1 Oupwe ütä, ämi aramasen Jerusalem, o saramala,

pun ämi saram a war, nge lingen ewe Samol mi Lapalap a tineitikemi.

2 Pun nengeni, rochopwak epwe pwölüela fanüfan,

nge kiroch epwe tori chon ekewe mwü.

Nge ewe Samol mi Lapalap me lingan epwe pwäla

o tittin womw, en telinimw Jerusalem.

3 Iwe, chon ekewe mwü repwe feito ren saramom,

nge ekewe king repwe feito ren saramen tinom we mi usun saramen mallen rän.

4 Kopwe nenefeil o küna mine a fis:

Noum aramas ra chufengen pwe repwe feito reöm.

Noum mwän repwe feito seni toau,

nge aramas repwe ekieto noum fefin.

5 Iwe, lupwen kopwe küna ei, kopwe wosaramaram,

lelukom epwe pwapwa o mwänek.

Pun feiöchün lematau epwe toruk,

kopwe pwal wöüni wöün ekewe mwü.

6 Iwe, chomong pwiin kamel repwe nom won fanüom, apanen kamel seni Mitian me Efa.

Chon Sepa meinisin repwe feito, repwe uwato kolt me apach mi pwokus

o arongafeili iteüöchün ewe Samol mi Lapalap.

7 Aramas repwe emwenato reöm ekewe pwiin sip seni Ketar,

pwal ekewe ätemwänin sip seni Napaiot fän iten asor.

Iwe, ewe Samol mi Lapalap epwe etiwa ewe asor ra keni won an rongen asor.

Epwe pwal alingöchü imwan mi ling.

8 Meni kana sip ra äs usun kuchu,

pwal usun lisom mi liwin ngeni faser?

9 Iwe, ekewe fanüen lematau ra witiwitiei.

Ekewe sip watte ra akom o uwato noum mwän seni toau,

pwal ar silifer me kolt

fän iten ewe Samol mi Lapalap om we Kot,

Ewe mi Pin lon Israel,

pun a alingok.

10 Iwe, ewe Samol mi Lapalap a üreni Jerusalem,

“Chon ekis repwe aüetä tittin telinimwom,

nge ar kewe king repwe angang ngonuk.

Pun lon ai song üa afeiengauok,

nge lon ai ümöümöch üa tongeek.

11 Iwe, asamalapom kewe repwe suk fochofoch,

resap fokun kapüngüla lerän me lepwin,

pwe aramas repwe uwato reöm wöün ekewe mwü,

nge ekewe king repwe akom mwer. ✡ Pwär 21.25-26

12 Nge chon ekewe mwü resap mochen angang ngonuk repwe rosola,

fanüer epwe fokun tala.

13 Iwe, repwe uwato ekewe irä saipires me asas me pain,

ekewe irä mi mürina seni wöllapen Lepanon,

pwe repwe eäniir le aüsefäliiketä, en Jerusalem.

Repwe eäniir le alinga imwei mi pin, pwal ai telinimw.

14 Iwe, nöün chokewe mi ariaföüuk repwe feito o pworotiu mwom,

nge meinisin mi turunufaseek repwe chapetiu arun pecheöm.

Repwe aita ngonuk telinimwen ewe Samol mi Lapalap,

pwal Sion telinimwen Ewe mi Pin lon Israel. ✡ Pwär 3.9

15 Iwe, kosap chüen pöütüla o küna koput,

esap pwal chüen fis pwe kopwe sochowun me ren aramas.

Pwe üpwe fokun atekiokotä feilfeilachök,

kopwe pwal eu lenien apwapwa seni eu täppin aramas tori eu täppin.

16 Kopwe wöüni wöün ekewe mwü,

nge ekewe king repwe amongök usun eman fefin a aoupu nöün.

Mürin kopwe silei pwe ngang ewe Samol mi Lapalap om Chon Amanau pwal om Chon Angasa,

Ewe mi Manaman lon Israel.

17 Iwe, ämi piras üpwe siwili ngeni kolt,

nge ämi mächä ngeni silifer.

Ämi mwüch üpwe siwili ngeni piras,

nge ämi fau ngeni mächä.

Üpwe seikätä kinamwe pwe epwe samolunikemi,

nge pwüng epwe nemenikemi.

18 Esap chüen wor pworausen chon mwänewüs lon fanüom,

esap pwal chüen fis maun me feiengau me lon kiännin fanüom.

Iwe, tittin telinimwom kopwe aita ngeni “Manau”,

nge asamalapan kopwe aita ngeni “Ingemwar”.

19 Iwe, kosap chüen eäni saramen akkar lerän

ika tinen maram lepwin pwe repwe asaramok,

pun ngang ewe Samol mi Lapalap üpwe om saram tori feilfeilachök.

Ngang om Kot üpwe om ling. ✡ Pwär 21.23; 22.5

20 Om akkar esap chüen tuputiu, nge om maram esap kirochola.

Pun ngang ewe Samol mi Lapalap üpwe om saram tori feilfeilachök,

nge ränin om letipeta repwe müchüla.

21 Mürin, noum aramas meinisin repwe föri mine a pwüng.

Repwe fanüeni ewe fanü tori feilfeilachök,

pun üpwe fotukiir ikenan ren püsin pei,

pwe üpwe küna ling rer.

22 Ewe mi tekison leimi epwe wiliti eu cho,

nge ewe mi kis epwe wiliti eu mwü mi pöchökül.

Ngang ewe Samol mi Lapalap,

üpwe müttir apwönüetä ai pwon lon fansoun üa filätä.”