1 Iwe, ewe Samol mi Lapalap a apasa, “Üa pwäriei ngeni chokewe resap ais usi, nge chokewe resap küttaei ra künaei. Üa apasa ngeni chon eu mwü resap köri itei, ‘Ngang iei, ngang iei.’ ✡ Rom 10.20 2 Iteiten rän üa aitiela pei pwe üpwe etiwa eu mwichen aramas mi lükümach o ü ngeniei, nge ra chök föri mine a ngau o chei mochenin letiper. ✡ Rom 10.21 3 Ir eu mwichen aramas ra afifi lemesei iteiten fansoun, ra föri ar asor ngeni ekewe anümwäl lon ekewe tanipi o keni apach mi pwokus won ekewe rongen asor seni fau mi fal. 4 Lepwin ra mot lein peias o feila ngeni leni mi monomon pwe repwe ais ngeni ngünün ekewe somä, ra pwal ochei fituken pik o ünümi setin man mi anioput me rei. 5 Iwe, ra apasa ngeni chon aruur, ‘Ousap kanoto rem o atapakem, pun aia kon pin senikemi.’ Ekei aramas ra usun chök eu ekkei mi ötüpwaro, a ötütä lon pwöti iteiten rän. 6 Ar föför meinisin a mak o nom fän mesei. Üsap fanafanala, nge üpwe liwini ngeniir. Ewer, üpwe liwini ngeni püsin inisir 7 ar föföringau, pwal än ar kewe lewo föföringau. Iwe, pokiten ar keni apach mi pwokus won ekewe chukutekia o turunufaseei won ekewe chukutekison, üpwe liwini ngeni püsin inisir ükükün ar föförün lom.” Iei alon ewe Samol mi Lapalap.

8 Iei alon ewe Samol mi Lapalap, “Usun a chüen wor chönün wain lon ekoch kewe föün lon ewe umwun wain mi mürina, nge aramas ra apasa, ‘Kosap pöütirela meinisin, pun a chüen wor feiöch lor’, iei usun üsap pwal arosala nei aramas meinisin pokiten nei kewe chon angang. 9 Iwe, üpwe awora mwirimwirin Jakop, nge mwirimwirin Juta repwe chukuni chuki kana. Iwe, nei aramas üa afiliir repwe fanüeni ewe fanü, nge nei chon angang repwe nonom won. 10 Saron epwe wiliti eu lenien fetil fän iten pwiin sip, nge ewe lemolun Akor epwe wiliti eu lenien asösö fän iten pwiin kow nöün nei aramas mi küttaei. ✡ Jos 7.24-26

11 Nge ämi oua pöütieila, ousap pwal chüen ekieki chuki mi pin. Iei oua soun asor mongö ngeni ewe kot a iteni ‘Feiöch’, oua pwal alolöü ngeni wain ewe kapen asor än ewe kot itan ‘Akota mine epwap fis me mürin.’ 12 Iei üpwe akota ngenikemi pwe oupwe mäla ren ketilas, nge ämi meinisin oupwe pworotiu pwe oupwe ninnila. Pun lupwen üa kökkö, ousap pälüeniei, nge lupwen üa kapas, ousap aüselingaei. Pwe oua chök föri mine a ngau fän mesei o filätä mine üsap efich.”

13 Iei mine ewe Samol mi Lapalap a apasa, “Nei chon angang repwe mongö o ün, nge ämi oupwe echik o kaka. Nei chon angang repwe pwapwa, nge ämi oupwe säw. 14 Nei chon angang repwe köl fän pwapwan letiper, nge ämi oupwe kechü fän weires o ngüngüres fän riaföün lelukemi. 15 Iwe, nei kewe aramas üa filiretä repwe föüni itemi lon ar kapasen ottek, nge ngang Kot ewe Samol mi Lapalap üpwe nikemiila. Iwe, üpwe aita ngeni nei kewe chon angang eu it mi fö. 16 Iö a mochen tüngor an feiöch me lon ewe fanü, epwe tüngor an feiöch me ren ewe Kot mi let, nge iö a pwon fän akapel me lon ewe fanü, epwe apelü ewe Kot mi let. Pun ekewe riaföün fansoun lom ra manlüküla, ra monola seniei.”

17 Iwe, ewe Samol mi Lapalap a apasa, “Nengeni, üpwe föri eu läng mi fö me eu fanüfan mi fö. Iwe, esap chüen wor eman epwe chechemeni ekewe mettochun lom o ekieki usun. ✡ Ais 66.22; 2.Pet 3.13; Pwär 21.1 18 Nge oupwe chök pwapwa o mwänek fochofoch ren mine üpwe föri. Pun, üpwe föri Jerusalem pwe epwe eu leni mi apwapwa, nge aramasen lon repwe meseik. 19 Iwe, ngang üpwe pwapwaiti Jerusalem o mwänek ren nei aramas. Esap chüen wor eman epwe rongorong kechü me siön riaföü lon. ✡ Pwär 21.4 20 Iwe, esap chüen wor eman semirit lon ei fanü epwe manau ekoch chök rän, ika eman chinlap esap aunusa ierin manauan. Pun eman mi mäla, lupwen a ierini ipükü, epwe chüen iteni alüal, nge eman mi mäla mwen an ierini ipükü epwe alea lein chon tipis mi anümamau. 21 Iwe, repwe aüetä imwer o nonom lon, repwe pwal fotuki irän wain o ochei uan. 22 Esap fis pwe repwe aüetä imwer, nge eman lükür epwe nom lon. Esap pwal fis pwe repwe fotuki irä, nge eman lükür epwe mongö seni. Pun ierin manauen nei aramas epwe usun chök ierin manauen efoch irä, nge nei chon fil repwe pwapwaiti feiöchün angangen pöür fansoun langatam. 23 Esap chüen fis pwe ra resin angang weires o foleni nöür pwe repwe mäkai. Pun ngang ewe Samol mi Lapalap üpwe afeichüür me mwirimwirir kana. 24 Iwe, üpwe apwönüetä ar iotek mwen resamwo tüngor, nge lupwen ra chüen fos, üpwe aüselingeer. 25 Eman wolif me eman apanen sip repwe mongöfengen, eman laion epwe mongö fetilipwas usun eman kow, nge eman serepenit epwe mongö pwül moromor. Iwe, resap chüen afeiengaua eman ika atala och me won unusen chuki mi pin.” Iei alon ewe Samol mi Lapalap. ✡ Ais 11.6-9