1 Iwe, ränin än ewe Samol mi Lapalap apwüng a arapoto. Mürin, aramas repwe angei pisekimi chon Jerusalem fän pöchökül o aineti fän mesemi. 2 Pun ewe Samol mi Lapalap epwe achufengeni chon ekewe mwü meinisin, pwe repwe feila Jerusalem o maun ngeni. Iwe, ewe telinimw epwe oola, repwe soläni pisekin lon ekewe imw o achomanauei ekewe fefin. Esopun chon ewe telinimw repwe oola, nge ekewe lusun aramas resap kärila seni lon ewe telinimw. 3 Mürin, ewe Samol mi Lapalap epwe feito o maun ngeni chon ekewe mwü, usun a fen föri lon fansoun maun. 4 Lon ena fansoun i epwe ütä won ewe Chukun Olif mi nom mwen Jerusalem me peliötiu. Iwe, ewe Chukun Olif epwe mökfesen lon ruu kinikin seni ötiu tori lotou, pwe epwe fis eu lemol mi fokun chölap. Iei usun epek ewe chuk epwe sönüla ngeni peliefeng, nge epek ngeni peliör. 5 Nge ämi oupwe aleni ewe lemol le sü, pun ewe lemol mi fis lefilen ekewe chuk a tori Asel. Ewer, ämi oupwe sü usun ämi kewe lewo ra sü ren ewe chechechin fanü mi fis lon mwün Usia ewe kingen Juta. Mürin, ewe Samol mi Lapalap ai we Kot epwe feito, nge ekewe chon pin meinisin repwe eti.

6 Lon ena fansoun esap wor saram, esap fis patapat ika ais. 7 Epwe eu rän mi sokola, eu rän ewe Samol mi Lapalap echök a silei. Esap fis rän ika pwin, nge lupwen fansoun lekuniol epwe wor saram. ✡ Is 47.1; Joh 7.38; Pwär 22.1

8 Lon ena fansoun kolukun manau epwe puwu seni lon Jerusalem, esop ewe koluk epwe pula ngeni ewe Setin Mäla mi nom ötiu, nge esop epwe pula ngeni ewe mataulap mi nom lotou. Ei epwe fifis lon fansoun pwichikar usun chök lon fansoun patapat. 9 Mürin, ewe Samol mi Lapalap epwe king won unusen fanüfan. Lon ena fansoun ewe Samol mi Lapalap epwe i chök Kot, itan chök epwe pwal föüla.

10 Iwe, unusen ewe fanü epwe siwil ngeni eu maasies seni Kepa mi nom efeng tori Rimon mi nom ör. Nge Jerusalem epwe tekia o nonom chök lon lenian seni ewe Asamalapen Peniamin tori lenien ewe aeuin asamalap, pwal tori ewe Asamalapen Pwokuku, pwal seni ewe imw tekia än Hananel tori än ewe king kewe lenien üchüch föün wain. 11 Ewe telinimw epwe so, pun esap chüen wor anümamau won. Iwe, chon Jerusalem repwe imweimw lon fän kinamwe. ✡ Pwär 22.3

12 Iwe, ewe Samol mi Lapalap epwe awarato och mäfeiengau ngeni chon ekewe mwü meinisin mi maun ngeni Jerusalem. Epwe iei usun: Fituker epwe chök machela, lupwen ra chüen manau, föün meser epwe mach me lon pwanger, nge chönawer epwe pwal machela me lon awer. 13 Lon ena fansoun ewe Samol mi Lapalap epwe awarato wor fitikoko me niuokus watte, pwe eman me eman epwe turufi chienan o fiu ngeni. 14 Pwal chon Juta repwe maun ngeni chon ekewe mwü me lon Jerusalem. Repwe angei wöün chon ekewe mwü mi nom ünükür pwe choon wokur: kolt, silifer me chomong üf. 15 Iwe, eu mäfeiengau usun mesemwan epwe pwal tori ekewe oris, ekewe sokopaten aas, ekewe kamel, ekewe aas me sokopaten man mi nom lon ekewe lenien sounfiu.

16 Mürin, meinisin mi chüen manau me lein chon ekewe mwü mi maun ngeni Jerusalem repwe feila Jerusalem iteiten ier pwe repwe fel ngeni ewe King, ewe Samol mi Unusen Manaman, o eti ewe chulapen likachoch. ✡ Lif 23.39-43 17 Nge ika chon eu mwü me won fanüfan resap mochen feila Jerusalem pwe repwe fel ngeni ewe King, ewe Samol mi Unusen Manaman, esap püngütiu üt wor. 18 Are ekewe chon Isip resap mochen feila o eti ewe chulapen likachoch, esap püngütiu üt wor. Ewe Samol mi Lapalap epwe awarato wor ewe feiengau a awarato won chon ekewe mwü resap mochen feila Jerusalem pwe repwe eti ewe chulapen likachoch. 19 Epwe iei ewe apwüng ngeni Isip, pwal ngeni chon ekewe mwü meinisin resap feila Jerusalem, pwe repwe eti ewe chulapen likachoch.

20 Lon ena fansoun epwe rup won ekewe pel fän üen ekewe oris ekei kapas, “A pin fän iten ewe Samol mi Lapalap.” Iwe, ekewe nape lon imwen ewe Samol mi Lapalap repwe pin usun chök ekewe sepi mi nom mwen ewe rongen asor. 21 Iwe, iteiten nape me lon Jerusalem me Juta repwe pin fän iten ewe Samol mi Unusen Manaman, pwe meinisin mi asor repwe feito o aea ekewe nape le kuku fituken ekewe mönün asor lor. Lon ena fansoun esap chüen wor eman chon amömö lon imwen ewe Samol mi Unusen Manaman.