1 Feiengauom, en chon kata, en kosamwo püsin tala. Feiengauom, chon atuputup mi afeiengau, nge esamwo wor eman a atupuk. Wesin om kata kopwe püsin tala, nge wesin om angangen atuputup mi afeiengau kopwe püsin tup o feiengau.

2 Ai Samol mi Lapalap, kopwe ümöümöch ngenikem, äm aia anomu äm apilükülük womw. Kopwe tümwünükem iteiten rän, kopwe pwal amanauakem lon fansoun riaföü. 3 Ewe mwichen aramas ra süla ren mweliom mi wewe ngeni chopulap, nge lupwen ka maun fän item, chon ekewe mwü ra toropasfeil. 4 Iwe, aramas repwe ürüng won mine ekewe chon maun ra likitala pwe choon wokur, usun chök lifichimas ra ässiti mettoch, repwe pwal mweteri liaper usun chök lifichimas.

5 Ewe Samol mi Lapalap a tekia, pun a nonom won läng. Iwe, epwe afisätä apwüng me pwüng lon Jerusalem 6 o anüküchara ewe mwü. Iwe, i epwe amanaua nöün aramas o ngeniir tipachem me silelap mi somwola, nge ar niuokusiti ewe Samol mi Lapalap iei wöür. 7 Nengeni, ekewe chon pwora ra siö won ekewe al, nge ekewe chon künö mi mochen afisätä kinamwe ra kechüangau. 8 Esap wor eman a fetal won ekewe alalap, esap pwal chüen wor chon saifeil. Ekewe pwonen atipeeufengen ra tala, ekewe chon pwärätä ra küna turunufas, nge aramas ra aücheangau. 9 Ewe fanü a aiolol o pwasapwas, ewe wöllapen Lepanon a pwasala. Ewe lemolun Saron mi pwülüöch a usun chök eu fanüapö, nge ekewe irä won Pasan me Karmel ra amworala chör.

10 Iwe, ewe Samol mi Lapalap a apasa, “Iei üpwe ütä, üpwe fefeitä, iei üpwe pwal atekiaeitä. 11 Mine oua ekiekietä esap wor aüchean, nge meinisin mine oua föri esap wor lomotan. Iwe, enienin ngasangasemi eu ekkei mi püsin kenikemiila. 12 Ämi aramas oupwe usun pweech mi um, oupwe pwal usun chök iräfölüföl mi pöküpök ra kek lon ekkei.”

13 Oupwe rongorong mine üa föri, ämi mi toau, nge ämi mi arap, oupwe mefi ai manaman. 14 Ekewe chon tipis lon Sion ra niuokus, nge chokewe resap lükü Kot ra chechech. Ra ais, “Iö leich epwe tongeni manau ren än Kot apwüng mi wewe ngeni eu ekkei mi sarara tori feilfeilachök?” 15 Eman mi föri mine a pwüng o eäni kapas wenechar, i epwe manau, pwal eman mi oput an epwe angei winnan fän pöchökül, esap mochen angei lifangen amichimich, nge a pinei selingan pwe esap rongorong pworausen nimanau, a pwal apüngala mesan pwe esap küna mine a ngau. 16 Ei sokun aramas epwe nonom won ekewe lenien tekia, epwe nonom fän kinamwe usun eman mi nom lon imwen maun mi pöchökül. Epwe fokun wor anan mongö me ünüman koluk.

17 Iwe, mesom epwe küna lingöchün ewe king, epwe pwal nenengeni eu fanü mi fokun watte. 18 Kopwe ekieki lon lelukom usun ewe eniwokus mi fis me lom o ais, “Ia a nom ie ewe meilapen nöüwis? Ia a nom ie ewe chon angei takises? Nge ia a nom ie ewe chon aleani ekewe imw tekia?” 19 Iwe, kosap chüen küna ekana aramas mi lamalamtekia, ekana aramas mi eäni fosun ekis mi monomon, esap wor eman a tongeni wewe ren. 20 Kopwe awena mesom ngeni Sion, ewe telinimwen ach kewe chulap mi pin. Iwe, mesom epwe nenengeni Jerusalem, ewe lenien kinamwe. Epwe wewe ngeni eu imw mangaku mi nükünük, chüfölün resap üttütä, nge selin resap mwü. 21 Ikenan ewe Samol mi Lapalap epwe pwäri ngenikich an ling. Ewe telinimw epwe usun chök eu lenien chanpupu mi chölap fän itach, nge esap wor wän chon oputach wa fatül are sip watte, repwe tongeni sai won. 22 Iwe, ewe Samol mi Lapalap ach souapwüng, ewe Samol mi Lapalap ach sounemenem, ewe Samol mi Lapalap ach king, i epwe amanauakich. 23 Iwe, selin war resap mei, resap tongeni anüküöchü ewe öü lon lenian, resap pwal tongeni aürätä ewe amara. Äm aipwe ineti liapem mi chomong seni maun, pwal mwo nge chon pechemä repwe uweela liaper. 24 Iwe, esap wor eman chon ewe fanü epwe apasa pwe a samau. Nge än ekewe aramas tipis epwe musala.