15
Än Kot song ngeni chon Juta esap kisikisila
15.1-14
1 Mürin, ewe Samol mi Lapalap a üreniei, “Inamwo ika Moses me Samuel ra ütä mwei o tüngormau ngeniei fän iten ekei aramas, letipei esap kul ngeniir. Kopwe tinirela seni fän mesei o afeilaar. ✡ Eks 32.11-14; Num 14.13-19; 1.Sam 7.5-9 2 Nge are repwe aisinuk, ‘Ia aipwe feila ie?’ kopwe üreniir, ‘Iei alon ewe Samol mi Lapalap:
Chokewe mi feil ngeni ar repwe mäla ren mätter
repwe mäla ren mätter,
chokewe mi feil ngeni ar repwe mäla lon maun
repwe mäla lon maun,
chokewe mi feil ngeni ar repwe mäla ren lengita
repwe mäla ren lengita,
nge chokewe mi feil ngeni ar repwe oola
repwe oola.’ ✡ Pwär 13.10
3 Ngang ewe Samol mi Lapalap üpwe awisa rüanü sokun feiengau repwe toriir: Repwe mäla lon maun, ekewe kolak repwe ileela somär, ekewe machang me ekewe manmwacho repwe ocheer o aroserela. 4 Üpwe föri pwe repwe och minen eniweniw ngeni chon ekewe mwü meinisin won fanüfan, pokiten mine Manasa nöün Hiskia we mwän a föri me lon Jerusalem, lupwen a kingen Juta.” ✡ 2.King 21.1-16; 2.Kron 33.1-9
5 Iei alon ewe Samol mi Lapalap,
“Iö epwe tongeekemi, ämi chon Jerusalem,
ika iö epwe lolilenäsinikemi?
Iö epwe üla o ais usumi?
6 Ämi oua likitieila,
oua chök sopwela le tokola seniei.
Iei mine üa aitiewu pei o afeiengauakemi.
Üa chipwangela le pwetete ngenikemi.
7 Üpwe söfölükemiila ren efoch söföl mi keang
me lon asamalapen ekewe telinimwen ei fanü.
Üpwe niela nöümi kewe o arosakemiila,
pun ousap ükütiu seni ämi kewe föför mi ngau.
8 Üpwe föri pwe ekewe fefin mi mä pwülüer
repwe chomong seni ekewe föün pien aroset.
Üpwe awarato eman chon kata leoloas,
pwe epwe afeiengaua inen ekewe alüal.
Üpwe müttir apüngätiu wor
riaföü me niuokus watte.
9 Neminewe mi nöüni füman mwän, nge ra mäla, a apwangapwangala o kükünüla an ngasangas.
An saram a wiliti rochopwak,
a säw o itengau.
Nge ekewe ekoch mi chüen manau,
üpwe föri pwe chon oputer repwe nirela.
Ngang ewe Samol mi Lapalap üa kapas.”
10 Inei, üa feiengau, pun ka nöünieitiu. Ngang eman aramas unusen chon ei fanü ra anini o afitikoko ngeni. Esap wor eman a tüngor och seniei, üsap pwal liwinimang ngeni eman, nge ir meinisin ra ottekiei. 11 Iwe, ewe Samol mi Lapalap a üreniei, “Ellet, üpwe angasok ren eu popun mi mürina. Ellet, üpwe föri pwe chon oputom repwe tütüngor ngonuk lon fansoun feiengau me riaföü. 12 Ifa usun, eman aramas a tongeni kupi mächä, ewe mächä ika piras seni efeng?”
13 Ewe Samol mi Lapalap a pwal üra, “Üpwe tinato chon oputen nei aramas, repwe uwala wöür me pisekir pwe liaper. Ei epwe fis pokiten ar kewe tipis meinisin ra föri lemenen unusen ewe fanü. 14 Üpwe föri pwe repwe angang ngeni chon oputer me lon eu fanü resap silei. Pun ai song a usun chök ekkei mi pulopul tori feilfeilachök.”
Än Kot kapasen allükülük ngeni Jeremaia
15.15-21
15 Mürin Jeremaia a apasa, “Ai Samol mi Lapalap, en ka silei mettoch meinisin. Kopwe chechemeniei o alisiei. Fän itei kopwe ngeni chon ariaföüüei chappen ar föför. Lon om mosonotam kosap angei manauei. Kopwe chechemeni pwe üa itengau fän itom. 16 Üa iseis lon lelukei om kewe kapas, lupwen ra toriei. Om kapas a fis pwe ai pwapwa, lelukei a meseik ren, pun itom a föü woi, ai Kot Samol mi Unusen Manaman. 17 Üsap nom lon mwichen chon kütta ar pwapwa, üsap pwal etiir le meseik. Üa äkäleman won ai pokiten poum a nom woi, pun en ka auraei ren song. 18 Pwota ai metek esap ükütiu? Pwota kinasei a fokun momang? Ifa usun, kopwe usun chök eu öüwö mi alichipüngüei, pun kolukun lon ra morotä?”
19 Iei mine ewe Samol mi Lapalap a apasa, “Are kopwe liwinsefälitiei, üpwe awisasefäliik pwe kopwe angang ngeniei. Are kopwe apasa mine a aüchea, nge sap mine a lomotongau, kopwe aweniei. Ekewe aramas repwe kul ngonuk, nge en kosap kul ngeniir. 20 Iwe, üpwe föri pwe kopwe wewe ngeni eu tit mi pöchökül seni piras ngeni ekei aramas. Ir repwe fiu ngonuk, nge resap tongeni akufuk, pun ngang üa etuk pwe üpwe amanauok o angasok. 21 Ngang üpwe amanauok seni lepöün ekewe aramasangau o angasok seni fän nemenien ekewe mi mwänewüs ra kamwöchünuk womw. Ngang ewe Samol mi Lapalap üa kapas.”