1 Ekewe aramas ra silei Kot me lon Juta,

itan a föüla me lon Israel.

2 A förätä lenian me lon Jerusalem,

a nonom won ewe chuk Sion.

3 Ikenan a kupi än chon oputan kewe föün esefich mi meriweriw,

ekewe tittin maun, ekewe ketilas me ekewe pisekin maun.

4 En ka fokun ling o tekia,

lupwen ka liwinto seni ekewe chuk,

ia ka akufu chon oputom me ie.

5 Ekewe sounfiu mi pwora a oo seniir liaper,

ra turula o möürüfoch.

Ekewe chon maun meinisin esap wor ar pöchökül.

6 Ai Kot än Jakop we Kot,

ren om apwüngü ekewe chon wawa oris me ekewe oris ra turula o mäla.

7 Nge en echök, ai Samol mi Lapalap, aramas repwe niuokusituk.

Iö a tongeni ü me mwom, lupwen ka song?

8 Ka eäni kapwüng seni won läng.

Iwe, fanüfan a niuokus o fanafanala,

9 lupwen ka ütä pwe kopwe atowu pwüngün kapwüng

o amanaua ekewe mi nom lon riaföü meinisin won fanüfan.

10 Ellet, än ekewe aramas lingeringer iei fen om ling.

Nge lusun ewe lingeringer kopwe chök efitti ngonuk.

11 Kopwe eäni om kewe pwon ngeni ewe Samol mi Lapalap om we Kot o apwönüretä.

Chon ekewe fanü mi nom ünükün repwe uwato lifang ngeni Kot, ewe Kot aramas ra niuokusiti.

12 I a atekisona ekewe samol mi lamalamtekia,

ekewe kingen fanüfan ra niuokusiti.