1 Iwe, lon mwün Jehoiakim ewe kingen Juta nöün Josia we mwän, ewe Samol mi Lapalap a kapas ngeni Jeremaia, ✡ 2.King 23.36–24.6; 2.Kron 36.5-7 2 “Kopwe feila ren ekewe chon leimwen Rekap, kopwe kapas ngeniir o emwenirela lon eu lein ekewe rumwen lon ewe imwenfel. Mürin kopwe aünü ngeniir wain.” 3 Iei mine üa angei Jasania nöün Jeremaia we mwän, nge Jeremaia nöün Hapasinia, i me pwin kewe me nöün kewe mwän meinisin, iei unusen chon leimwen Rekap. 4 Iwe, üa emwenirela ngeni imwen ewe Samol mi Lapalap lon rumwen nöün Hanan kewe mwän ewe aramasen Kot, nge Hanan nöün Iktalia. Ei rum a kan ngeni rumwen ekewe nöüwis o nom asen rumwen Maseia nöün Salum we mwän, ewe mi wisen mamasa ewe asamalap. 5 Mürin üa iseis fän mesen ekewe chon leimwen Rekap rume mi ur ren wain me kap o üreniir, “Oupwe ün ei wain.” 6 Nge ir ra pälüeni, “Äm aisap fokun ün wain, pun Jonatap semelapem we nöün Rekap we mwän a allük ngenikem, ‘Ousap fokun ün wain, ämi me mwirimwirimi kewe. 7 Ousap aüetä imwemi, ousap amwora pwükil ika fotuki irän wain. Nge oupwe nonom lon imw mangaku lon unusen ränin manauemi, mürin oupwe manauatam me lon ewe fanü ia oua siamü ie.’ 8 Äm aia aleasochisi alon Jonatap semelapem we lon meinisin mine a allük ngenikem. Äm aisap ün wain lon ränin manauem meinisin, äm me pwülüem kewe, pwal nöüm mwän ika fefin. 9 Äm aisap pwal aüetä imwem pwe aipwe nonom lon. Esap wor äm tanipin wain, esap pwal wor fanüem ika fotäm pwükil. 10 Nge äm aia nom lon imw mangaku, aia pwal aleasochis o föri meinisin mine Jonatap semelapem we a allük ngenikem. 11 Nge lupwen Nepukatnesar ewe kingen Papilon a feito pwe epwe maun ngeni ewe fanü, äm aia tipeeufengen pwe aipwe feila Jerusalem, pun aia niuokusiti ekewe sounfiun Papilon me ekewe sounfiun Siria. Iei popun äm aia nom lon Jerusalem.”

12 Mürin ewe Samol mi Lapalap a kapas ngeni Jeremaia, pwe epwe feila o üreni ekewe chon Juta me chon Jerusalem, 13 “Iei alon ewe Samol mi Unusen Manaman, ewe Koten Israel: Pwota ousap mochen angei ai öüröür o aleasochis ngeni ai kewe kapas? 14 Iwe, Jonatap nöün Rekap we mwän a allük ngeni nöün kewe mwän pwe resap ün wain. Ir ra tümwünü ei allük, pun resap ün wain tori ikenai pokiten ar aleasochisi än semelaper we allük. Ngang üa kapas ngenikemi fän chomong, nge ämi ousap aleasochisiei. 15 Üa soun tinala remi nei chon angang meinisin ekewe soufos pwe repwe ürenikemi, pwe oupwe en me kul seni an lapalap mi ngau o siwili an föför, ousap pwal fel ngeni pwal ekoch kot o angang ngeniir. Mürin, oupwe imweimw lon ewe fanü üa ngenikemi me ämi kewe lewo. Nge ämi ousap aleasochis ika aüselingaei. 16 Mwirimwirin Jonatap kewe ra aleasochisi ewe allük semelaper we a ngeniir. Nge ämi nei aramas ousap aleasochisiei. 17 Iei mine ngang ewe Samol mi Unusen Manaman, ewe Koten Israel üa apasa: Üpwe awarato womi, ämi chon Juta me chon Jerusalem, ekewe feiengau meinisin üa fen apwüngawu ngenikemi. Üpwe föri ei, pokiten üa fen kapas ngenikemi, nge ousap aüseling, üa fen kökkörikemi, nge ousap päpälüen.”

18 Mürin Jeremaia a kapas ngeni ekewe chon leimwen Rekap, “Iei alon ewe Samol mi Unusen Manaman, ewe Koten Israel: Pokiten oua aleasochis ngeni än Jonatap semelapemi we allük, oua pwal tümwünü an kewe öüröür meinisin o föri meinisin mine a allük ngenikemi, 19 iei mine ngang ewe Samol mi Unusen Manaman, ewe Koten Israel üa pwon pwe epwe wor fochofoch eman mwirimwirin Jonatap nöün Rekap we mwän epwe angang ngeniei.”