1 Mürin ei pworaus lon mwün Artaksasta ewe kingen Persia, mi wor eman mwän itan Esra. Iei uruwon an kewe lewo: Esra nöün Seraia we mwän, Seraia nöün Asaria, Asaria nöün Hilkia, 2 Hilkia nöün Salum, Salum nöün Satok, Satok nöün Ahitup, 3 Ahitup nöün Amaria, Amaria nöün Asaria, Asaria nöün Meraiot, 4 Meraiot nöün Serahia, Serahia nöün Usi, Usi nöün Puki, 5 Puki nöün Apisua, Apisua nöün Pinehas, Pinehas nöün Eleasar, nge Eleasar nöün Aaron ewe souasor mi lap.

6 Ei mwän Esra eman soumak mi fokun silei ekewe allük ewe Samol mi Lapalap ewe Koten Israel a ngeni Moses. Iwe, pokiten ewe Samol mi Lapalap an we Kot a ümöümöch ngeni, iei mine ewe king a mwüt ngeni meinisin mine a tüngor.

7 Iwe, lon ewe afisuen ierin mwün ewe king Artaksasta, Esra me ekoch aramasen Israel ra sai seni Papilon o feila Jerusalem fiti ekoch souasor me chon ewe ainangen Lefi, chon köl, chon mamasa asamalapen imwenfel me chon angang ngeni ewe imwenfel. 8 Iwe, ra tori Jerusalem lon ewe alimuen maram, lon afisuen ierin mwün ewe king. 9 Lon aeuin ränin ewe aeuin maram Esra a popuetä an sai seni Papilon, nge lon aeuin ränin ewe alimuen maram a tori Jerusalem, pun an we Kot a ümöümöch ngeni. 10 Iwe, Esra a lechüni o achocho le kaiö än ewe Samol mi Lapalap kewe allük pwe epwe apwönüretä, epwe pwal aiti ngeni chon Israel ekewe allük me pwüüng.

11 Iwe, iei masouen ewe toropwe ewe king Artaksasta a ngeni ewe souasor Esra, i ewe soumak mi silelapei än ewe Samol mi Lapalap kewe allük me pwüüng fän iten chon Israel, 12 “Seni Artaksasta ewe kingen king kana ngeni ewe souasor Esra, i ewe soumaken ekewe allük än ewe Koten läng. 13 Iei ngang üa föri eu allük pwe ekewe aramasen Israel meinisin, ekewe souasor me chon ewe ainangen Lefi mi nom lon mwüi, are ra mochen feila Jerusalem, repwe tongeni etuk. 14 Pun ngang ewe king me nei kewe füman souöüröür aia tinukela pwe kopwe kütta pworausen Juta me Jerusalem o pi ika ra aleasochisi än om we Kot kewe allük mi nom reöm. 15 Kopwe pwal uwala ewe silifer me kolt ngang me nei kewe souöüröür aia fangala seni mochenin letipem ngeni ewe Koten Israel, imwan we imwenfel a nom lon Jerusalem. 16 Kopwe pwal uwala ewe silifer me kolt kopwe ioni lon unusen ewe fanü Papilon, pwal ekewe asor seni ekewe aramasen Israel me ekewe souasor repwe fangala seni mochenin letiper fän iten imwen ar we Kot lon Jerusalem. 17 Ren ei moni kopwe asochisi le kamö ekewe ätemwänin kow, ekewe ätemwänin sip me ekewe nienifön sip fitifengen me ekewe asoren mongö me asoren ün. Kopwe eäniir asor won ewe rongen asor lon imwen om we Kot lon Jerusalem. 18 Nge lusun ewe silifer me kolt oua tongeni möni ngeni mine a öch me reöm me pwiüm kewe chon Israel, usun mine a fich ngeni letipen om we Kot. 19 Iwe, ekewe pisek ra ngonuk fän iten angangen lon imwen om we Kot, kopwe uwala meinisin fän mesen ewe Kot lon Jerusalem. 20 Nge ekewe pisek meinisin ka chüen mochen aea fän iten imwen om we kot, kopwe angei mön seni än ewe king lenien iseis moni. 21 Nge ngang Artaksasta ewe king üa allük ngeni ämi meinisin chon iseis moni lon ewe fanü lotoun ewe chanpupu Oifrat, pwe oupwe müttir awora ngeni ewe souasor Esra, ewe soumaken ewe allük än ewe Koten läng, meinisin mine a tüngor senikemi. 22 Epwe tori ükükün rüanü ton silifer, limepükü tuuk wiich, limepükü lime kalon wain me limepükü lime kalon apüra, nge salt esap wor kaükün. 23 Meinisin mine ewe Koten läng a allük fän iten imwan imwenfel epwe wesewesen fis, pwe an lingeringer esap pur woi me nei kewe mwän. 24 Üa pwal asile ngenikemi pwe esap wor eman a tongeni angei ekewe sokopaten takises seni ekewe souasor, seni chon ewe ainangen Lefi, ekewe chon köl, ekewe chon mamasa asamalapen imwenfel, ekewe chon angang ngeni ewe imwenfel ika pwal seni ekewe ekoch chon angang ngeni ei imwen Kot.

25 Nge en Esra, lon om tipachem om Kot a fang ngonuk, kopwe filätä ekewe samol me soukapwüng, repwe eäni kapwüngün ekewe aramas meinisin mi nom lon ewe fanü lotoun ewe chanpupu Oifrat, chokewe meinisin mi silei än om we Kot kewe allük. Nge chokewe resamwo silei ekewe allük, kopwe aiti ngeniir. 26 Nge iteiten eman me eman esap mochen aleasochisi än om we Kot allük pwal än ewe king allük, ätewe epwe tolong lon kapwüng o angei müttiri pwüngün an kapwüng ika epwe mäla, ika epwe sü seni fanüan, ika repwe angei mettochun meinisin, ika epwe tolong lon fötek.”

27 Iwe, Esra a apasa, “Üa mwareiti ewe Samol mi Lapalap än äm kewe lewo we Kot mi atolonga ei sokun ekiek lon leluken ewe king, pwe epwe alinga imwen ewe Samol mi Lapalap lon Jerusalem. 28 Kot a pwal föri pwe üa küna ümöümöch me ren ewe king me nöün kewe chon öüröür pwal nöün kewe nöüwis meinisin mi wor maner. Nge pokiten üa silei pwe ewe Samol mi Lapalap ai we Kot a ümöümöch ngeniei, üa tipepwora o apöchöküla ngeni ekewe souemwenin Israel pwe repwe etiei le liwinla Jerusalem.”