1 Nei, kopwe chechemeni ai kewe kapas o iseis ai kewe allük lon lelukom. 2 Kopwe aleasochisi ai kewe allük pwe kopwe manau. Kopwe pwal aücheani mine üa aiti ngonuk, usun om aücheani fituken lon mesom. 3 Kopwe amwöchüür lükün fansoun meinisin o iseniir lon lelukom. 4 Kopwe üreni tipachem, “En fefinei,” kopwe pwal apasa pwe sileöch chienom mi achengicheng. 5 Pun repwe tümwünuk seni ewe fin lisowu, pwal seni ewe fefin mi lüangau a eäni kapas amichimich.

6 Iwe, üa newu seni asammwachon imwei 7 o küna chomong alüal mi wewemang, nge üa mefi pwe eman me leir a fokun tiparoch. 8 A pwerela won ewe al arap ngeni lepwokukun imwen eman fefin mi lüangau, o fetal ngeni imwan 9 lefäf, lupwen a pwinila o popuetä rochokich.

10 Mürin, ewe fefin a towu pwe epwe churi ewe alüal, a üföüf üfen eman fefin mi amömö inisin o ekieki mine epwe eäni atuputup ngeni. 11 A fos leüömong, a pwal säwämang o nomofetal.

12 Fän ekoch a nom won al, fän ekoch a nom lon lenien amömö o sousou mwän lepwokukun ekewe al. 13 Iwe, a romi ewe mwän o mitiri, a kapas ngeni fän mesemau, 14 “Ikenai üa eäni eu asoren kinamwe, nge a chüen wor ochäi fituk seni ewe mönün asor. ✡ Lif 7.15 15 Iei mine üa feito pwe üpwe churuk, üa achocho le kütok, nge iei üa künok. 16 Üa ameresala won ai peet ekewe pwölüpwöl seni Isip mi sokopat anüer. 17 Üa epiti ai peet ren ewe löpokus seni ekewe irä iter mör, aloes me sinamon. 18 Kopwe feito, sipwe pwärifengeni ach tong tori lesosor, sipwe pwapwafengen lon tong. 19 Pun pwülüei esap nom rei, a saila won eu fanü toau. 20 A feila fän chomong moni, nge epwe liwinsefälito le unusen maram.”

21 Ina usun neminei a pesei ätei ren chomong kapas atuputup pwe epwe eti, a pöchökül ngeni ren an kapas amichimich. 22 Iwe, ätei a müttir etala neminei pwe a usun chök eman ätemwänin kow mi feila ngeni ewe leni ia epwe ninnila ie, pwal usun eman chia epwe le fif lon ewe lenien likatup, 23 tori efoch esefich a pwerelong lon lukan. A wewe ngeni eman machang mi sälong lon eu sär. Iwe, esap silei pwe epwe mäfeiengau ren.

24 Nei, iei kopwe aüselingaei, kopwe aü selingom ngeni ai kewe kapas. 25 Kosap mwüt ngeni ei sokun fefin epwe liapeni lelukom, kosap pwal tipeeu ngeni an kewe föför. 26 Pun chomong ra feiengau pokiten neminei. Ewer, chokewe ra mäla ren ra kon chomong. 27 Iwe, imwan we efoch al mi ale ngeni ewe lenien sotup, a feitiu ngeni ekewe rumwen mäla.