1 Iwe, Jesus a tötä won efoch wa o liwinsefäliti pekilan ewe noom ngeni püsin an telinimw. 2 Ekoch aramas ra ekieto ren eman mwän mi mwök won an peet. Lupwen Jesus a küna ar lükülük, a üreni ewe mwän mi mwök, “Nei, kopwe apilükülük! Om tipis kana ra musala.” 3 Mürin ekoch ekewe Sensen Allük ra ekieki lon leluker, “Ei mwän a eäni kapasen turunufas!” 4 Nge Jesus a silei ar ekiek o üreniir, “Pwota oua ekieki ei sokun ekiek mi ngau lon lelukemi? 5 Meta a mecheres, ai apasa, ‘Om tipis kana ra musala,’ are ai apasa, ‘Kopwe ütä o fetal?’ 6 Iwe, ngang üpwe alükülükü ngenikemi, pwe Nöün Aramas a wor an pwüüng won fanüfan an epwe amusala tipis.” Iei mine a üreni ewe mwän mi mwök, “Kopwe ütä, angei kiom o feila lon imwom.” 7 Mürin ewe mwän a ütä o feila lon imwan. 8 Iwe, lupwen ewe mwichen aramas a küna mine a fis, ra niuokus o mwareiti Kot ren an ngeni aramas ei sokun manaman.

9 Iwe, lupwen Jesus a sopwela an sai seni ikenan, a küna eman chon ioni takises itan Mateus, a mot lon an ofes. Iwe, a üreni, “Kopwe tapweto müri.” Mateus a ütä o tapwela mürin Jesus. 10 Iwe, a fis pwe Jesus a mot ngeni mongö lon imwen Mateus, nge chomong chon ioni takises me chon tipis ra feito o eti Jesus me nöün kewe chon kaiö le mongö. 11 Lupwen ekewe Farisi ra küna ei, ra üreni nöün kewe chon kaiö, “Pwota nöümi we sense a mongöfengen me ekewe chon ioni takises me chon tipis?” 12 Jesus a rongorong ar kei kapas o üreniir, “Eman sousafei esap lomot ngeni aramas mi pöchökül, pwe a lomot ngeni chök ekewe chon samau. 13 Oupwe feila o kütta wewen ei kapas lon ewe Toropwe mi Pin, ‘Üa mochen pwe aramas repwe eäni tong enlet, nge sap ar repwe asor man ngeniei.’ Ngang üsap feito pwe üpwe kökköri ekewe chon pwüng, pwe fen ekewe chon tipis.”

14 Mürin nöün Johannes Soupapatais kewe chon kaiö ra feito ren Jesus o aisini, “Pwota äm chök me ekewe Farisi aia echikefel fän chomong, nge noumw kewe chon kaiö resap fokun echikefel?” 15 Jesus a pölüeniir, “Ifa usun, oua ekieki pwe ekewe chon kökkö ngeni fetallapen apwüpwülü ra letipeta lupwen ewe mwän apwüpwülü söfö a nom rer? Apw! Nge epwe war ewe rän lupwen aramas repwe angei seniir ewe mwän apwüpwülü söfö fän pöchökül, lon ena otun repwapw echikefel. 16 Esap wor eman aramas epwe teiätä ekam mangaku mi fö won echö üf mi mes, pun ewe ekam mangaku mi fö epwe nürfengen o afisätä pwe kamwen ewe üf epwe wattela. 17 Esap pwal wor eman a alölöülong wain mi fö lon pör mi mes seni silin man, pun ekewe pör repwe mökküla o ewe wain epwe nitiu, nge ekewe pör repwe fokun tala. Pun a öch pwe wain mi fö epwe nom lon pör mi fö, pwe ir me ruu repwe nükünüköch.”

18 Iwe, lupwen Jesus a chüen kapas ngeniir, eman nöüwis a feito ren, a fotopwäsuk mwan o üreni, “Nei we nengin a chök mäla iei, nge kopwe feito o iseis poumw won, pwe epwe manau.” 19 Iwe, Jesus a ütä o etala, nge nöün kewe chon kaiö ra pwal eti.

20 Iwe, eman fefin mi riaföü ren an samaun fefin lon ükükün engol me ruu ier a feito me lükisökürün Jesus o atapa lepwülün üfan. 21 Pun a ekieki lon lelukan, “Are üpwe chök atapa üfan nan, üpwe pöchökületä.” 22 Iwe, Jesus a kul, a küna neminewe o üreni, “Nei, kopwe apilükülük, om lükülük a apöchökülok.” Lon ewe chök otun ewe fefin a pöchökületä.

23 Mürin Jesus a feila lon imwen ewe nöüwis. Nge lupwen a küna ekewe chon ettiki pisekin ettik won ewe mi mäla, pwal ekewe aramas mi ngüngüres o kechü, 24 a üreniir, “Ämi meinisin oupwe towu me ikei! Ewe nengin esap mäla, pwe a chök möür!” Mürin ir meinisin ra takiri. 25 Nge lupwen ekewe aramas ra towu lükün, Jesus a tolong lon rumwen ewe nengin, a amwöchü pöün, iwe, ewe nengin a pwätä. 26 Iwe, ei pworaus a chöfetal won unusen ewe fanü.

27 Lupwen Jesus a feila seni ewe leni, ruoman mwän mi mesechun ra tapwela mürin. Ra kökkö ngeni fän leüömong, “Nöün Tafit, kopwe tongekem!” 28 Iwe, lupwen Jesus a tolong lon ewe imw, ekewe ruoman chon chun ra tolong ren. Jesus a aisiniir, “Oua lükü pwe ngang üa tongeni aneneloi mesemi?” Ir ra pölüeni, “Ewer, äm samol.” 29 Mürin Jesus a atapa meser o apasa, “Epwe fis ngenikemi mine oua lükü.” 30 Iwe, a nenela meser. Nge Jesus a fokun pese ngeniir, pwe resap üreni eman mine a fis. 31 Nge ir ra feila o asilefeili ewe pworaus usun Jesus lon unusen ewe fanü.

32 Iwe, lupwen ekewe ruoman mwän ra feila, ekoch aramas ra uwato ren Jesus eman mwän mi awemwöch, pokiten eman anün rochopwak a wäni. 33 Lon ewe chök otun Jesus a atowu ewe anün rochopwak seni ewe mwän, ei mwän a popuetä le kapas. Iwe, ekewe aramas meinisin ra mairü o apasa, “Ousisamwo küna och usun ei lon Israel.” 34 Nge ekewe Farisi ra apasa, “Ewe samolun anün rochopwak a ngeni ätei an manaman pwe epwe asüela ekewe anün rochopwak.” ✡ Mat 10.25; 12.24; Mark 3.22; Luk 11.15

35 Iwe, Jesus a fetalfeil lon ekewe telinimw me sopw meinisin. A aiti ngeni aramas kapasen Kot lon ekewe imwen felikis, a afalafala ewe Pworaus Allim usun ewe Mwün Kot o apöchöküla aramas mi eäni sokopaten samau me apwangapwang. ✡ Mat 4.23; Mark 1.39; Luk 4.44 36 Nge lupwen a küna ewe mwichen aramas, a fokun tongeer, pun ra nom lon watten osukosuk me weires usun sip kana esap wor nöür chon mas. ✡ Num 27.17; 1.King 22.17; 2.Kron 18.16; Is 34.5; Mark 6.34 37 Mürin Jesus a üreni nöün kewe chon kaiö, “Ewe räs a fokun watte, nge ekewe chon angangen räs ra chokükün. 38 Iei mine oupwe tüngorei ewe Samolun räs pwe epwe tinala chon angang pwe repwe angang ngeni ewe räs.” ✡ Luk 10.2