2
1 Iwe, lon rüe me aeuin ränin ewe afisuen maram lon ewe chök ier alon ewe Samol mi Lapalap a torisefäli ekewe aramas ren ewe soufos Akai. 2 A kapas ngeni Akai pwe epwe üreni Serupapel ewe kepinan Juta me Josua ewe souasor mi lap, pwal ekewe lusun aramas meinisin mi chüen manau, 3 “Iö me leimi a küna lingen ewe Imwenfel me lom? Met oua küna ikenai? Ifa usun, esap lapalapangau lon ämi nengeni? ✡ Esr 3.12 4 Nge iei oupwe apworachokemi, ämi Serupapel me Josua, pwal ämi aramasen ei fanü meinisin. Oupwe angang, pun ngang üpwe etikemi. 5 Lupwen oua towu seni lon Isip, üa fen pwon ngenikemi pwe üpwe etikemi. Ngüni a nonom lefilemi, iei mine ousap niuokus.” ✡ Eks 29.45-46 6 Pun iei alon ewe Samol mi Unusen Manaman, “Mürin fansoun mochomoch üpwe achechasefäli läng me fanüfan, pwal matau me fanüpwas. ✡ Ipr 12.26 7 Üpwe amwökütükütü mwün fanüfan meinisin, wöür meinisin epwe tori ei leni, üpwe pwal aurala ei Imwenfel ren ling. 8 Silifer me kolt meinisin ai. 9 Iwe, lingen ei Imwenfel epwe lapalap seni lingen ewe Imwenfel me lom. Ngang üpwe fangeto lon ei leni wöü me kinamwe.” Iei alon ewe Samol mi Unusen Manaman.
Kot a apwüngü ekewe aramas, pun resap allükülük
2.10-19
10 Lon aruuen ierin mwün Tarius, lon rüe me rüanün ränin ewe atiuen maram ewe Samol mi Lapalap a kapas ngeni ewe soufos Akai. 11 Iwe, a üreni, “Kopwe tüngor ngeni ekewe souasor pwe repwe palüeni ei kapas ais, 12 ‘Ifa usun, ika eman a uwei lon üfan asoren fituk mi pin, nge üfan a tääri pilawa ika mongö mi ipwöt ika wain ika apüra seni föün olif ika sokun mongö, ifa usun, ekei mongö repwe pwal pin?’ ” Iwe, ekewe souasor ra palüeni, “Apwi.” 13 Mürin, Akai a aisiniir, “Nge ifa usun, ika eman a limengau pokiten an atapa eman somä, nge a pwal atapa ekei sokun mongö, ifa usun, epwe limengau ewe mongö?” Iwe, ekewe souasor ra palüeni, “Ewer, epwe limengau.” ✡ Num 19.11-22 14 Iwe, Akai a üreniir, “Iei alon ewe Samol mi Lapalap: Ina usun lapalapen aramasen ei mwü me fän mesei. Meinisin mine ra föri, pwal meinisin mine ra eäni asor a limengau.” 15 Iei alon ewe Samol mi Lapalap, “Ouse mochen oupwe ekieki mine epwe fis seni ikenai. Mwen oua popueta le aüsefälieta ewe Imwenfel, 16 ifa usun, met a fis ngenikemi? Lupwen eman a ekieki pwe a wor ren ükükün föpükü paun kinian föün wiich, a chök wor ruupükü, nge lupwen eman a feito lon lenien wüchüch föün iran wain o ekiekin üfi lime kalon, a chök üfi rüe. 17 Iwe, üa afeiengaua meinisin mine oua fotuki ren mwoi me mesenipik me üten fau. Nge ämi ousap kul ngeniei. 18 Iwe, ikenai rüe me rüanün ränin ewe atiuen maram, ewe rän longolongun ewe Imwenfel a wes. Oupwe ekieki usun mine epwe fis seni ikenai. 19 Inamwo ika esap chüen wor föün wiich lon ämi lenien iseis, nge ekewe irän wain me fik me apel me olif resap mwo ua. Nge seni ikenai üpwe afeiöchükemi.”
Än Kot pwon ngeni Serupapel
2.20-23
20 Iwe, lon rüe me rüanün ränin ewe maram ewe Samol mi Lapalap a kapas ngeni Akai fän aruuan, 21 “Kopwe kapas ngeni Serupapel ewe kepinan Juta, pwe iei üpwe le achecha läng me fanüfan 22 o aturätiu ekewe mwü. Üpwe awesi nemenemen ekewe king mi nemeni ekewe mwü, üpwe pwal alupala ekewe woken fiti ekewe chon wawa. Ekewe oris me chon wäniir repwe mäla, pun iteiten eman me eman leir epwe niela en me chienan. 23 Lon ewe rän üpwe angeek, en Serupapel nei chon angang, üpwe pwal nounuk usun efoch ringen impwang * wewen üpwe awisok pwe kopwe nemenem fän itei. Pun en ätewe üa afiluk.” Iei alon ewe Samol mi Unusen Manaman.