1 Ewe Samol mi Lapalap a nemenem, fanüfan epwe meseik,

ekewe fanüen lematau meinisin repwe pwapwa.

2 Kuchu me rochokich ra pweli ünükün Kot,

pwüng me apwüng longolongun an nemenem.

3 Ekkei a akomwola mwan

o kenala chon oputan mi nom ünükün.

4 An kewe fifi ra asarama fanüfan,

chon fanüfan ra küna o chechech.

5 Ekewe chuk ra telila usun kiris me fän mesen ewe Samol mi Lapalap,

me fän mesen ewe Samol mi nemeni unusen fanüfan.

6 Ekewe läng ra asilefeili an pwüng,

nge chon ekewe mwü meinisin ra küna an ling.

7 Aramas meinisin mi fel ngeni ekewe uluulun anümwäl repwe küna säw,

pwal chokewe mi aingaing won ekewe anümwäl esap wor aüchear.

Ekewe kot meinisin ra chapetiu me mwen ewe Samol mi Lapalap.

8 Sion a rongorong ei o pwapwa.

Ekewe telinimwen Juta ra meseik

pokiten om kewe apwüng, ai Kot.

9 Pun en, ai Samol mi Lapalap, ka fokun tekia won unusen fanüfan,

ka fokun tekia lap seni ekewe kot meinisin.

10 Ewe Samol mi Lapalap a echeni chokewe mi oput mine a ngau.

A tümwünü manauen nöün kewe chon pin

o angaseer seni ekewe aramasangau.

11 Saram a tinetiu won ekewe chon pwüng,

nge pwapwa a tori chokewe mi wenechar leluker.

12 Oupwe kilisou ngeni o mwareiti itan mi pin.