Aeuin Toropwe seni Johannes.
1.
Äm aia mak ngenikemi usun ewe Kapasen Manau mi nonom chök seni me lepoputän. Aia fen rongorong ren selingem me küna ren mesem, ewer, aia fen küna o atapa ren pöüm. 
Lupwen ei manau a pwäla, aia küna. Iei mine aia kapas usun o asile ngenikemi usun ewe manau esemüch mi nom ren ewe Sam, nge a pwä ngenikem. 
Mine aia fen küna o rongorong aia pwal asile ngenikemi, pwe ämi oupwe etikem lon äm chiechifengen me ewe Sam me Jesus Kraist Nöün we. 
Aia makkei ei pwe ämi pwapwa epwe unusöchüla. 
Iwe, iei ewe kapas aia rongorong seni Nöün we o aronga ngenikemi: Kot i saram, esap fokun wor rochopwak lon. 
Are sia apasa pwe sia chiechi ngeni Kot, nge sia nom lon rochopwak, sia chofona lon ach kapas pwal lon ach föför. 
Nge are sia nonom lon ewe saram usun i a nonom lon saram, iwe, sia chiechifengen lefilach, nge chaan Jesus Nöün we a limetikich seni ach tipis meinisin. 
Iwe, are sia apasa pwe esap wor ach tipis, sia püsin atupukich, nge esap wor let loch. 
Nge are sia pwärätä ach tipis ngeni Kot, i epwe apwönüetä an pwon o föri mine a pwüng: Epwe amusala ach tipis o limetikich seni ach pwüngingau meinisin. 
Are sia apasa pwe sisap tipis, sia achofonai Kot, nge an kapas esap nom loch.