1 Iwe, lupwen Jesus a wes le kapas ngeni ekewe aramas usun ekei mettoch meinisin, a feila Kapernaum. 2 Mi wor eman meilapen sounfiu ikenan, a wor eman nöün chon angang a fokun aücheani. Ei chon angang a samau o arapakan ngeni an epwe mäla. 3 Lupwen ewe meilapen sounfiu a rong usun Jesus, a tinala ekoch souakomwen ekewe chon Juta, pwe repwe tüngor ngeni Jesus pwe epwe feito o apöchökülätä nöün we chon angang. 4 Iwe, lupwen ra feito ren Jesus, ra tüngormau ngeni o üreni, “A fokun fich ngeni ei mwän om kopwe alisi. 5 Ei mwän a tongei aramasach o aüetä ngeni kich ach imwen felikis.”

6 Iei mine Jesus a etiirela. Nge lupwen a arap ngeni ewe imw, ewe meilapen sounfiu a tinala chienan kewe ren Jesus pwe repwe üreni, “Ai samol, kosap osukosukok. Pun ngang üsap eman aramas mi aüchea ngeni om kopwe feito lon imwei, 7 ina mine ngang üse fen mwo ekiekin püsin feila reöm. Nge kopwe chök apasa och kapas, iwe, nei chon angang epwe pöchökületä. 8 Pun ngang eman mi pwal nom fan nemenien ekewe meilap seniei, nge mi pwal wor sounfiu ra nom fän nemeniei. Üa üreni eman, ‘Kopwe feila,’ iwe, a feila. Üa pwal üreni eman, ‘Kopwe feito,’ iwe, a feito. Üa üreni nei amanau, ‘Kopwe föri ien me ien,’ iwe, a föri.”

9 Iwe, lupwen Jesus a rongorong ekei kapas, a mairü ren. A sap ngeni ewe mwichen aramas mi tapweto mürin o üreniir, “Üa ürenikemi, üsamwo fen küna ei sokun lükülük lon Israel.” 10 Iwe, lupwen ekewe chon künö ra liwinsefälila lon imwen ewe meilapen sounfiu, ra küna pwe ewe chon angang a fen pöchökületä.

11 Iwe, ekis fansoun mürin, Jesus a feila lon eu telinimw itan Nain, nge nöün kewe chon kaiö me eu mwichen aramas mi chomong ra pwal eti. 12 Lon ewe chök otun, lupwen a tori asamen tittin ewe telinimw, aramas ra ekiewu eman somä, ina i chök nöün eman fefin mi fen mä pwülülan. Iwe, eu mwichen aramas mi chomong ra eti. 13 Lupwen ewe Samol a küna ewe fefin, a fokun tongei. Iwe, a üreni, “Kosap kechü.” 14 Iwe, Jesus a feiliti ewe pwor ewe somä a nom lon o atapa, nge ekewe aramas mi eki ewe pwor ra köüla. Iwe, Jesus a apasa, “Nei alüal, üa ürenuk, kopwe pwätä.” 15 Iwe, ewe mi mäla a pwätä o popuetä le kapas. Mürin Jesus a ngenisefäli inan.

16 Iwe, aramas meinisin ra uren niuokus, ra mwareiti Kot o apasa, “Eman soufos mi lap a pwä lefilach. Kot a feito pwe epwe amanaua nöün aramas.” 17 Ei pworaus usun Jesus a chöfetal lon unusen ewe fanü Jutea me ekewe fanü mi nom ünükün.

18 Iwe, lupwen nöün Johannes kewe chon kaiö ra apworausa ngeni usun ekei mettoch meinisin, a köri ruoman me leir 19 o tiniirela ren ewe Samol, pwe repwe aisini, “En ewe eman epwe wareto, are sipwe witiwiti pwal eman?” 20 Iwe, lupwen ar tori Jesus, ra üreni, “Johannes Soupapatais a tinikeemito reöm, pwe aipwe aisinuk ika en ätewe a kapas usun pwe epwe wareto, ika sipwe witiwiti pwal eman?”

21 Lon ena otun Jesus a apöchökülätä chomong aramas seni sokopaten ar samau me apwangapwang o alisi chokewe mi wor ngününgau wor, a pwal aneloi mesen chomong mi mesechun. 22 Iwe, Jesus a pölüeni nöün Johannes kewe chon kaiö, “Oupwe liwinsefälila o üreni Johannes mine oua küna o rongorong: Ekewe mi mesechun ra küna mwer, ekewe mi pechemä ra fetal, ekewe mi üriir rupun pwötür ra chikarsefäl, ekewe mi selingepüng ra rongorong, ekewe mi mäla ra manauetä, nge ekewe mi wöüngau ra rongorong afalafalen ewe Pworausen Manau. ✡ Ais 35.5-6; 61.1 23 Ra feiöch chokewe resap tipemwaramwar rei.”

24 Mürin än nöün Johannes chon kaiö feila, Jesus a popuetä le kapas ngeni ewe mwichen aramas usun Johannes, “Lupwen oua feila ren Johannes lon ewe fanüapö, met oua ekieki oupwe nengeni? Efoch äsät mi mwaroro ren asepwäl? 25 Met chök oua feila ren pwe oupwe nengeni? Eman mwän mi üföüf üf mi pwetete o mürina? Ekewe aramas mi üföüf ei sokun üf o manau fän mecheres ra nonom lon imwen king. 26 Oupwe üreniei, met echök oua feila ren pwe oupwe nengeni? Eman soufos? Ewer, nge oua fen küna eman mi lap seni eman soufos. 27 Pun Johannes ätewe ekewe Toropwe mi Pin ra kapas usun: ‘Nengeni, üpwe tinala nei chon künö epwe akomwola mwomw, epwe amolätä efoch al fän itom.’ ✡ Mal 3.1 28 Üpwe ürenikemi, Johannes a lap seni aramas meinisin mi uputiu won fanüfan. Nge iön mi kisikis seni meinisin lon Mwün Kot a fen lap seni Johannes.”

29 Iwe, ekewe aramas meinisin, pwal mwo nge ekewe chon ioni takises ra rongorong än Jesus kapas, ra aleasochisi än Kot kewe allük, pun ra papatais ren Johannes. 30 Nge ekewe Farisi me ekewe Sensen Allük resap etiwa än Kot akot fän iter, pun resap mochen ar repwe papatais ren Johannes. ✡ Mat 21.32; Luk 3.12

31 Iwe, Jesus a pwal apasa, “Met üpwe tongeni awewe ngeni ei pilon aramasen ikenai? Met repwe wewe ngeni? 32 Ra wewe ngeni ekewe semirit mi mot lon ekewe lenien amömö. Eu mwich a kökkö ngeni pwal eu mwich, ‘Äm aia ettiki aangün ngenikemi, nge ämi ousap pworuk. Äm aia köl kölün lolilen, nge ämi ousap kechü!’ 33 Johannes Soupapatais a feito, a echikefel, esap pwal ün wain, nge ämi oua apasa, ‘Mi wor eman anün rochopwak won.’ 34 Nöün Aramas a feito, a mongö o ün, nge ämi oua apasa, ‘Ou nengeni ei mwän! I eman mi mongömong o ünümong, eman mi chiechi ngeni ekewe chon ioni takises me chon tipis.’ 35 Än Kot tipachem a pwäla pwe a let ren chokewe mi etiwa.”

36 Iwe, eman lein ekewe Farisi a tüngor ngeni Jesus pwe epwe eti le mongö. Iwe, Jesus a feila lon imwan o a mottiu pwe epwe mongö. 37 Lon ei telinimw a wor eman fefin mi tipis, a rong pwe Jesus a mongö lon imwen ewe Farisi. Neminei a uwei eu lö lon eu rume seni ewe fau itan alapaster. 38 Iwe, a feito lükisökürün Jesus o fotopwäsuketiu arun pechen, a kechü o asupwätiu chönün mesan won pechen Jesus. Mürin a talüpwasei pechen Jesus ren meten möküran, a mitiri pechen o ninätiu ewe lö won. ✡ Mat 26.7; Mark 14.3; Joh 12.3 39 Lupwen ewe Farisi mi köri Jesus pwe epwe mongö ren a küna ei, a ekieki lon lelukan, “Are ei mwän wesewesen eman soufos, epwe silei iön ewe fefin a atapa. Epwe silei pwe i eman fefin mi tipis.” 40 Iwe, Jesus a üra, “Simon, üa mochen kapas ngonuk won och mettoch.” Simon a pölüeni, “Ewer sense, kopwe üreniei.”

41 Iwe, Jesus a popuetä le kapas, “Mi wor ruoman mwän mi liwinimang moni seni eman mwän mi wor nöün monien paro. Eman a liwinimang limepükü föün moni silifer, nge pwal ewe eman a liwinimang lime. 42 Ir me ruoman resap tongeni mönätiu ar kewe liwinimang, iei mine ätewe a chök amusala ar kewe liwinimang. Iö leir epwe kon echeni ätewe?” 43 Simon a pölüeni, “Üa ekieki pwe ewe eman a kon watte an liwinimang a musola.” Iwe, Jesus a üreni, “Mi pwüng mine ka apasa.” 44 Mürin Jesus a kulu ngeni ewe fefin o üreni Simon, “Ka küna ei fefin? Ngang üa tolong lon imwom, nge kosap ngeniei koluk pwe tötölün pechei. Nge neminei a talü pechei ngeni chönün mesan o talüpwasei ngeni meten möküran. 45 Iwe, en kosap etiwaei ren eu mitimit, nge neminei esap ükütiu le mitiri pechei seni chök otun ai tolong lon imwom tori iei. 46 En kosap epiti mökürei ngeni löpwokus, nge neminei a epiti pechei ngeni löpwokus. 47 Iei mine üa ürenuk, pokiten an kewe tipis mi chomong ra musola, iei popun an echeniei a fokun watte. Nge are än eman amusamusen tipis a kisikis, an eäni chen a pwal kisikis.” 48 Mürin Jesus a üreni ewe fefin, “Om tipis kana ra musola.” 49 Iwe, ätekewe mi eti Jesus le mot ngeni chepel ra kapasfengen lefiler, “Iö ätei pwe a mwo nge amusala tipis?” 50 Nge Jesus a üreni ewe fefin, “Om lükülük a amanauok. Kopwe feila fän kinamwe.”