3
Kapasen fön pwe epwe wor aleasochis
3.1-35
1 Nei, kosap manlükala mine üa aiti ngonuk, nge kopwe iseis lon lelukom ai kewe allük. 2 Pun ren om föri ei, ierin manauom repwe langatamala, kopwe pwal uren feiöch. 3 Iwe, kosap mwüt ngeni kirikiröch me allükülük repwe sü senuk, kopwe riretä fän üom o makeretiu lon lelukom. 4 Are kopwe föri ei, kopwe küna ümöümöch me iteüöch me ren Kot me aramas. ✡ Luk 2.52
5 Kopwe lükü ewe Samol mi Lapalap ren unusen lelukom, nge kosap lükülükü püsin om sile. 6 Kopwe chechemeni i won meinisin mine ka föri, nge i epwe aiti ngonuk ewe al mi pwüng. 7 Kosap püsin ekieki pwe ka tipachem. Kopwe niuokusiti ewe Samol mi Lapalap o kul seni mine a ngau. ✡ Rom 12.16 8 Ren ei inisum epwe pöchökülela, nge lechuum esap apwangapwang.
9 Kopwe asamolu ewe Samol mi Lapalap ren om fang ngeni seni woum, pwal ren mwen kiniom uän irä meinisin. 10 Mürin om kewe lenien iseis repwe urela ren wiich, nge ekewe lenien iseis wain repwe urela ren wain o säsewu.
11 Nei, kosap oput än ewe Samol mi Lapalap emirit, kosap pwal chipwang ngeni an kapasen fön, ✡ Hiop 5.17 12 pun ewe Samol mi Lapalap a emiriti ätewe a echeni, usun eman sam a emiriti nöün we a pwapwaiti. ✡ Ipr 12.5-6; Pwär 3.19
13 A feiöch ewe aramas mi küna tipachem, a feiöch ewe aramas mi wewekai, 14 pun ewe feiöch a angei seni tipachem a mürina seni ewe feiöch a angei seni silifer, nge ewe win tipachem a atoto a aüchea seni kolt. 15 Tipachem a aüchea seni fau aüchea, nge esap wor och ka fokun efich epwe tongeni nönnö ngeni. 16 Tipachem a tongeni fang ngonuk manauatam, pisekisek me iteüöch. 17 Tipachem a tongeni awora pwapwa lon manauom o emweni ngonuk kinamwe. 18 Tipachem epwe aworato manau ngeni chokewe mi kamwöch won, nge chokewe mi fitipacheiti ra pwapwa.
19 Ewe Samol mi Lapalap a föri fanüfan ren an tipachem,
a anomu ekewe läng lon lenier ren an silelap.
20 Lon an tipachem a föri pwe ekewe lenien puächen koluk ra puächetä,
nge ekewe kuchu ra apüngätiu üt.
21 Nei, kopwe kamwöch won tipachem me mirit, nge kosap mwüt ngeniir repwe sü senuk. 22 Repwe awora manau ngonuk, repwe usun chök epa mwärämwär me fän üom. 23 Mürin, kopwe fetal won om al fän kinamwe, nge pecheöm esap chepetek. 24 Ika kopwe konola, kosap niuokus, ika kopwe möür, kopwe möür fän kinamwe. 25 Kosap niueiti och riaföü mi amairü epwe müttirituk, ika och feiengau epwe tori ekewe aramasangau. 26 Pun ewe Samol mi Lapalap epwe om apilükülük, epwe tümwünü pecheöm pwe esap tup lon eu sär. 27 Kopwe eäni kirikiröch ngeni aramas mi osupwang, lupwen ka tufich ngeni.
28 Kosap üreni chon arum, “Kopwe feila o liwinsefälito lesor, mürin üpwe ngonuk mine ka tüngor,” nge a fen nom reöm ewe mettoch. 29 Kosap ekiekietä föför mi ngau ngeni chon arum mi nom ünükum, nge i a fokun lükülükuk. 30 Kosap anini ngeni eman aramas nge esap wor popun, are esap föri och mi ngau ngonuk. 31 Kosap lolowoiti eman aramas mi mwänewüs, kosap pwal föri usun mine i a föri. 32 Pun ewe Samol mi Lapalap a oput eman aramas mi chök föri mine a ngau, nge a lükülükü eman mi wenechar. 33 Ewe Samol mi Lapalap a anümamaua chon leimwen eman aramasangau, nge a afeiöchü chon leimwen eman chon pwüng. 34 A turunufasei ekewe chon turunufas, nge a ümöümöch ngeni ekewe chon tipetekison. ✡ Jas 4.6; 1.Pet 5.5 35 Eman chon tipachem epwe küna iteüöch, nge eman chon tiparoch epwe küna itengau.