Sefanaia
Kapas akom
I. Iten ei puk: Sefanaia, pun mine a mak lon, an kapasen osuni. Wewen ei it Sefanaia: Ätewe ewe Samol mi Lapalap a aopa.
II. Chon makei ei puk: Sefanaia
III. Itelapemongen ei puk: Oupwe ekieksefäl, pun än ewe Samol mi Lapalap apwüng epwe tori chon fanüfan meinisin.
IV. Kapas aüchean ei puk: Sefanaia a asile ngeni ekewe chon Juta, pwe feiengau epwe toriir me chon ekewe mwü pokiten ar tipis, a pwal achipa chokewe mi chüen manau me mürin.
V. Masouen ei puk Sefanaia: Ewe Soufos Sefanaia a afalafala ekewe aramas lefilen ekewe ier 636 tori 623 mwen Kraist (B.C.), mwen fansoun än ewe king Josia aöchüsefäli ar angangen fel ngeni Kot lon ewe ier 621 mwen Kraist. Lon ei puk a mak kapasen osuni usun eu ränin apwüng me feiengau, lupwen ewe Samol mi Lapalap epwe apwüngü ekewe chon Juta pokiten ar fel ngeni pwal ekoch kot. Ewe Samol mi Lapalap epwe pwal apwüngü chon ekewe ekoch mwü. Inamwo ika Jerusalem epwe tala, nge epwe war eu fansoun, lupwen ewe telinimw epwe kaüsefäl, nge eu mwichen aramas mi tipetekison o pwüng epwe imweimw lon.
VI. Tettelin masouen ei puk:
Ränin än ewe Samol mi Lapalap apwüng epwe war 1.1-18
Feiengauen chon ekewe mwü mi nom ünükün Juta 2.1-15
Feiengauen chon Jerusalem me ar küna ngas 3.1-20
1
Ewe ränin än Kot apwüng
1.1-18
1 Iei alon ewe Samol mi Lapalap ngeni Sefanaia nöün Kusi we mwän. Kusi nöün Ketalia, Ketalia nöün Amaria, nge Amaria nöün Hiskia. Ei a fis lon mwün Josia ewe kingen Juta nöün Amon we mwän. ✡ 2.King 22.1–23.30; 2.Kron 34.1–35.27
2 Iei alon ewe Samol mi Lapalap, “Ngang üpwe wesewesen ataela mettoch meinisin won fanüfan. 3 Üpwe niela aramas me man, ekewe mansüsü me ekewe ikenen leset. Üpwe asapwilätiu ekewe aramasangau o ärala aramas meinisin seni won fanüfan. Ngang ewe Samol mi Lapalap üa kapas. 4 Üpwe apwüngü chon Juta me chon Jerusalem meinisin. Üpwe ärala seni ei leni mine a chüen fis ren angangen fel ngeni Paal, üpwe pwal arosala ekewe souasor mi angang ngeni anümwäl. 5 Üpwe ärala chokewe mi fel ngeni akkar me maram me ekewe fü me won ekewe imw. Üpwe pwal ärala chokewe mi fel ngeniei o eäni itei lon ar pwon fän akapel, nge ra pwal eäni iten ewe kot Milkom lon ar pwon fän akapel. 6 Üpwe ärala chokewe mi kul seni ar tapwela müri, chokewe resap küttaei ika resap angei öüröürer me rei.”
7 Oupwe mosonosonola fän mesen Kot ewe Samol mi Lapalap. Pun ränin ewe Samol mi Lapalap a arapoto. A amolätä eu asor o apini chokewe a körireto. 8 Iei alon ewe Samol mi Lapalap, “Lon ewe ränin asor üpwe apwüngü ekewe meilap me nöün ewe king kewe mwän, pwal meinisin mi föri örünien chon ekis. 9 Üpwe pwal apwüngü ir meinisin mi eäni fel lon lapalapen chon lükün, pwal chokewe mi solä o nimanauei aramas pwe repwe aura imwen ar kot ren mine ra angei seniir.”
10 Iei alon ewe Samol mi Lapalap, “Lon ewe rän aramas repwe rongorong eu puchör seni ewe Asamalapen Ik me lon Jerusalem, eu ngüngüres seni ewe kinikin söfö me lon ewe telinimw me eu ngüngün ta mi leüömong seni ekewe chukutekison. 11 Oupwe ngüngüres ämi mi imweimw lon kinikinin ewe telinimw me fan, pun ekewe chon amömö meinisin repwe rosola, nge ekewe chon kiloni silifer repwe ärela. 12 Lon ewe fansoun üpwe chosani Jerusalem fän eu lamp. Üpwe apwüngü ekewe mwän mi menemen ren püsin ar tufich o lükü püsin ir, ir chokewe mi ekieki lon leluker, ‘Ewe Samol mi Lapalap esap föri och mi mürina, esap pwal föri och mi ngau.’ 13 Aramas repwe soläni ar kewe pisek, nge imwer kewe repwe tala. Inamwo ika ra aüetä imwer, resap fokun nonom lor. Inamwo ika ra fotuki tanipin wain, resap fokun ün wain seniir.”
14 Ewe rän mi lap, ränin ewe Samol mi Lapalap a arapoto, a arapoto o müttirito. Oupwe rong! Ränin ewe Samol mi Lapalap epwe eu rän mi weires. Pwal ekewe mwän mi pwora repwe leüömong le puchörüngau. 15 Ewe rän epwe eu ränin lingeringer, eu ränin riaföü me niuokus, eu ränin tatakis me feiengau, eu ränin rochopwak me toputop, eu ränin kuchuchu me rochokichin rochopwak, 16 epwe pwal eu ränin tikin rappwa me puchörün maun, lupwen ekewe sounfiu repwe maun ngeni ekewe telinimw mi pöchökül tittir me ekewe imw tekia mi nom lon ekewe pwokuku.
17 Iei alon ewe Samol mi Lapalap, “Üpwe atoto riaföü won aramas pwe repwe fetal usun chon chun pokiten ar tipis ngeniei. Char epwe ninitiu usun chök koluk, nge fituker epwe toropas usun chök kiten mongö.” 18 Sap ar silifer ika ar kolt epwe tongeni angaseer lon ewe ränin än ewe Samol mi Lapalap lingeringer. Unusen fanüfan epwe karala ren ekkeiin an lingeringer, pun epwe müttir le awesi manauen chon fanüfan meinisin.