1 “Nengeni, mesei a fen küna ekei mettoch meinisin,

selingei a fen rongorong, nge üa weweöch ren.

2 Mine oua silei, ngang üa pwal silei,

ngang üsap kis fami.

3 Nge ngang üpwe kapas ngeni Ewe mi Unusen Manaman,

üa mochen pwüngüpwüngfengen me Kot won mine a fis ngeniei.

4 Nge me remi, ämi oua aöchü mettoch ren ämi kapas chofana,

ämi meinisin oua usun sousäfei esap wor lomotemi.

5 Amwo ämi oupwe fanafanala. Ren ei oupwe tipachem.

6 Iei oupwe rongorong ai kewe kapasen eii,

oupwe aüselinga ai kewe kapasen tüngor.

7 Ifa usun, oupwe kapas mwäl fän iten Kot

o eäni kapas atuputup fän itan?

8 Ifa usun, oua mochen peni Kot ren ämi lifilifil ngeniei,

ika oupwe chon alisi Kot lon kapwüng?

9 Are Kot epwe etittinakemi, ifa usun, epwe küna och mi mürina remi?

Ika oua tongeni atupu i, usun oua atupu aramas?

10 Epwe fokun apwüngükemi,

are oua lifilifil lemonomon.

11 Ifa usun, an manaman esap aniuokusukemi,

nge an eniweniw esap feitiu womi?

12 Ämi kapasen mwiitun ra lomotongau usun chök falang,

nge ämi chönükükemi a apwangapwang usun chök pwülüpar.

13 Oupwe fanafanala o mwüt ngeniei pwe üpwe kapas,

inamwo ika met epwe fis ngeniei.

14 Ngang üa molotä pwe üpwe fangala manauei.

15 Inamwo ika Kot epwe nieila, üpwe chök anomu ai apilükülük won.

Nge üpwe fokun alletätä ai kewe föför me fän mesan.

16 A tongeni fis pwe ai pwora epwe amanauaei,

pun esap wor eman aramasangau epwe tongeni feito fän mesen Kot.

17 Oupwe fokun aüselinga ai kewe kapas,

oupwe aü selingemi ngeni mine üpwe aiti ngenikemi.

18 Iei üa molotä pwe üpwe pwärätä usi,

pun üa silei pwe üa pwüng.

19 Iö epwe tongeni atipisiei?

Ika epwe wor eman, mürin üpwe fanafanala o mäla.

20 Ai Kot, kopwe chök mwüt ngeniei ruu mettoch,

mürin üsap aopaei seni fän mesom:

21 Kopwe asü poum seniei

o ükütiu le aniuokusuei ren om eniweniw.

22 Mürin kopwe kökköriei, nge ngang üpwe pälüeni.

Ika kopwe mwüt ngeniei pwe üpwe kapas, nge en kopwe pälüeniei.

23 Ifa ükükün ai kewe föföringau me ai kewe tipis üa föri?

Kopwe asile ngeniei ai kewe pupungau me ai kewe tipis.

24 Pwota ka aopala mesom seniei

o atolongaei lon tettelin chon oputom?

25 Ifa usun, kopwe aniuokusuei?

Ngang üa chök wewe ngeni echö chön irä mi äsfeil.

Ika kopwe tapweri fetilipwas?

26 Pun ka awora kapasen tip ngeniei mi fokun weires,

ka ngeniei liwinin ai kewe föföringau üa föri lealüali.

27 Ka anüküchara pechei lefilen irä

o mamasafichi ai kewe föför meinisin,

ka fen föri aükükün rasen ipwei. ✡ Hiop 33.11

28 Iei popun inisi a pweila usun mwüch mi kirou,

pwal usun echö üf a tala ren pwötür.”