Echö Toropwe ngeni ekewe chon Ipru.
1.
Me lom Kot a kapas ngeni ach kewe lewo fän chomong pwal lon sokopaten lapalap ren ekewe soufos. 
Nge lon ekei ränin sopolan a kapas ngenikich ren Nöün we. I ätewe Kot a föri fanüfan me läng ren, ätewe Kot a filätä pwe epwe eäni mettoch meinisin. 
A lingeni lingen Kot o wesewesen lapalapeni lapalapen Kot. A anükünüköchü mettoch meinisin ren an kapas mi manaman. Mürin an awesala amusamusen än chon fanüfan tipis, a mottiu lepelifichin Kot lon läng, i ewe mi manaman seni meinisin. 
Ewe Nau a tekia seni ekewe chon läng, usun chök ewe it Kot a ngeni a tekia seni iter. 
Pun Kot esamwo apasa ngeni eman nöün kewe chon läng, “En nei, ikenai üa wiliti Semom.” Kot esap pwal apasa usun eman chon läng, “Ngang üpwe Saman, nge i epwe Nei.” 
Nge lupwen Kot ekärän tinato Nöün mwänichi lon ei fanüfan, a apasa, “Nöün Kot kewe chon läng meinisin repwe fokun fel ngeni.” 
Iwe, Kot a apasa usun ekewe chon läng, “Kot a föri pwe nöün kewe chon läng ra usun asepwäl, pwal nöün kewe chon angang ra usun pulopulen ekkei.” 
Nge usun Nöün we Kot a apasa, “O Kot, mwum epwe nonom tori feilfeilachök. Ka nemeni noumw aramas fän pwüng. 
Ka efich pwüng, nge ka oput mine a ngau. Iei mine Kot, om we Kot a filuketä, a fang ngonuk pwapwan om iteüöch lap seni an fang ngeni chiechiom kewe.” 
A pwal apasa, “En Samol, lepoputän ka föri fanüfan, nge ren püsin poumw ka föri ekewe läng. 
Ir repwe tala, nge en kopwe nonom fochofoch, repwe mesila usun echö üf. 
Kopwe numufengeniir usun echö sekit, kopwe siwiliir usun eman a siwili üfan. Nge en ka ususum we chök, manauom esap müchüla.” 
Kot esap fokun apasa ngeni eman nöün kewe chon läng, “Kopwe mottiu lepelifichi tori üpwe anomu chon oputom, pwe repwe lenien puun pecheöm.” 
Iwe, nge met ren ekewe chon läng? Ir meinisin ngün mi angang ngeni Kot. Kot a tiniirela pwe repwe alisi chokewe repwe küna manau.