1 Iwe, ewe Samol mi Lapalap a kapas ngeni Sona fän aruuan o üreni, 2 “Kopwe ütä o feila Ninifa ewe telinimw mi lapalap, pwe kopwe aronga ngeni aramasen lon ewe pworaus üa aiti ngonuk.” 3 Iei mine Sona a aleasochis ngeni ewe Samol mi Lapalap o feila Ninifa. Iwe, Ninifa eu telinimw mi fokun watte, pun ükükün toauen ach fetal seni epek tori epek ülüngat rän. 4 Iwe, Sona a tolong lon ewe telinimw ükükün fetalin eu rän. Iwe, a kökö, “Mürin faik rän Ninifa epwe tala.” 5 Iwe, ekewe chon Ninifa ra lükü än Kot we kapas. Ra arongafeili pwe aramas meinisin seni ekewe aramas tekia tori ekewe aramas kis repwe echikefel o üföüf üf seni tuk, pwe asisilen ar ekieksefäl. ✡ Mat 12.41; Luk 11.32

6 Nge lupwen ewe pworaus a tori ewe kingen Ninifa, a ütä seni an lenien motun king, a pwilitawu üfan üfen king o üföüf üf seni tuk, a pwal mot lon falangen ekkei. 7 Iwe, ewe king a aronga eu kapasen asilesil ngeni chon Ninifa, “Iei än ewe king me nöün kewe nöüwis allük: Esap wor eman aramas are man epwe tongeni mongö are ünümi och. 8 Nge aramas tori man meinisin repwe üföüf üf seni tuk. Aramas meinisin repwe kechü ngeni Kot fän leüömong. Ewer, eman me eman epwe likitala an lapalap mi ngau me an föför esepwüng. 9 Eli Kot epwe siwili an ekiek o likitala an song mi fokun watte, pwe sisap mäfeiengau?” 10 Iwe, lupwen Kot a küna ar ekieksefäl me ar kul seni föförür mi ngau, a siwili an ekiek. Esap chüen ngeniir liwinin ar tipis usun a apasa epwe föri.