1 Iwe, ekewe aramasen Israel ra fen liapeni o fanüeni ewe fanü ötiuen ewe chanpupu Jortan seni ewe lemolun Arnon tori ewe chuk Hermon, pwal unusen ewe lemolun Jortan me peliötiu. Ra pwal akufu kingen ekei fanü. 2 Ra akufu Sihon ewe kingen chon Amor mi nom lon Hespon. A nemeni ewe fanü seni Aroer mi nom lepökütiwen ewe lemolun Arnon, pwal ewe telinimw lukalapen ewe lemol tori ewe chanpupu Japok kiännin fanüen chon Amon. Iei esopun Kiliat. 3 A pwal nemeni ewe lemolun Jortan tori ewe nomun Kaliläa me peliötiu, fetal ngeni Pet-jesimot, pwal tori ewe Setin Mäla ator ngeni fäsonun ewe chuk Piska me peliör. 4 Ra pwal akufu Ok ewe kingen Pasan, eman me lein ekewe mwirimwirin Refa mi chüen manau, a nom lon Astarot me Etrei. 5 A nemeni ewe chuk Hermon me Saleka me unusen ewe fanü Pasan tori kiännin fanüen chon Kesur me chon Makat, pwal esopun Kiliat tori kiännin fanüen Sihon ewe kingen Hespon. ✡ Num 21.21-35; Tut 2.26–3.11 6 Iwe, Moses nöün ewe Samol mi Lapalap we chon angang me ekewe aramasen Israel ra akufu ekei ruoman king. Nge Moses a ngeni chon ekewe ainangen Rupen me Kat pwal ewe esopun ainangen Manasa fanüer pwe repwe fanüeni. ✡ Num 32.33; Tut 3.12

7 Iwe, Josua me ekewe aramasen Israel ra akufu ekewe king meinisin mi nom pelilotoun ewe chanpupu Jortan seni Paal-kat mi nom lon ewe lemolun Lepanon tori ewe chuk Halak mi nom ör arap ngeni Etom. Iwe, Josua a ngeni ekewe ainangen Israel fanüer pwe repwe fanüeni lon ükükün en me inetin. 8 A ngeniir ewe fanü mi chukuchukutä me ewe fanü tekison, ewe lemolun Jortan me ewe fanü mi pal, ewe fanüapö me ewe fanü Nekep. Ekei fanü fanüen chon Hit, chon Amor, chon Kanaan, chon Peris, chon Hiw me chon Jepus. 9 Ikkei ir kingen ekewe telinimw Josua me ekewe chon Israel ra akufu: Ewe kingen Jeriko me ewe kingen Ai mi nom lükün Petel, 10 ewe kingen Jerusalem me ewe kingen Hepron, 11 ewe kingen Jarmut me ewe kingen Lakis, 12 ewe kingen Eklon me ewe kingen Keser, 13 ewe kingen Tepir me ewe kingen Keter, 14 ewe kingen Horma me ewe kingen Arat, 15 ewe kingen Lipna me ewe kingen Atulam, 16 ewe kingen Maketa me ewe kingen Petel, 17 ewe kingen Tapua me ewe kingen Hefer, 18 ewe kingen Afek me ewe kingen Lasaron, 19 ewe kingen Maton me ewe kingen Hasor, 20 ewe kingen Simron-meron me ewe kingen Aksaf, 21 ewe kingen Tanak me ewe kingen Mekito, 22 ewe kingen Ketes me ewe kingen Jokneam lon Karmel, 23 ewe kingen Tor lon Nafat-tor me ewe kingen Koiim lon Kaliläa 24 pwal ewe kingen Tirsa. Iwe, iteiten ekewe king meinisin ükükün ilik me eman.