1 Ifa usun, ka silei fansoun uputiuen ekewe kuuchen won chuk?

Ifa usun, ka katol än ekewe chia nöünöütiu?

2 Ifa usun, ka tongeni aleani ükükün maramen ar pwopwo,

ika ka silei fansoun ar repwe nöünöü?

3 Ifa usun, ka silei fansoun ar konola o nöünöüla,

ika fansoun ar ngasala seni ar metekin nöünöü?

4 Apaner ra pöchökülela o mämäritä lemäl.

Ra feila, nge resap chüen liwinsefäl ngeni inelaper.

5 Iö a apichi föfön ewe aas mi mwacho

o mwüt ngeni pwe epwe fetalfeil?

6 Ngang üa ngeni ewe aas ewe fanüapö pwe fanüan,

o mwüt ngeni pwe epwe nom lon ewe maasies ia a wor salt ie.

7 A oput akürangen lon ekewe telinimw,

esap pwal rongorong ngeni än ewe chon wawa man apwas.

8 A atöpafetal won ekewe chuk

o kütfeil anan fetil.

9 Ifa usun, ewe ätemwänin kow mi mwacho a mochen angang ngonuk?

Ifa usun, a mochen annut lon om imwen man?

10 Ifa usun, ka tongeni ri ngeni säl pwe epwe tuw pwül,

ika epwe tongeni nuki ewe minen kata pwül lon om mälämäl?

11 Ifa usun, kopwe anomu om apilükülük won pokiten watten an pöchökül

o lükü ngeni pwe epwe föri om angang weires?

12 Ifa usun, ka apilükülükü pwe epwe uwato kiniom wiich

o ionato ngeni om lenien wichiwich umwun wiich?

13 Pöükässin ewe machang itan ostrik ra müttir le asipupu,

nge esap tongeni äs usun eman öröpwech.

14 Ewe ostrik a likiti sokulan won pwül

pwe repwe pwichikar me won.

15 A manlükala pwe pechen eman aramas a tongeni puriir,

nge eman manmwacho a tongeni amökküür.

16 A rochongau ngeni apanan kewe, usun chök nge itä sap nöün.

Esap fokun ekieki ika an angang weires a lomotongau.

17 Ei a fis pokiten Ngang üsap fang ngeni tipachem,

üsap pwal ngeni mirit.

18 Nge lupwen a popuetä le sä,

a takiri ewe oris me ewe chon wawa.

19 Ifa usun, Hiop, en ka ngeni eman oris pöchökülan?

Ifa usun, en ka awora ülöülen won üan?

20 Ifa usun, en ka amwetemweta pwe a mwetemwet usun lifichimas

o aniuokusu aramas ren torotoran?

21 A föri rasen ipwan me lon ewe lemol,

o säla ngeni maun fän unusen an pöchökül.

22 Esap sile niuokus, esap pwal rükö,

esap timär seni ketilas.

23 Ewe lenien föün esefich a akürang me lepekin,

nge ekewe siles me ekewe lifötüföt ra molupolup.

24 A chechech fiti mwasangasang o müttir säla,

esap tongeni üla lupwen ewe rappwa a tik.

25 Nge lupwen ewe rappwa a tik, a apasa, ‘Aha!’

A tini pwonnen maun seni toau,

a pwal rongorong än ekewe meilap akapwas me ewe mweireiren maun.

26 Ifa usun, ewe kawakaw a kaiö senuk usun an epwe äs

o ameresala pöükässin ngeni ör.

27 Ifa usun, ewe ikel a ässitä fän om allük

o föri fasan wilitekia?

28 A imweimw won ewe achau

o föri lenian won pwangen achau mi uluulukenitä.

29 Seni ikenan a ouwasachafetalei mine epwe liapeni,

mesan a küna me toau.

30 Ewe ikel a nom won ewe ia a wor mi mäla ie.

Apanan kewe ra ün cha.” ✡ Mat 24.28; Luk 17.37