1 Iwe, a pwal wor künaei. Üa küna eman mwän mi amwöchü efoch selin aükük lepöün. 2 Mürin üa aisini, “Ia kopwe feila ie?” Nge i a pälüeniei, “Üpwe feila Jerusalem pwe üpwe aükü ükükün chölapan me langataman.” 3 Mürin, ewe chon läng mi piin kapas ngeniei a kaneto, nge pwal eman chon läng a kaneto pwe epwe churi. 4 Iwe, a üreni, “Kopwe säla ren ewe alüal mi kamwöch ewe selin aükük o üreni, ‘Jerusalem epwe eu telinimw esap wor tittin pokiten chomongun ekewe aramas me man mi nom lon.’ 5 Nge iei alon ewe Samol mi Lapalap, ‘Ngang üpwe eu tit seni ekkei mi pwelifeili Jerusalem, üpwe pwal eu ling fän itan me lon.’ ”

6 Iei alon ewe Samol mi Lapalap ngeni nöün aramas, “Üa atoropasakemi ngeni lesopun fanüfan me rüanü. Nge iei oupwe etto, oupwe etto! Oupwe sü seni ewe fanü efeng. 7 Oupwe etto, oupwe sü ngeni Sion, ämi mi nom lon Papilon.” 8 Iwe, iei alon ewe Samol mi Unusen Manaman, a tiniei ren an ling ngeni chon ekewe mwü mi angei pisekimi fän pöchökül, pun chokewe mi atapakemi ra atapa fituken lon mesan, 9 “Ngang üpwe aü pei o fiu ngeniir, nge chokewe mi angang ngeniir me lom repwe angei pisekir fän pöchökül.” Lupwen epwe fis ei, oupwe silei pwe ewe Samol mi Unusen Manaman a tiniei. 10 Iei alon ewe Samol mi Lapalap, “Oupwe köl o meseik, ämi chon Sion, pun ngang üpwe feito o imweimw lefilemi.” 11 Iwe, lon ewe rän, chomong chon ekewe mwü repwe feito ren ewe Samol mi Lapalap o wiliti nöün aramas. Iwe, i epwe imweimw lefilemi, nge ämi oupwe silei pwe ewe Samol mi Unusen Manaman a tinieito remi. 12 Iwe, ewe Samol mi Lapalap epwe fanüeni Juta pwe lenian lon ewe fanü mi pin, epwe pwal filisefäli Jerusalem.

13 Oupwe mosonosonola fän mesen ewe Samol mi Lapalap, ämi aramas meinisin, pun i a feito seni lenian mi pin.