1 Iwe, ewe Samol mi Lapalap a kapas ngeni Moses lon ewe maasiesin Moap arun ewe chanpupu Jortan sasape ngeni Jeriko, 2 “Kopwe allük ngeni ekewe aramasen Israel pwe repwe ngeni chon ewe ainangen Lefi ekoch telinimw seni ar kewe leni ra lenieni, pwe repwe imweimw lon. Repwe pwal ngeniir ekewe fanü mi nom pwelin ünükün ekewe telinimw. 3 Iwe, chon ewe ainangen Lefi repwe imweimw lon ekewe telinimw, nge ekewe fanü ünükün repwe fän iten nöür kewe pwiin kow me sip me nöür kewe man meinisin. 4 Ekewe fanü ünükün ekewe telinimw ämi oupwe ngeni chon ewe ainangen Lefi repwe seni pwelin tittin ewe telinimw feila ükükün engeröü limepükü fiit. 5 Iwe, oupwe aükü ewe fanü lükün ewe telinimw, me peliötiuan epwe ükükün ülüngatngeröü fiit, me peliörün ülüngatngeröü fiit, me pelilotoun ülüngatngeröü fiit, me peliefengin pwal ülüngatngeröü fiit. Nge ewe telinimw epwe nom lukalapan. Ekei fanü mi chu ngeni ar kewe telinimw epwe fanüer fän iten nöür kewe man. 6 Oupwe ngeni chon ewe ainangen Lefi ekewe wonu telinimwen op, ia oupwe mwüt ngeni ewe mi niela aramas epwe süla ie. Nge oupwe pwal achu faik me ruu telinimw ngeni ekewe wonu. 7 Iwe, ekewe telinimw meinisin oupwe ngeni chon ewe ainangen Lefi repwe ükükün faik me walu, fiti ekewe fanü ünükür fän iten nöür kewe man. 8 Ekewe telinimw oupwe ngeni chon ewe ainangen Lefi seni fanüen ekewe aramasen Israel epwe aükük ngeni ükükün fanüen eu me eu ainang. Seni ekewe ainang watte oupwe ngeniir chomong, nge seni ekewe ainang kükün oupwe ngeniir ekoch chök.”

9 Iwe, ewe Samol mi Lapalap a kapas ngeni Moses, 10 “Kopwe üreni ekewe aramasen Israel: Lupwen oupwe feila pekilan ewe chanpupu Jortan o tolong lon ewe fanü Kanaan, 11 oupwe filätä ekoch telinimw pwe repwe telinimwen op fän itemi, pwe eman mwän mi niela eman aramas fän chechengau epwe tongeni sü ngeniir. 12 Ekewe telinimw repwe aopa ätewe mi niela eman aramas seni ewe mi kütta liwinin chan aramasan, pwe esap mäla me mwen an epwe apwüng fän mesen ewe mwichen aramas. 13 Oupwe fangala wonu telinimwen op. 14 Oupwe fangala ülüngat telinimw ötiuen ewe chanpupu Jortan, pwal ülüngat telinimw lon ewe fanü Kanaan, pwe repwe ämi telinimwen op. 15 Ekewe wonu telinimw repwe lenien op fän iten ekewe aramasen Israel, pwal fän iten ekewe chon ekis mi nom leir me ekewe ir mi wiliposola. Iwe, iteiten eman mi niela eman aramas fän chechengau epwe tongeni sü ngeniir. 16 Nge are eman mwän a wichi eman ren och pisek seni mächä, nge ewe aramas a mäla ren, ätewe eman chon niela aramas. Iwe, epwe ninnila. 17 Iwe, are eman mwän a monei ngeni eman eföü fau mi tongeni amälai eman, nge ewe aramas a mäla ren, ätewe eman chon niela aramas. Iwe, epwe ninnila. 18 Nge are eman mwän a wichi eman ren och pisek seni mwüch mi tongeni amälai eman, nge ewe aramas a mäla ren, ätewe eman chon niela aramas. Iwe, epwe ninnila. 19 Nge ewe chon kütta liwinin chan aramasan epwe püsin niela ätewe mi niela ewe aramas. Lupwen a tori ewe aramas, epwe niela. 20 Nge are eman mwän a posu eman pokiten an oput, ika a monei och ngeni eman seni anaia a op ie, nge ewe aramas a mäla ren, 21 ika a afönü eman pokiten an oput, nge ewe aramas a mäla ren, ätewe epwe ninnila, pun i eman chon niela aramas. Iwe, ewe chon kütta liwinin chan aramasan epwe niela ätewe, lupwen a tori.

22 Nge are eman mwän a posu eman esap oput, ika a monei och ngeni, nge esap op, 23 ika a monei eföü fau mi tongeni amälai eman, nge esap küna ätewe a küüw, are ewe aramas a mäla ren, nge i esap oput ätewe, esap pwal mochen afeiengaua, 24 ewe mwichen aramas epwe föri kapwüng lefilen ätewe mi niela ewe aramas me ewe mi kütta liwinin chan aramasan lon pwüngün ekei allük. 25 Iwe, ewe mwichen aramas epwe amanaua ewe mi niela aramas seni ätewe mi kütta liwinin chan aramasan. Iwe, repwe aliwinala ätewe ngeni an telinimwen op a fen süri me mwan, pwe epwe imweimw lon tori ewe souasor mi lap a kepit ren ewe lö mi pin epwe mäla. 26 Nge are ewe mi niela eman aramas epwe towu fän eu lükün kiännin an telinimwen op a süri, 27 nge ewe chon kütta liwinin chan aramasan epwe küna ätewe o niela, ätei esap tipisin niela aramas. 28 Pun ewe mi niela eman aramas epwe fokun nonom lon an telinimwen op tori ewe souasor mi lap epwe mäla. Nge mürin än ewe souasor mi lap mäla, ewe mi niela aramas a tongeni liwiniti fanüan.”

29 “Iwe, ikei ekewe allük me pwüng fän itemi seni eu täppin aramas tori eu täppin me lon leniemi meinisin: 30 Are eman a niela eman aramas, ewe chon niela epwe ninnila fän pwüngün pwärien ekoch chon pwärätä. Nge esap wor eman aramas epwe ninnila fän pwärien eman chök chon pwärätä. ✡ Tut 17.6; 19.15 31 Ousap fokun etiwa liwinin kepichilan manauen eman chon niela aramas mi tipisin mäla, nge epwe chök ninnila. 32 Ousap pwal fokun etiwa liwinin kepichilan manauen ätewe mi süri an telinimwen op, pwe epwe liwiniti fanüan mwen än ewe souasor mi lap mäla. 33 Iwe, ousap alimengaua ewe fanü oua nonom won. Pun nimanauei eman a alimengaua ewe fanü. Nge esap tongeni fis asoren limelim fän iten ewe fanü pokiten ewe angangen nimanau a fis won, chilon chök ika ätewe mi nimanauei eman epwe ninnila. 34 Ousap fokun alimengaua ewe fanü oua nonom won. Pun ngang ewe Samol mi Lapalap üa imweimw lein ekewe aramasen Israel.”