1 Junni aman Jerusalenbi nechi jamin fariséola, junsi israelítala tala mantaca micariminlari, Jesúchica jalainue. 2 Junni yalari Jesube penenamin tsachilacari tede tsaletuminnan ano pefinaminca quiralaquinue. Jun tenchi ya israelita mantaminlari yalaca duque yucacuralaquinue. Aman israelítalachi miteri tedeca tsaletuminnan ano finari, seiton jominue. 3 Junni jerale fariséolari, o junsi weyan israelítalari, numatotiya tedeca tsaletuminnan ano fino miitominlanue. Tsanque yalachi tatala micarica jominlanue. 4 Yalachi miteri mercadobi nechi manjatobi, ticatiya jera mantsaletobi ano manfimin jominlanue. Junni yalari itsanlaca tsalemin jominlanue: pi cuchinun tásaca, perolica, ano pocato finun platoca, junsi catsonun lowaca tsalemin jominlanue. 5 Junto israelita mantaminlari Jesube panhalaquinue:

—¿Niyaito nube penenaminlari chiquilachi matu tatalachi mite nenatuminla jun? latinue. Nube penenaminlari tedeca tsaletuminnan ano finato, seiton icala joe tilatinue.

6 Junni Jesuri yalabe manpato itsantinue:

—Nulari fe sen jolajoyoe titonan, seitonla joe. Matu to Isaías Diosichi mantate nulaca tsa pato, itsanque pila chuteca joe tinue:

—Nulari matu to israelítalachi mite tuca nenato, ticatiya jera tsaleniquiminla joe. Perolica junsi pi cuchinun tásaca, tsaleto, junsi ticatiya uyan quiraque quiniquiminla joe. Junni tsanque nenatonan, Diosi mantaca junca telaquepominla joe tinue. 9 Nulachi miteri quilaquechiqueri, Diosi mantacacari telaquepono ura min jolajoe tinue. 10 Junni matu tote Moiseri Diosichi Pilabi itsanque pila chuteca joe: Nulachi apaca, nulachi ayanca seque respetailainaque chuteca joe. Apaca o ayanca seitonque paminlaca niya josatiya totenonan joeque chuteca joe tinue. 11 Juntonan nulari jun mantaca epe suwachique itsantiminla joe: Tsachi manca yachi calaca “corbán joe” titori, yachi apaca o ayanca ayudaitutonan, se jonijochunae timinla joe. (Aman corbán joe titori, “Diosichi cuwaca joe” tito tsantiminlanue.) Junni apabe ayanbeca ayudaituchi timin tsachilari itsantiminla joe tinue: Apa, ayan, nulaca natiya ayudaino podeitiyoe. Lachi calaca jera Diosichi cuwaca joto corbán joe timinla joe. 12 Junni tsantimin tsachilaca nulari apaca o ayanca ayudaisa carituminla joe tinue. 13 Tsanquesiri nulachi miteri micarinato, nulari Diosi mantacaca epe cuwenta suwaminla joe. Junsi jun matu to mica man quiraque man quiraque jera micariminla joe tinue.

14 Junni Jesuri tsachilaca jera layasuwato itsantinue:

—Jeralelanan seque meráto entendeilaide! tinue. 15 Tinantiya tsachilachibi urachi nechi wiminni seiton suwatuchunae tinue. Tsachilachi tencabi nechi lomin, ya seiton suwachunae tinue. 16 Nulari punqui chunla jotori, seque meralaquede! tinue.

17 Junni Jesús tsanque micarisi, tsachilaca jera purato manjito, tamochi manwinunbi, yabe penenaminlari jun cuentaca niyan tito tsantinayunque manpanhalaquinue. 18 Junni Jesuri yalabe manpato itsantinue:

—¿Nulanan caentendeilaitiyun? tinue. Titiya tsachilachibi urachi nechi witori, seiton tenca suwano itochunae. ¿Junca entendeilaitiyun? 19 Ticatiya finari, tencabi wituchunae; pecolobiri wito, nasi inaleri manloniichunae tinue.

Jesús tsantinato, titiya ano finori se jonijochunae tinue. 20 Junsi aman itsantinue:

—Tsachichibi nechi lominni, ya seiton suwachunae tinue. 21 Tsachichi tencabi nechiri titiya seiton lochunae. Seitonque tenca cano, uyan sonalabe o uyan unilalabe nosa seitonque nenano, toteno, 22 tarinno, titiya uyanla tanunca munaito quirano, uyanlaca seiton quino, nene pano, seiton quino, uyanla tanun tenchi pa nenano, uyanlaca epele pano, uyanlaca fe joyoe tino, junsi tenca iton jono, yalasiri duque seiton suwano joe tiyoe tinue. 23 Jera ya seiton cosalari tsachilachibi nechi loto, tsachilaca seiton suwamin joe tinue.

24 Junni Jesuri junte nechi manjito, Tiro pueblobe Sidón pueblobe quelote jinue. Junbi yabi winue. Niyanlacanantiya miratusa tennaminue. Juntonan natiya tsaino podeitunue. 25 Junnasa sona manca Jesús junte ranunca moora meránue. Ya sonachi namachibi yucanchi oco wica jominue. Junni ya sonari Jesuca quirasi, yachi nedele telenhinue. 26 Yari Sirofenecia tinun tobi nechi jominue. Uyan to sona jotonan, Jesube rocainue ya sonachi namachibi yucanchi oco pominca mansularisa. 27 Junni Jesuri ya sonabe itsantinue:

—Casaleri israelítalachi tenchi quino joyoe tinue. Yalari Diosichi nalala cuwenta jolajoe. Junni nuchi tenchi casale quitori, nalalachi anoca josoleto susuchi cuwamin cuwenta joichunae tinue. Tsantuntsan joe tinue.

28 Junni ya sonari Jesube manpato itsantinue:

—Miya, nuri tsa tie tinue. Juntonan susunan mesa tenpe tsoto, nalala ano nasi nacá aralenacaca layato fimanhe tinue. Junto chiquecanan nasi nacá ayudaide! tinue.

29 Junni Jesuri itsantinue:

—Nu tsarasica pae. Manjiniide! tinue. Nuchi namachibi nechi yucanchi oco manloca joe tinue.

30 Junni ya sonari yachi yabi manfeto quiranari, ya sona nari lowabi tsominue. Yucanchi oco jera manloca jonan, manseica jominue.

31 Junni Jesuri Tírobi nechi manjito, Sidón pueblose polenue. Junsi Galilea wa pipiluse quelole poleto, Decápolis tobi fenue. 32 Junni junte aman tsachi manca merátumin, junsi fiqui seque patumin, jominue. Yaca tanjato Jesube itsanque rocailainue:

—In tsachica nuchi tedechi tale quito, manse suwade! tilatinue.

33 Junni Jesuri ya tsachica uyan talale tanjito, punqui forochi temisu ponue. Junsi tufaquesi, nicacale taquiranue. 34 Junsi jamochi quirato, wa jasá quito, “Efata” tinue. Tsantinato, foroto meráde! tinaminue. 35 Jun tsantinunsileri, ya merátumin tsachichi punquiri manforoinue; junsi yachi nicacanan manseinue. Junnan seque patumin jominnan seque pano manpodeinue. 36 Aman junni Jesuri yalabe pato, junca mobenantiya patusa mantanue. Juntonan tsanque duque mantaca josanan, yalari fécari duque cuenta quinilaquinue. 37 Junni tsachilari junca meráto o quirato, duque wepanalainue. Junto itsantilatinue:

—Ticatiya sequesiri quimin joe tilatinue. Seque patumin jominlaca manpasa carimin joe tilatinue. Junsi merátumin jominlaca manmerása carimin joe tilatinue.