1 Iwe, Setekia nöün Josia we mwän, ätewe Nepukatnesar ewe kingen Papilon a awisa pwe epwe king lon ewe fanü Juta, a siwili Jehoiachin nöün Jehoiakim we mwän lon wisan wisen king. ✡ 2.King 24.17; 2.Kron 36.10 2 Nge Setekia me nöün kewe nöüwis pwal aramasen ewe fanü resap aüselinga mine ewe soufos Jeremaia a üreniir fän alon ewe Samol mi Lapalap.

3 Iwe, ewe king Setekia a tinala Jehukal nöün Selemia we mwän me ewe souasor Sefania nöün Maseia we mwän ren ewe soufos Jeremaia o üreni, “Kopwe iotek fän item ngeni ewe Samol mi Lapalap äm we Kot.” 4 Lon ewe fansoun Jeremaia a chüen fetalfeil lein ekewe aramas, pun esamwo koturulong lon imwen fötek. 5 Iwe, nöün Farao mwichen sounfiu ra feiliwu seni Isip. Nge lupwen ekewe sounfiun Papilon mi pwelifeili Jerusalem fän pisekin maun ra rong usun, ra sü seni Jerusalem.

6 Mürin, ewe Samol mi Lapalap a kapas ngeni ewe soufos Jeremaia, 7 “Kopwe üreni ewe kingen Juta mi tinukoto rei, pwe iei alon ewe Samol mi Lapalap, ewe Koten Israel, ‘Nöün Farao mwichen sounfiu mi feito pwe repwe alisikemi repwele liwinsefäliti Isip lon poputän fanüer. 8 Nge ekewe sounfiun Papilon repwe liwinto o maun ngeni ei telinimw, repwe liapeni o kenala. 9 Ngang ewe Samol mi Lapalap üa üra: Ousap püsin atupukemi ren ämi apasa pwe ekewe sounfiun Papilon resap chüen liwinto, pun repwe chök liwinto. 10 Are oupwe fen akufu unusen ewe mwichen sounfiun Papilon mi maun ngenikemi, nge epwe chök wor ekoch me leir mi kinas mi nom lon imwer imw mangaku, ir repwe ütä o kenala ei telinimw.’ ”

11 Iwe, mürin än ewe mwichen sounfiun Papilon sü seni Jerusalem pokiten nöün Farao mwichen sounfiu ra waroto, 12 Jeremaia ekärän towu seni Jerusalem pwe epwe feila ngeni ewe fanü Peniamin, pwe epwe angei inetin me won saman me ikenan. 13 Lupwen a tori ewe Asamalapen Peniamin, ewe meilapen mwichen chon mas itan Iria nöün Selemia we mwän, nge Selemia nöün Hanania, a turufi Jeremaia o üra, “En ka mochen sü ngeni ekewe chon Papilon.” 14 Nge Jeremaia a üra, “Ese pwüng. Ngang üsap mochen sü ngeni ekewe chon Papilon.” Nge Iria esap mochen aüseling ngeni. A turufi Jeremaia o emwenala ren ekewe nöüwis. 15 Iwe, ekewe nöüwis ra fokun song ngeni Jeremaia, ra wichi o kalapusei lon imwen Jonatan ewe seketeri, pun imwan a siwil ngeni eu imwen fötek.

16 Iwe, ra atolonga Jeremaia lon eu rumwen fötek mi nom fän pwül, iwe a nonom ikenan fansoun langatam. 17 Mürin, ewe king Setekia a titi Jeremaia o etiwa i. Iwe, a kapas ais ngeni lemonomon me lon imwan o üra, “Ifa usun, mi wor eu kapas seni ewe Samol mi Lapalap?” Nge Jeremaia a pälüeni, “Mi wor. Kopwe tolong lepöün ewe kingen Papilon.” 18 Mürin, Jeremaia a aisini ewe king Setekia, “Met ai tipis ngonuk me noum kewe nöüwis ika ngeni ekei aramas, pwe oua aturueilong lon ewe imwen fötek? 19 Ikafair nöümi kewe soufos ra osuni ngenikemi o üra, ‘Ewe kingen Papilon esap feito pwe epwe maun ngenikemi me ei fanü?’ 20 Iei mine üa tüngor ngonuk, en ai samol ewe king, kopwe aüselingaei. Kopwe etiwa ai tüngor pwetete ngonuk, pwe kosap chüen tinisefälieila lon ewe imwen fötek mi nom lon imwen Jonatan ewe seketeri, pwe üsap mäla ikenan.” 21 Mürin, ewe king Setekia a awora eu allük pwe Jeremaia epwe lokkolong lon ewe lenien chon mas. Ra pwal ngeni efoch pilawa seni ewe lenien um pilawa iteiten rän tori pilawa meinisin me lon ewe telinimw a itela. Iei usun Jeremaia a nonom lon ewe lenien chon mas.