15
Sipwe apwapwai chienach souläng, nge sisap püsin apwapwai kich
15.1-6
1 Oukich kewe mi pöchökül lon ach lükülük sipwe alisi ekewe mi apwangapwang lon ar lükülük, pwe repwe tipeppos lon ar lükülük, nge sisap föri chök mine sipwe pwapwa ren. 2 Kich meinisin sipwe föri mine pwiich kewe souläng repwe pwapwa o feiöch ren, pwe repwe fefeitä lon ar lükülük. 3 Pun Kraist esap chök kütta mine epwe püsin pwapwa ren. Nge iei usun a mak lon ekewe Toropwe mi Pin, “Ekewe kapasen esit mi toruk ra pwal toriei.” ✡ Kölf 69.9 4 Pun meinisin mine a mak lon ekewe Toropwe mi Pin a mak fän iten ach sipwe kaiö seni, pwe epwe wor ach apilükülüköch ren ach likitü pwal ren ach küna pöchökülen letipach mi torikich seni ekewe Toropwe mi Pin. 5 Nge Kot, i popun ach likitü me ach küna pöchökülen letipach, epwe atufichikemi pwe oupwe tipeeufengen lefilemi ren ämi apirü föförün Kraist Jesus, 6 pwe ämi meinisin oupwe tipeeufengen le mwareiti Kot, i Semen ach Samol Jesus Kraist.
Ewe Pworausen Manau fän iten ekewe chon lükün Israel
15.7-13
7 Iwe, oupwe etiwafengenikemi lefilemi, usun chök Kraist a etiwakemi, pwe lingen Kot epwe fis. 8 Pun üa ürenikemi pwe Kraist a wiliti eman chon angang fän iten ekewe chon Juta an epwe pwärätä pwe Kot a allükülük, o epwe apwönüetä än Kot kewe pwon ngeni ar kewe lewo, 9 epwe pwal atufichi ekewe chon lükün Israel pwe repwe mwareiti Kot ren an we tong, usun a mak lon ekewe Toropwe mi Pin,
“Iei mine üpwe kilisou ngonuk me lein ekewe chon lükün Israel,
üpwe kölün mwareiti itom.” ✡ 2.Sam 22.50; Kölf 18.49 10 A pwal mak,
“Ämi chon lükün Israel oupwe fiti
nöün Kot kewe aramas le pwapwa!” ✡ Tut 32.43 11 A pwal mak,
“Oupwe mwareiti ewe Samol ämi chon lükün Israel meinisin,
oupwe fokun mwareiti i ämi aramas meinisin!” ✡ Kölf 117.1 12 Aisea a pwal apasa,
“Eman mwirimwirin Jesi epwe war.
Epwe feito pwe epwe nemeni ekewe chon lükün Israel,
nge ir repwe anomu ar apilükülük won.” ✡ Ais 11.10 13 Nge ewe Kot, i popun ämi apilükülük, epwe aurakemi ren watten pwapwa me kinamwe ren ämi lükü i, pwe ämi apilükülüköch epwe säsewu ren manamanen Ngünmifel.
Popun än Paulus pwora le makkei ei toropwe
15.14-21
14 Ämi pwii kana, ngang won inisi üa lükü pwe oua urela ren föför mi mürina pwal ren sokopaten silelap, nge oua pwal tongeni püsin öüröürafengenikemi. 15 Nge lon ei toropwe üa fokun pwora le makkei ngenikemi usun ekoch itelap üa mochen achema ngenikemi. Üa föri ei pokiten ewe wis mi aüchea Kot a ngeniei, 16 pwe üpwe eman chon angangen Kraist Jesus ai üpwe angang ngeni ekewe chon lükün Israel. Üa angang usun eman souasor lon ai afalafala ewe Pworausen Manau seni Kot, pwe ekewe chon lükün Israel repwe wiliti eu asor mi tiw me ren Kot, a pin ren Ngünmifel.
17 Iei mine lon ai eufengen me Kraist üa tongeni aingaing lon ai angang ngeni Kot. 18 Pun üsap mochen kapas usun och mettoch, nge üpwe chök kapas usun met Kraist a föri rei lon ai emweni ekewe chon lükün Israel pwe repwe aleasochisi Kot. A föri ei ren ai kewe kapas me föför, 19 ren pöchökülen ekewe asisil me manaman pwal ren manamanen ewe Ngünün Kot. Iei usun üa sai seni Jerusalem tori Illirikum o arongafeili unusen ewe Pworausen Manau usun Kraist. 20 Iei ai mochen fansoun meinisin, pwe üpwe arongafeili ewe Pworausen Manau lon ekewe leni ia aramas resamwo rongorong usun Kraist, pwe üsap aüetä won eu longolong eman a fen föri. 21 Usun a mak lon ekewe Toropwe mi Pin,
“Chokewe esap wor eman a aronga ngeniir usun i repwe küna,
nge chokewe mi rongorong repwe wewe ren.” ✡ Ais 52.15
Än Paulus akot fän iten an saila Rom
15.22-33
22 Iwe, iei popun a wor met a epetiei fän chomong, pwe üsap tongeni feila remi. ✡ Rom 1.13 23 Nge iei üa awesala ai angang lon ekei leni. Pokiten chomong ier üa fen mochen feila remi pwe üpwe churikemi, 24 üa apilükülükü ai üpwe tongeni feila remi iei. Ngang üa mochen pwe üpwe churikemi lon ai sai ngeni Spain. Üa mochen oupwe alisiei lon ai sai ngeni ikenan me mürin ai pwapwa le nonom remi ekoch fansoun. 25 Nge iei üpwe feila Jerusalem o uweela alilisin ekewe chon pin mi nom ikenan. 26 Pun ekewe mwichefel lon Masetonia me Krik ra ekiekifengeni ar repwe fangala ar asor fän iten alilisin ekewe chon wöüngau me lein ekewe chon pin lon Jerusalem. ✡ 1.Kor 16.1-4 27 Ei ekiek püsin ir ra filätä ar repwe föri. Nge wesewesen pwüngün mi wor wiser pwe repwe alisi ekewe chon wöüngau. Ekewe chon Juta ra fangala ar kewe feiöchün ngün ngeni ekewe chon lükün Israel, iei mine ekewe chon lükün Israel repwe alisi ekewe chon Juta ren ar kewe feiöchün inis. ✡ 1.Kor 9.11 28 Lupwen üpwe awesala ai angang o ngeniir unusen ewe moni aramas ra fesini fän iter, üpwe churikemi lon ai sai ngeni Spain. 29 Iwe, üa silei pwe lupwen üpwe torikemi, üpwe uwato remi unusen än Kraist we feiöch.
30 Ämi pwii kana, üa pese ngenikemi fän iten ach Samol Jesus Kraist pwal fän iten ewe tong ewe Ngünmifel a fangeto, pwe oupwe etiei lon ämi tiliken le iotek ngeni Kot fänäsengesi. 31 Oupwe iotek pwe üsap feiengau ren ekewe chon Juta resap lükü Jesus, oupwe pwal iotek pwe ai angang lon Jerusalem epwe ketiw me ren ekewe chon pin mi nom ikenan. 32 Mürin ngang üpwe feila remi fän watten pwapwa, are iei letipen Kot, pwe üpwe pwapwa le asösö lon fansoun ai nonom remi. 33 Kot, i popun ach kinamwe, epwe etikemi meinisin. Amen.