Aruachön Toropwe seni Johannes.
1.
Ngang ewe Souakom üa kapong ngeni ewe Finesamol mi fil me nöün kana, ir chokewe üa wesewesen echeniir. Nge sap ngang chök üa echeniir, pwe pwal chokewe meinisin mi silei ewe let, 
pun ewe let a nonom loch, epwe pwal etikich tori feilfeilachök. 
Samach Kot me Jesus Kraist, i Nöün ewe Sam, epwe ngenikich ümöümöch, tong me kinamwe, repwe nonom rech lon let me chen. 
Üa fokun pwapwa lupwen üa silei pwe ekoch me lein noumw kana ra manaueni ewe manauen let usun chök ewe Sam a allük ngenikich. 
Iei üa tüngor ngonuk achengicheng Finesamol: Ousipwe echenifengenikich lefilach. Ei esap eu allük mi fö üa makkei ngenikemi, pwe iei eu allük sia eäni seni chök lepoputän. 
Ei chen üa kapas usun, wewen pwe sipwe fokun aleasochisi än Kot kewe allük. Iei ewe allük oua rongorong seni lepoputän, pwe oupwe manaueni ewe manauen chen. 
Chomong chon atuputup ra fetalfeil won unusen fanüfan, ir aramas resap pwärätä pwe Jesus Kraist a feito o wiliti aramas. Ei sokun aramas eman chon atuputup me ewe pölüen Kraist. 
Iei mine oupwe mamasakemi, pwe esap pöüt senikemi mine sia angang fän itan, nge oupwe angei ewe liwin mi unus. 
Eman esap kamwöchünük won än Kraist afalafal, pwe a apacha och ngeni, Kot esap nonom ren. Nge eman mi kamwöchünük won ewe afalafal, ewe Sam me ewe Nau ra nonom ren. 
Iei mine are eman a feito remi nge esap uwato ei afalafal, ousap etiwa i lon imwemi, ousap mwo nge apasa lon ämi kapong, “Kinamwe epwe nonom reöm.” 
Pun eman mi eäni kapongen kinamwe ngeni, a wiliti eman chiechian lon ekewe sokun föföringau a föriir. 
A wor chomong mine ngang üa mochen ürenikemi, nge üsap mochen makkei ngenikemi lon toropwe ren ink. Nge üa apilükülük ngeni ai üpwe tongeni churikemi o püsin kapas ngenikemi, pwe ach pwapwa epwe unusöch. 
Nöün pwiüm we mi fil ra kapong ngonuk.