Kölün kechü
Kapas akom
I. Iten ei puk: Kölün kechü, pun mine a mak lon, an Jeremaia kechüäsini talan Jerusalem.
II. Chon makei ei puk: Jeremaia
III. Itelapemongen ei puk: Än Kot ümöümöch esap mwüch, inamwo ika a apwüngü aramas pokiten ar föföringau.
IV. Kapas aüchean ei puk: Lupwen Jeremaia a pwärätä än chon Juta tipis, a fis an apilükülüköch.
V. Masouen ei puk Kölün kechü: Lon ei puk a mak limu kölün kechü pokiten talan Jerusalem, me än ekewe aramasen lon oola. Ei a fis lon ewe ier 586 mwen Kraist (B.C.) Inamwo ika lon ei puk a mak chomong kapasen lolilen me letipeta, nge a pwal wor kapas usun ach lükü Kot me apilükülöch lon ekewe fansoun repwe feito. Ekewe chon Juta ra eäni ekei kölün kechü lon ar fel lon ewe ränin ar echikefel me letipeta iteiten ier, lupwen ra chechemeni talan Jerusalem.
VI. Tettelin masouen ei puk:
Riaföün me osukosuken Jerusalem 1.1-22
Feiengauen Jerusalem eu apwüng seni ewe Samol mi Lapalap 2.1-22
Än ewe soufos riaföü me apilükülüköch 3.1-66
(Jeremaia a aliosunätä Jesus mi pwal kechüeiti Jerusalem Luk. 19.41)
Jerusalem a tala 4.1-22
Eu iotek ngeni Kot pwe epwe eäni ümöümöch 5.1-22
1
Än ekewe chon oola seni Jerusalem letipeta
1.1-22
1 Iei esap chüen masou ewe telinimw Jerusalem mi ur ren aramas me lom.
A fokun iteföüla me lein ekewe mwü, nge iei a usun chök eman fefin mi mä pwülüan.
I eman finesamol me lein ekewe telinimw, nge iei aramas ra nöüni amanau.
2 A selingüngü lepwin, chönün mesan ra suputiu won sapan.
Esap wor eman me lein chokewe mi tongei me lom a achipa.
Chiechian kewe meinisin ra kirikiringau ngeni, ra wiliti chon oputan.
3 Chon Juta ra oola o nom lon riaföü me angang weires.
Ra nonom lein chon ekewe mwü, nge resap küna eu lenien asösö.
Chokewe meinisin mi tapweriir ra tokumweer, nge esap wor efoch al repwe tongeni süla won.
4 Ekewe al mi ale ngeni Sion ra pönüla, pun esap chüen wor eman mi fetal wor ngeni ekewe chulap mi kefil.
Ekewe asamalapen Sion meinisin ra pöla.
Nöün kewe souasor ra ngüngü, nöün kewe föpwül ra nom lon riaföü,
nge ewe telinimw a fokun weires lon an riaföü.
5 Chon oputen Sion ra fefeitä, ra aposu fän ar nemenem.
Ewe Samol mi Lapalap a atolonga lon riaföü pokiten chomongun an kewe tipis.
Nöün kewe ra feila ekis, ra oola ren chon oputan.
6 Ekewe ling meinisin ra sü seni Sion.
Nöün kewe samol ra usun chök chia resap küna anaia repwe mongö ie.
Ra sü me mwen ekewe chon tapweriir, nge esap wor ar pöchökül.
7 Lupwen Jerusalem a riaföü, a chechemeni an kewe pisek mi aüchea a eäni me lomlom.
Lupwen nöün kewe aramas ra sechilong lepöün chon oputan, esap wor eman mi alisi.
Ekewe chon oputan ra esita o takirin ämängaua pokiten an turula.
8 Jerusalem a fokun tipis, iei mine a wesewesen limengau.
Meinisin mi asamolu me lom ra turunufasei, pun ra küna lon an selela.
Ewer, püsin i a ngüngü o akulu mesan seniir.
9 An limengau a nom lon üfan, nge i esap ekieki an feiengau.
Iei mine an turula a fokun afeiengau, esap wor eman a achipa.
“Ai Samol mi Lapalap, kopwe nenengeni ai riaföü, pun ewe chon oputaei a win.”
10 Ekewe chon oputan ra angeala än Jerusalem pisek mi aüchea meinisin.
Ewer, a küna pwe chon ekewe mwü ra ipwelong lon ewe Imwenfel,
ir chokewe ewe Samol mi Lapalap esap mwüt ngeniir pwe repwe nonom lon an mwich.
11 Nöün kewe aramas meinisin ra ngüngü, lupwen ra kütta ener mongö.
Ra akasiwili ar kewe pisek mi aüchea ngeni mongö, pwe repwe tongeni manau.
Ewe telinimw a siö, “Ai Samol mi Lapalap, kopwe nengeni o küna pwe üa nom lon turunufas.”
12 “Ifa usun, ämi meinisin mi pwerela ünüki ousap ekieki usun ei feiengau?
Oupwe nenengeni o küna, ika mi wor och riaföü usun ei riaföü
ewe Samol mi Lapalap a atoto woi lon ewe ränin a fokun song ngeniei.
13 A tinato ekkei seni läng, a kü me leuti.
A anomu eu sär fän itei, pwe pechei epwe fif,
a aturueitiu lepwül.
A likitieila, üa uren metek fansoun meinisin.
14 Ewe Samol mi Lapalap a küna ai kewe tipis meinisin,
a rifengeniir o anomuur won afarei. Iwe, üa apwangapwangala ren chöür.
A asechieilong lepöün chon oputaei, nge üsap tongeni ü ngeniir.
15 Ewe Samol mi Lapalap a esita nei kewe sounfiu mi pwora meinisin mi nom rei.
A tinato eu mwichen sounfiu pwe repwe afeiengaua nei kewe alüal
Ewe Samol mi Lapalap a puri nei aramas, usun eman a puri föün irän wain.
16 Üa kechü pokiten ekei mettoch, chönün mesei a fokun watte supun.
Esap wor eman a nom pwe epwe achipaei, esap wor eman a apöchöküla lelukei.
Nei kewe ra fokun riaföü, pun ewe chon oputaei a akufuei.
17 Üa aitiewu pei, nge esap wor eman a alisiei.
Ewe Samol mi Lapalap a allük pwe chon oputaei repwe ü ngeniei.
Üa wiliti eu mettoch mi limengau me rer.
18 Ewe Samol mi Lapalap a pwüng, nge ngang üa aleasolap ngeni an kapas.
Oupwe aüseling, ämi chon ekewe mwü meinisin, oupwe nenengeni ai riaföü.
Nei kewe föpwül me nei kewe alüal ra oola.
19 Üa kökköri peliei, nge resap mochen alisiei.
Nei kewe souasor me souakom ra mäfeiengau lon ewe telinimw,
lupwen ra kütta ener mongö pwe repwe tongeni manau.
20 Ai Samol mi Lapalap, kopwe nenengeni ai riaföü.
Leuti a fokun weires. Lelukei a tatakis, pun üa fokun tipis ngonuk.
A wor ninni won ekewe al, nge lon ekewe imw a wor mäla.
21 Aramas ra rongorong ai ngüngü, nge esap wor eman a achipaei.
Chon oputaei meinisin ra rongorong usun ai kewe feiengau. Ra pwapwa pwe ka föri iei usun ngeniei.
Kopwe awarato ewe rän ka fen pwonei, pwe chon oputaei repwe wewe ngeniei lon ai riaföü.
22 Ar kewe föför mi ngau repwe nom fän mesom.
Kopwe apwüngüür usun ka apwüngüei pokiten ai kewe tipis meinisin.
Üa ngüngü fän chomong, lelukei a apwangapwang.”