38
Hiskia a samau
38.1-22
(2.King 20.1-11; 2.Kron 32.24-26)
1 Iwe, lon ewe fansoun Hiskia a samau o arap ngeni an epwe mäla. Ewe soufos Aisea nöün Amos we a feito ren o üreni, “Iei alon ewe Samol mi Lapalap, ‘Kopwe amola om amürinimä, pun kopwe mäla, nge kosap pöchökülsefäl.’ ” 2 Mürin, Hiskia a kul ngeni etipen rumwan o iotek ngeni ewe Samol mi Lapalap. 3 Iwe, a apasa, “Ai Samol mi Lapalap, üa tüngor ngonuk, kose mochen kopwe chechemeni pwe seni unusen letipei üa angang ngonuk fän allükülük, üa pwal föri mine a pwüng me reöm.” Iwe, Hiskia a fokun kechüangau. 4 Mürin, ewe Samol mi Lapalap a allük ngeni Aisea, 5 “Kopwe liwiniti Hiskia nei aramas o üreni pwe iei aloi ngang ewe Samol mi Lapalap än an we lewo Tafit we Kot: Üa rong om iotek, üa pwal küna om kechü. Iei üpwe apacha ngeni ränin manauom pwal engol me limu ier. 6 Iwe, üpwe angasok seni ewe kingen Asiria, üpwe pwal angasa ei telinimw o tümwünü.”
7 Iwe, Aisea a üreni, “Ewe Samol mi Lapalap epwe ngonuk eu asisil, pwe epwe apwönüetä mine a eäni pwon ngonuk. 8 Epwe aliwinisefäliela nürün ewe wok ngeni engol kinikin me won än Ahas we lenien aükük fansoun.” Iei mine akkar a liwinsefäl ngeni ekewe engol kinikin a fen palala me won ewe lenien aükük fansoun.
9 Iwe, mürin än Hiskia pöchökülsefäl seni an samau, a föri echö köl o maketiu:
10 Üa ekieki pwe leoloasen ränin manauei üpwe mäla,
üpwe fokun tolong lon asamen lenien sotup,
pwe ränin manauei esap chüen wor.
11 Iwe, üa apasa, lupwen üa samau,
üsap chüen küna ewe Samol mi Lapalap lon fanüen chokewe mi manau,
üsap pwal chüen küna eman aramas me lein chokewe mi nom won fanüfan.
12 Manauei a feil seniei usun eu imw mangaku a tomola.
Ewer, a müchüla usun eman chon tür a awesala türünian.
Kot a fichiela manauei usun eman a fichiela mätättärin ewe tür.
Iwe, mwen an epwe pwinila a awesi manauei.
13 Üa siö tori a ränila pwe eman epwe alisiei.
Kot a asüngürü chüi meinisin usun eman laion.
Nge mwen an epwe pwinila a awesi manauei.
14 Iwe, üa tikitik usun eman ekiek ika eman kawakaw,
üa pwal ngüngü usun eman lisom.
Mesei a ächikichik ren ai netä läng.
Ai Samol, üa nom lon riaföü, kose mochen kopwe alisiei.
15 Nge met ngang üpwe apasa? Kot a kapas ngeniei, nge i a pwal püsin föri ei.
Üsap chüen tongeni möür kinamwe pokiten weiresin letipei.
16 Ai Samol, ngang üpwe manau reöm, kopwe akinamwei letipei.
Kose mochen kopwe apöchökülasefäliei o amanauaei.
17 Ellet, ren watten ai riaföü üa küna feiöch,
pun lon om chen ka efieitä seni lon ewe pwangen feiengau.
Nge ai kewe tipis meinisin ka pöütala lükisökurum.
18 Iwe, lenien sotup esap tongeni kilisou ngonuk, nge mäla esap
tongeni mwareituk. Chokewe mi nom lon peias resap tongeni
apilükülük ngeni om allükülük.
19 Nge chokewe chök mi manau ra kilisou ngonuk
usun ngang üa kilisou ngonuk ikenai.
Ekewe sam ra aiti ngeni nöür usun om allükülük.
20 Ewe Samol mi Lapalap a amanauaei.
Iwe, ousipwe kölün mwareiti Kot o ettiki kitar
lon ränin manauach meinisin lon imwen ewe Samol mi Lapalap.
21 Iwe, Aisea a apasa, “Oupwe uwato eu tükütükün safei seni uän ewe irä fiik o isetä won machen Hiskia pwe epwe pöchökülsefäl.” 22 Mürin, Hiskia a ais, “Ifan ewe asisil pwe üpwe tufichin feila lon imwen ewe Samol mi Lapalap?”