1 Jesús tsachilaca jera micaritobi, Capernaum pueblobi winue. 2 Junni aman uyan to capitanchi peyun uran tsominue puyachun. Ya tsachiri duque laquitinun peyun jominue. 3 Junni capitanni Jesuca meráto, mantá tan israelítalaca erenue yape Jesube rocailaisa yachi peyunca manse suwabi jasa. 4 Junni ya mantá tan unicalari Jesúchica jato, duque rocaito itsanlatinue:

—Nu capitanchica jiniide! Yari sen tsachi jonan, yaca ayudaintsan joe latinue. 5 Israelita itotonan, israelítalaca duque laquiramin joe. Yachi calachiri chiquilachi tenchi Diosichi fiqui miinun ya quisa caricae latinue.

6 Tsantinan, Jesús yalabe pejinue. Junni aman capitanchi ya quelo fenasa, capitanni yachi amicolaca erenue yape Jesúlabe tulaibi jilaisa. Junni capitan ereca jun tsachila jalaito, Jesube itsanlatinue:

—Miya, capitanni itsanque fiqui eree latinue. Te, jatusa tie latinue. Nuri capitanca fécari sen joto, yachibi jatusa tie latinue. 7 Junni nuca tulaibi jitiyoe tie latinue seiton joyoe tito. Junni yachica jituminnan, inte nechi mantaquiniquisa tie. Inte nechiri quiyanpunca manseisa mantanari, manseichunae tie latinue. 8 Jana soldadola tala mantanun cuwenta jochunae tie latinue. Coroneli ya capitanca mantamin joe. Ya capitan mantimini soldadolaca mantamin joe. Jisa mantanari, jiniiminlae; o jasa mantanari, janiiminlae. O yachi peyunca titiya quisa tinari, tsanquiniquimin joe latinue. Junni nunan jun tsanquenan quiyanpunca manseide! tinari, manseichunae tie latinue.

9 Junni capitan tsantinunca wepanato meráto, Jesuri yabe pejaca junlabe itsantinue:

—Meralaquinade! tinue. Ya capitan israelita itotonan, israelítalaca fécari Diosica tennamin joe tinue.

10 Junni capitan ereca junla manfanasari, ya quiyanpun peyunni numa manseica jominue.

11 Junni nanni ina Jesús manca puebloca jinue Naín tinunca. Yabe penenaminlabe, junsi layan uyan tsachilabe pejinaminlanue. 12 Jun pueblobi wilaichinasa, puyacaca menabi tanjinaminlanue. Ya puyacachi ayan biuda jominue. Ya tsachiri yachi mancari nao jominue. Junni jun pueblobi chuminla layanla yaca menabi pejinaminlanue. 13 Junni Miya Jesuri yaca quirato, laqui tito, waretude! tinue. 14 Junni aman Jesús quelo féto, puyaca ponun cajonca taquiranue. Tsanquinasa, nanato tanjinaminla wiruilainue. Junni puyaca mosoca Jesús itsantinue:

—Mansonhide! tiyoe tinue.

15 Junni Jesús tsantinan, puyaca jomin tsachi manchudito cuenta quinue. Junni yachi ayanchi mancuwanue. 16 Jerale tsachila junca quiraminla jele tito, Diosica duque se tito itsanlatinue:

—Diosichi mantate tsarasi pamin tsachi chiquilachica jaca joe latinue. Diosi yachi tsachilaca ayudainae latinue.

17 Junni jerale Judea tobi, uyan quelole totenan tsanque mera jominue Jesús duque wepanato quirantsancari quinanunca.

18 Junni Mumunmin Juanchi tsachila Juanbe jera cuenta polarilaquinue Jesús niyan quinanunca. 19 Junni Juan doramin joto, junca meráto, yachi tsachila palucaca jasa carito, yalaca Jesúchica erenue. Junni yalaca erechinato, yalabe itsantinue:

—Jesube itsanlatina! tinue. ¿Nu Diosi ereno jomin tsachi joyun? tilatina! tinue. Nu itotori, paniquede! tilatina! tinue uyanca meralarachun.

20 Junni ya paluca tsachila Jesúchica jato itsanlatinue:

—Mumunmin Juan ereca jun jalaiyoe latinue. Yari nuca miichi tinae. ¿Nu Diosi ereno jomin tsachi joyun? latinue. Junni nu itotori, paniquisa tie latinue uyanca meralarachun. Mumunmin Juan tsanque fiqui eree latinue.

21 Junnasari Jesús duque quiyanpunlaca jera manse suwanue. Yucanchi ocola tsachilachibi pominlaca mansularinue. Aman quirano podeitonlaca manquirano podeisa carinue. 22 Junto aman Juanchi tsachilabe itsantinue:

—La ticatiya quinanunca nula quiralaquinae tinue. Junto tenca calaquede! Quirano podeitonlaca, jancanlaca, lepra bichi chunlaca, meráno podeitonlaca mansenayoe. Poperelaca Diosichi sen fiquica micarinayoe. Junni nulari junca jera quirato, aman Juánchibi manfeto yabe jera cuenta quilaquina! tinue. 23 Junni Juanbe junca cuenta quito itsanlatina! tinue. Laca tennanoca peleituna! tinae tilatina! tinue. Laca palaque tenca catuminla pansi jolajochunae tinae tilatina! tinue.

24 Jesús tsantinunbi Mumunmin Juan ereca junla manjilainue. Junni manjilainunbi, Jesuri uyan duque tsachilabe Mumunmin Juanca itsantinue:

—¿Nulari niyanlanantiya chutunun posto minu Juanca quirabi jilaico? tinue. Junni aman yaca quirabi jinato, ¿niyaque tenca canaminlayun? ¿Juanca ti tsachi joeque tenca canaminlayun? tinue. ¿Cumana tenca jonhoe tinato jilaiyun? Te, Juanni cumana tenca tsachi natiya itoe. 25 ¿Junni ti tsachi jonhoe tinaminlayun? ¿Tsara uraran camisa pomin oco tsachi jonhoe tinaminlayun? Te, tsan itoe. Otoquin camisaca poto senbi oco tala chuminlari miyalachibiri chuminla joe; niyanlanantiya chutunun postobi chutuminlae. 26 Junni Juanca quirabi jito, ¿ti tsachi jonhoe tinaminlayun? ¿Diosichi mantate pamin tsachi jonhoe tinato jilaiyun? Janhan. Diosichi mantate pamin joe. Ya Juanni Diosichi mantate tsaracari seque pamin joe. 27 Matu mate Diosi yachi pilabi Juanca panue yaca ereno joyoeque.

Jesús Juanca tsanque cuenta quinue.

29 Junni aman epe israelítala Juanbe mumunhica jominlanue. Inpuesto cala caminlanan Juanbe mumunhica jominlanue. Junto Jesús Juanca tsanque cuenta quinasa, ya tsachilari Diosica se joe tinaminlanue Juanca erenun tenchi. 30 Mantá tan israelítala mantimini Juanbe mumunhilaitunue. Fariséolabe israelítala tala mantaca duque miraminlabe yabe mumunhituchi latinue. Junni Diosi yalaca Juanchi fiquibe mantachi tinasanan, yalari te, natiya munaratuminlanue.

31 Junnan Jesuri Juanca tsantitobi, mantá tan israelítalaca itsantinue:

—In mate tsachilari uyan quiraque tenca tanla joe tinue. 32 Epelesiri paiminla joe tensaamin nalala cuwenta. Nalala amicolaca paito, chiquila son tito folota quito teranasanan, nulari peteratuminla joe tilatimanhe tinue. Junsi ya nalalanan laquichi warelaquinasanan, nulari pewarelaquitue tito pailaimanhe. 33 Aman laca paiminlanan jun nalala cuwenta tenca itonla joe tinue. Meralaquede! Mumunmin Juanni sen anoca fituto, bino cuchitumin jominue. Junni yaca yucanchi oco yachibi wica jonhoe tito paiminla joe. 34 Aman la mantimini tsachi ica jun joto Juan cuenta nenatiyoe. Lari ano fin, bino cuchin, pequimanyoe. Junni lacanan paito, jilu, junsi winan timinlae tinue. Laca paito, jutsa quiminlachi amico, ti quira inpuesto cala caminlachi amico joe timinla joe tinue. 35 Diosi mantimini ya seiton curaminlaca natiya tennatue. Junni tsachila Diosibe tsa miica junlaca quirato miilaichunae Diosi sen joeque. Jesús tsanque cuenta quinue.

36 Junni fariseo manca Jesuca jasa tinue yachi yabi ano pefibi jasa. Jesús yachibi féto, tamochi wito, ano fichun chudinue. 37 Junni Jesús jun yabi ano pefinaeque meráto, jun pueblobi nechi sona manca pewinue. Ya sonari jutsa quito nenamin sona jominue. Tsan jotonan, yari puban pi cato, duque mica alabastro tinun suca quica jun boteyabi punca tanjanue. 38 Junto Jesuchi benele wiruinue yachi nede quelole. Junsi laquichi wareto, Jesuchi nedebi capinchi ata suwanue. Junto aman achi nedeca manfu suwan, junsi motin, tito puban pica yachi nedebi ponue. 39 Junni Jesuca jacarimin fariséori ya sona tsannaminca quirato, itsanque tenca canaminue: In Jesús Diosi mantaca jun jomanpari, miino jomin jonhoe niyan sona yaca taquirananunca. Seiton sona joe. 40 Junni fariseo tsanque tenca canasa, Jesús yachi mumunca pato yabe itsantinue:

—Simón, nube ticatiya cuenta quino muquee tinue.

Junni fariséori Jesube pato, Maestro, paniquede! tinue. 41 Junnan Jesús ya fariséoca micarichun, itsanque cuenta polarinue:

—Paluca tsachilari tsachi máncachi cala neloralarachunae tinue. Manca duque duque nelorachunae. Manca nasi nacári nelorachunae tinue. 42 Junni aman palunan cala mancuwano podeitunan, jera perdonaichunae tinue. Junni perdonaiminca duque laquiralarachunae perdonainun tenchi. Junni nuchi tencari, ¿yala palule nechi nun fécari laquirachunae tenjan? tinue.

43 Fariséori tulanto itsantinue:

—Fécari neloramin jomin tsachi fe laquirachunae tenjae tinue.

Junni Jesús tsa tie tinue. 44 Jesús tsantisi, jun sonaca quiraereto, fariséobe itsantinue:

—In sonaca tenca cato quirade! tinue. Chiquilachi miteri quirabi jaminlachi pi cuwano joe yape nede tsalesa. Nuri tsantue. In sona mantimini yachi capinchi lachi nedeca ata suwato yachi achi manfu suwae tinue. 45 Chiquilachi miteri quirabi jaminlaca motito saludaino joe. Nuri tsantue. In sona mantimini la winunle nechi lachi nedeca camotinae tinue. 46 Chiquilachi miteri quirabi jaminlachi misubi aseite nasi pono joe. Nuri tsantue. In sona mantimini lachi nedebinan puban pinan iliponae. 47 Junni nu meráde! tinue. Ya duque laquirae. Junto tsannaminca quirato miintsan joe ya duque jutsa tanunca piyarica joeque. Nu mantimini nasiri jutsa nacá tayoe tinaminca perdonainari, nasiri laquirachunae tinue.

48 Junni Jesús fariséobe tsantito, jun seiton sonaca nuchi jutsaca piyaricayoe tinue. 49 Junni junbi ano pefinaminla jun fiquica meráto paito, yala tala itsanlatinue:

—¿Niyaito tsantinan? ¿Niyaito jutsaca piyarimin joyoe tinan? tilatinue.

50 Jesús mantimini jun sonabe itsantinue:

—Nuri laca tennato se loca joe. Seque manjiniide! tinue.