1 Iwe, ewe Samol mi Lapalap a üreni Moses, 2 “Kopwe allük ngeni ekewe aramasen Israel pwe repwe atowu iteiten aramas mi üri kilingau mi afeiengau seni ewe leni ia ra nonom ie, me iteiten aramas mi pu seni och chönü, pwal iteiten aramas mi limengau ren an torii eman somä. 3 Oupwe atorowu lükün ewe leni ia oua nonom ie, ese lifilifil ika mwän ika fefin, pwe resap alimengaua leniemi kewe, ewe ia üa nonom ie.” 4 Iwe, ekewe aramasen Israel ra aleasochis ngeni o atowu ekewe chon limengau lükün ewe ia ra nonom ie, usun ewe Samol mi Lapalap a üreni Moses.

5 Iwe, ewe Samol mi Lapalap a üreni Moses, 6 “Kopwe üreni ekewe aramasen Israel: Are eman aramas a föri och föför mi mwäl ngeni eman o atai an allükülük ngeni ewe Samol mi Lapalap ren, ewe aramas a tipis. 7 Iwe, epwe pwärätä an tipis a föri o aliwini unusen mine a mwäl won. Nge epwe pwal apachätä eu lelimu ngeni o aliwinisefäli ngeni ätewe a wor an mwäl ngeni. 8 Iwe, are ewe aramas a mäla, nge esap wor märärin mi tongeni angei mine ewe mi mwäl epwe aliwinisefäli, ewe mettoch epwe la ngeni ewe Samol mi Lapalap fän iten ewe souasor. Nge epwe pwal pach ngeni eman ätemwänin sip pwe ewe souasor epwe föri asoren amusamusen tipis fän itan. 9 Iwe, ekewe lifang mi pin meinisin ekewe aramasen Israel ra uwato ren ewe souasor repwe an. 10 Iteiten ekewe mettoch eman aramas a apini epwe än ewe souasor. Nge iteiten mettoch eman aramas a fang ngeni ewe souasor epwe pwal an.”

11 Iwe, ewe Samol mi Lapalap a kapas ngeni Moses, 12 “Kopwe üreni ekewe aramasen Israel: A tongeni fis pwe ekiekin lukomong a tolong lon leluken eman mwän pwe a öümöüm ngeni pwülüan. A ekieki pwe pwülüan a kirikiringau ngeni o püsin alimengaua ren än eman mwän kon ren. 13 Nge ewe mwän esap nien silei, pun ewe fefin a tukumala, esap pwal wor eman chon atipisi, pun esap wor eman a seretä wor. 14 A pwal tongeni fis pwe ekiekin lukomong a tolong lon leluken eman mwän pwe a öümöüm ngeni pwülüan, nge neminewe esap kirikiringau ngeni. 15 Lon ekei lapalap me ruu, ewe mwän epwe emwenato pwülüan we ren ewe souasor. Iwe, epwe uwato pwe eu asor fän iten neminewe ülüngat paun pilawa mi amas seni föün parli. Nge esap niniitä apüra won, esap pwal iseis apach mi pwokus won, pun ei eu asor seni eman mwän mi lukomong, eu asoren alelet, pwe mine a let epwe pwäla. 16 Iwe, ewe souasor epwe emwenato ewe fefin o anomu fän mesen ewe Samol mi Lapalap. 17 Mürin, ewe souasor epwe üfi koluk mi pin lon eu sepi mi för seni pwül, epwe pwal tukei ekis moromoren pwülün lon ewe imwenfel seni mangaku o uwalong lon ewe koluk pwe epwe maras. 18 Iwe, mürin ewe souasor epwe atomwa möküren ewe fefin o uwalong lon pöün ewe asoren alelet, iei ewe asoren lukomong. Nge ewe souasor epwe kamwöch lon pöün ewe koluk mi maras a atoto anümamau. 19 Mürin, ewe souasor epwe üreni ewe fefin pwe epwe tipeeu ngeni ewe pwon fän akapel i epwe eäni ngeni. Epwe apasa, ‘Are kosap lisowu ngeni eman o alimengauok lupwen om ei pwüpwülü, kosap feiengau ren ewe anümamau ewe koluk mi maras a atoto. 20 Nge are ka lisowu ngeni eman lupwen om ei pwüpwülü o püsin alimengauok, 21 (iei otun ewe souasor epwe atolonga ewe fefin fän anümamauen ewe pwon mi fis fän akapel, mürin epwe sopwela le fos), ewe Samol mi Lapalap epwe föri pwe aramasom repwe leaweni itom lon ar ottek, epwe pwal föri pwe kopwe rit, nge lukom epwe pwola. 22 Iwe, ei koluk mi atoto anümamau epwe tolong leutum pwe lukom epwe pwo, kopwe pwal rit.’ Iwe, ewe fefin epwe pälüeni, ‘Üa tipeeu ngeni. Epwe fis iei usun.’

23 Mürin, ewe souasor epwe makeetiu ekei kapasen anümamau lon eu puk o talü ekewe kapas lon ewe koluk mi maras. 24 Iwe, mwen an epwe aünü ngeni ewe fefin ewe koluk mi maras a atoto anümamau o afisätä metek mi weires, 25 ewe souasor epwe angei seni lepöün ewe fefin ewe asoren mongö, epwe assawa me fän mesen ewe Samol mi Lapalap o uwato ren ewe rongen asor. 26 Iwe, ewe souasor epwe tukei ekumwuch seni ewe asoren mongö, iei asisilan pwe a asor meinisin, o kenala me won ewe rongen asor. Mürin epwe aünü ngeni ewe fefin ewe koluk. 27 Iwe, are neminewe a püsin alimengaua o kirikiringau ngeni pwülüan, ewe koluk mi atoto anümamau, ewe souasor a aünü ngeni, epwe tolong leutun o afisätä metek mi weires pwe lukan epwe pwo, epwe pwal rit. Iwe, aramasan repwe leaweni itan lon ar ottek. 28 Nge are ewe fefin esap tipis, esap küw ewe feiengau, nge epwe tongeni nöünöü.

29 Iei ewe allük fän iten eman mwän mi lukomong, lupwen pwülüan a lisowu ngeni eman o püsin alimengaua, lupwen an pwüpwülü, 30 ika lupwen ekiekin lukomong a tolong lon leluken eman mwän, pwe a öümöüm ngeni pwülüan. Iwe, ätewe epwe anomu ewe fefin fän mesen ewe Samol mi Lapalap, nge ewe souasor epwe föri ngeni unusen pwüngün ei allük. 31 Iwe, esap wor än ewe mwän tipis, nge ewe fefin epwe püsin mwärelong fän liwinin an tipis.”