 Ren om tipachem me silelap woum a chomongola, ka pwal achufengeni kolt me silifer lon om lenien iseis. 5 Ka fokun eäni tipachem lon om angangen sopai o achomonga woum. Iwe, ka lamalamtekia lon lelukom ren. 6 Iei mine ngang Kot ewe Samol mi Lapalap üa apasa: Pokiten ka ekieki pwe ka tipachem usun eman kot, 7 üpwe awarato womw chon ekis mi pwora seni aramas meinisin, pwe repwe afeiengauok. Iwe, repwe üttawu nöür ketilas o ataela mettoch meinisin mi mürina a toruk pokiten om tipachem, repwe pwal alimengaua lingom. 8 Iwe, repwe niik o aturukolong lon eu peias mi lölö. 9 Ifa usun, kopwe chüen apasa fän mesen chokewe mi niik, pwe en eman kot? Iwe, ka chök eman aramas, sap eman kot me ren chokewe mi niik. 10 Kopwe mäla usun chokewe resap sirkomsais ren ekewe chon ekis. Ngang Kot ewe Samol mi Lapalap üa kapas.”

11 Iwe, ewe Samol mi Lapalap a kapas ngeniei, 12 “Nöün aramas, kopwe chietä echö kölün kechü usun feiengauen ewe kingen Tirus. Iwe, kopwe üreni, pwe iei aloi ngang Kot ewe Samol mi Lapalap: Me lom en eman aramas mi wesewesen mürina, ka pwal uren tipachem o wesewesen mwänöch. 13 Ka nom lon Eten ewe tanipin Kot. Ka fout ngeni sokopaten fau aüchea iter karnelian, topas, jaspis, kirisolait, peril, oniks, safaia, karpungkel me emeralt. Mi wor om fout seni kolt, ra för fän itom lon ewe rän Kot a föruk. 14 Ka kepit pwe kopwe eman kerop chon tümwün, pun üa awisok ngeni. Ka nom won ewe chukun Kot mi pin o fetal lein fau mi meriweriw. 15 Ka wesewesen pwüng lon om föför seni ewe rän Kot a föruk tori ewe rän ka föföringau lon. 16 Ren watten om angangen amömö ka uren föförün mwänewüs o turulong lon tipis. Iei popun üa aturuketiu seni won ewe chukun Kot usun eman chon tipis, üa pwal asüükela seni lein ekewe fau mi meriweriw, en kerop chon tümwün. 17 Ka lamalamtekia lon lelukom pokiten om mwänöch, ka pwal alomotongaua om tipachem pokiten wattelan lingom. Iei mine üa aturukela won pwül o pwärala om feiengau ngeni ekewe king, pwe repwe nenengenuk. 18 Ren chomongun om tipis, pwal ren om atuputup le amömö ka turunufasei om kewe imw mi pin. Iei mine üa aküw eu ekkei lon telinimwom o kenukela. Üa awiluk ngeni falangen ekkei won pwül fän mesen chokewe meinisin mi nenengenuk. 19 Chon ekewe mwü meinisin mi sileek ra mairü reöm pokiten eniwokusun sopolomw, pun kosap chüen nom tori feilfeilachök.”

20 Iwe, ewe Samol mi Lapalap a kapas ngeniei, 21 “Nöün aramas, kopwe newenewen ngeni Siton o osuni usun feiengauan. 22 Iwe, kopwe apasa pwe iei aloi ngang Kot ewe Samol mi Lapalap: Nengeni, iei üpwe ü ngonuk, Siton. Üpwe pwärala ai ling lein ekewe chon Siton. Iwe, aramas repwe silei pwe ngang ewe Samol mi Lapalap, lupwen üpwe apwüngü chokewe mi imweimw lomw o pwärala lefiler pwe üa pin. 23 Pun üpwe awarato mätter womw, nge cha epwe pupula won alom. Iwe, noum aramas repwe ninnila me lukalapom ren chokewe mi maun ngonuk seni ekis meinisin. Mürin kopwe silei pwe ngang ewe Samol mi Lapalap.

24 Iwe, chon ekewe mwü mi nom ünükün Israel resap chüen wewe ngeni iräfölüföl mi ekinasa chon Israel ren ar kapasen turunufas. Ren ei repwe silei pwe ngang Kot ewe Samol mi Lapalap.”

25 Iei alon Kot ewe Samol mi Lapalap, “Lupwen üpwe achufengeni ekewe chon Israel seni me lein ekewe mwü ia ra toropasfeil ie, üpwe pwärala lein ekewe chon Israel, pwal mwen mesen chon ekewe mwü pwe üa pin. Iwe, repwe nonom lon püsin fanüer, ewe fanü üa ngeni nei we chon angang Jakop. 26 Iwe, repwe nonom lon ewe fanü fän kinamwe, repwe pwal aüetä imwer o föri ar tanipin wain. Üpwe apwüngü chon ekewe mwü ünükür mi ariaföüür ren ar kapasen turunufas, nge ir repwe chök nonom lon fän kinamwe. Mürin repwe silei pwe ngang ar Kot ewe Samol mi Lapalap.” ✡ Sow 3.4-8; Sek 9.1-2; Mat 11.21-22; Luk 10.13-14