1 Junni aman casa ma fiesta ichun palu ma cajominue. Jun fiestate lebadura iton bibuca finun jominue. Junnasa mantá tan patelelabe, israelítala tala mantaca micariminlabe Jesuca totechi tito, yaca nosale nechi cachique tenca cade nenaminlanue. 2 Junni yala tala itsanlatinue:

—Fiesta órate catuntsan joe tilatinue yape tsachilari firara tilatitusa.

3 Junni Jesuri Betania puebloca jito, Simonchi yabi chuminue. Aman ya Simonni lepra bichi chumin jominue. Junni Jesula junbi ano fito chularasanan, sona manca duque mica puban pica tanjanue. Tsara sen nardo tinun puban pi jominue. Alabastro tinun suca quica jun boteyabi pun jominue. Junni ya sonari boteyaca cole ereto foroto, puban pica Jesuchi misubi ponue. 4 Junni tsanquinaminca quirato, weyanlari paito, itsanlatinue:

—Ya mica puban picari epe tsannae latinue. 5 Ya puban pica osito duque cala cato, ya calaca poperelachi cuwantsan jominue. Seiton quinae latinue.

6 Junni Jesuri yalachi fiquica meráto itsantinue:

—Nulari in sonaca telaqueponilaquede! tinue. ¿Ti quichun yaca pasuwalaquinayun? Yari laca seque quinae tinue. 7 Aman popere tsachilari numatotiya nulabe pejoto polelaichunae. Numasitiya yalaca seque quino podeilaichunae tinue. Manan la mantimini numatotiya nulabe chuto poleno itoyoe tinue. 8 In sonari lachi tenchi jera quino podeinunca quinae. ¿Jana puyaca junlaca menachun puban pica pono joco? Aman la capuyatusanan, lacanan menachun cuwenta ya puban pica numa ponae tinue. 9 Nulabe tsarasica pachinayoe: Diosichi sen fiquica jerale tote micarinato, in sona tsanquinanuncanan palaquichunae tinue yape yaca mantenhilaisa.

10 Chunca paluca Jesube penenaminla manca Judas Iscariote jominue. Junni yari mantá tan patelelachica jito, Jesuca nulachi cuwapono muquee tinue. 11 Aman mantá tan patelelari junca meráto son tito, cala cuwalaquechinayoe tilatinue. Junni junte nechi Júdari tenca cade nenaminue Jesuca niyaque cuwapono jonunca.

12 Junni casa ma fiesta fanue lebadura iton bibuca finun fiesta. Aman caque fiesta mate opisa náca totenun jominue casa ma fiesta quinato fichun. Aman junni Jesube penenaminlari yabe itsanque panhalaquinue:

—¿Chiquilari fiesta anoca tile daquintsan jun? latinue nube casa ma fiesta ano filaquichun.

13 Junni Jesuri yala tsantinunsi, yabe penenaminla palucaca jera selaquinasa erenue. Erenato, yalabe itsantinue:

—Puebloca jilaide! Aman pueblobi wilainaminnan, pi nana jun janamin unilabe tulailaichunae tinue. Nulari yachi beneca jilaina! 14 Junni yari yabi winunsi, nulari jun ya tsacuminbe itsanlatina! Chiquilaca micarimin tsachi rocainae tilatina! fiesta ano fichun tamoca micuwasa. Junbi casa ma fiesta anoca yachi tsachilabe pefino muquee tinae latina! tinue. 15 Junni aman nula tsantinunsileri, jamobi wa tamoca micuwachunae tinue. Jun tamochi mesa, plato, titiya jera jochunae tinue. Junni nulari jun tamochi fiesta ano fichun jera selaquinana! tinue.

16 Junni Jesús tsantinunsi, yala paluca Jerusalén pueblobi wilainue. Junni Jesús tsanque paca josa, jun tsanquenan patinue. Junni junbi casa ma fiesta ano fichun jera selaquinue.

17 Junni quebite Jesube yachi chunca paluca tsachilabe jun yabi féto wito, ano filaquinue. 18 Aman ano fito chuminnan, Jesuri yalabe itsantinue:

—Nulabe tsarasica pachinayoe tinue: Nula manca laca uyanlachi cuwapochinae tinue. Cuwapomin tsachi labe tsaina ano pefinae tiyoe tinue.

19 Junni Jesube penenaminlari laquiilaito, manca manca Jesube itsantilatinue:

—¿La itoiinco? ¿La itoiinco? latinue.

20 Junni Jesús yalachi fiquica meráto, yalabe itsantinue:

—Laca cuwapomin tsachi nula chunca palucabi manca tsachi joe tinue. Yari la finanun nidabi pefinae tinue. 21 La tsachi ica jun joto puyabi jichinayoe. Diosichi Pilabi laca tsanquenan chuteca joe tinue puyano joeque. Laca cuwapomin tsachi mantimini duque padeseichunae tinue. Ya tsachi naica itomanpari, yachi tenchi fe se jono jomin jonhoe tinue.

22 Junni ano filaquinaminnan, Jesuri bibuca cato, Diosibe acradeseito, pisuleto, yabe penenaminlachi cuwanue. Cuwanato itsantinue:

—Nen, in biburi lachi puca joe tinue.

23 Junsi bino copacanan cato acradeseito, yalachi cuwanue yape cuchilaquisa. Jeralela cuchilaquinue. 24 Junni Jesús yalabe itsantinue:

—Amana Diosi tsachilabe trato quinae jutsa piyarino joyoeque. Junni in binori lachi asan joe tinue. In binoca tenca cato miintsan jochunae Diosi ya casan trato quica joeque. Lari layan tsachilachi tenchi asan larino joyoe tinue. 25 Junni nulabe tsarasica pachinayoe tinue: Binoca natiya mancuchituanae tinue Diosi mantananun tobi casan mancuchino fecári.

26 Junni Jesula fiesta ano fitobi, Diosica canta quetobi, Olibo tinun duca jilainue. 27 Junni Jesuri yalabe itsantinue:

—Amana quepen nula jeralela laca purato sujilaichunae tinue. Aman Diosichi Pilabinan junca itsanque chuteca joe tinue. Opisaca cuidaiminca totenan, yachi opisa epele ara cura jera sujilaichunaeque chuteca joe tinue. 28 Tsan josanan, lari puyatonan mansonhitobi, nulaca caquenan Galilea toca manjito, junbi nulabe mantulaiyanae tinue.

29 Jesús tsantinunsi, Pédrori itsantinue:

—Uyan jeralela nuca puralaquinasatiya, lari te, numanan nuca puratuanae tinue.

30 Junni Jesuri Pédrochi fiquica merasi itsantinue:

—Nube tsarasica pachinayoe tinue: Amana quepen nunan laca purachunae. Walpa apaca palu ne capatusanan, peman ne laca natiya miitoyoe tichunae tinue.

31 Pedro mantimini sonba pato, te, nube puyano jototiya, nuca numanan tsantituanae tinue. Junni weyan Jesube penenaminlanan jun tsanquenan palaquinue.

32 Junni Jesúlari junbi nechi jito, Getsemaní tinun postoca jilainue. Junni Jesús yachi tsachilabe itsantinue:

—Intele chudito meralarade! tinue la Diosibe rocainasa.

33 Junni weyanlaca junte chuteto, Pédroca, Jacóboca, Juanca nanni jabile tanjinue. Junni jilainato, Jesuri yalabe cuenta quinue. Duque laquiito wepanato, 34 itsantinue:

—Lachi tenca puyan tsansi laqui joto, case puyawiyanayoe tinue. Jun tenchi nulanan inte quirato chularana! tinue.

35 Junni Jesuri nasi cajisi, tobi mutsale telenhito, Diosibe rocainue yape jun mate padeseino jonunca polarisa. 36 Rocainato itsantinue:

—Apa Diosi, nu jera quino podeimin joe tinue. Junto jana tsanba pin copaca cuchichinaminca mancanun cuwenta, laca padeseisa caritude! Aman la tsantinasatiya, lachi tenca munate quituna! tinue. Nuchi tenca munateri quiniquina! tinue.

37 Junsi Jesús yachi pemanca tsachilachica manjanasa, catson tsominlanue. Junni Pédrobe itsantinue:

—Simón Pedro, ¿nuri catson tsoyun? ¿Moora nacátiya catsotuto mérano podeitiyun? 38 Nulari Diosibe rocaito, tencabe nenalarana! tinue jutsa quituchun. Nulachi tencabiri seque nenano munaratonan, pucari cumana jolajoe tinue.

39 Junsi Jesús manan manjito, Diosibe jun tsanquenan manrocainue. 40 Junni manan manjato quiranari, manan mancatson tsominlanue. Duque capiya taminlanue. Tsan joto, yalari luito Jesube niyaque manpano jonunca miitominlanue. 41 Junni Jesuri tsanque peman ne jin, manjan, itobi, yachi tsachilabe itsantinue:

—¿Catson tsoniralarayun? ¿Cajasainiilainayun? tinue. Michi joe. Cuwapono óra fee tinue. Lari tsachi ica jun joto seitonlachi cuwapoichinayoe tinue yape laca calaquisa. 42 Junni jisa! Mancupalaide! tinue. Aman quiralaquede! Laca cuwapono jun tsachi jana janae tinue.

43 Junni Jesús cacuenta quinasanan, Judas Iscariote fanue. Yari chunca paluca Jesube penenaminla jominue. Junni Júdabe duque israelítala pejalainue weyanlari chide tanla, weyanlari espada tanla. Aman mantá tan patelelabe, israelítala tala mantaca micariminlabe, mantá tan unicalabe, layaito ya tsachilaca Júdabe ereca jominlanue. 44 Aman Júdari Jesuca cuwapochun pejaminlabe itsantica jominue yape Jesuca miilaisa:

—La tsachi mancaca motito saludaiyanae. Yari Jesús jochunae tica jominue. Junni yaca cato, sele tanjilaina! tica jominue yape sujitusa.

45 Junni Júdari Jesúchica we quelo fato, Miya tito, motito saludainue. 46 Tsantinunsile uyanlari Jesuca chuito calaquinue. 47 Tsanlaquinasanan Jesube penenamin tsachi manca quelole wirurato, yachi espadaca laricato, mantá tan patelechi peyunca espadachi quito punquica balequinue. 48 Junni Jesuri yaca cachi timinlabe itsantinue:

—¿Ti quichun laca espada tanla, chide tanla, tarinminca cuwenta cabi jalainayun? tinue. 49 Lari ma cura nulabe Diosichi yabi micarito chumanyoe tinue. Junteri laca calaquitue. Aman Diosichi Pilabi chuteca joe tinue nulari laca tsanquinola joeque. Jun tenchiri amanari laca canilaquinae tinue.

50 Junni Jesús tsantinasale, jerale yachi tsachilari yaca purato jera sujilainue.

51 Junnasa juntelenan nalalan tsachi manca jalisiri awi jun Jesube pejinaminue. Junni Jesuca canaminlari yacanan cachinato, 52 jalile chuinasa, jali bale jinan, fupuca sujinue.

53 Aman junni Jesuca fe mantá tan patelechica tanjilainue. Jerale mantá tan patelelabe, mantá tan unicalabe, mantaca micariminlabe, junbi jera layaica jominlanue. 54 Aman tsan josanan, Pedro comabile benechi jito, patelechi sela fecári fenue. Junni selabi wisi, polisialabe chudito, nin pelobainaminue.

55 Junnasa mantá tan patelelabe, jerale mantaminlabe testicolaca munaraminlanue yape Jesuca culpa quilaquisa. Jesuca culpa quito totesa carichi tilatinue. Junni casaleri epenan culpa quichi tinaminlanue. 56 Layanlari Jesuca nene pato culpa quichi latinatonan, natiya culpa patarino podeilaitunue. Weyanla man tala pan, weyanlari uyan tala pan, quito, man parejori patulajonue. 57 Tsanlatinasa quiranari, weyanlari wiruito, Jesuca nene pato, itsantilatinue:

58 —Jesús Diosichi yaca seitonque pánaminca meralaquiyoe latinue. ¿Diosichi ya tsachila quica jun yari joco? tie latinue. Junni Jesuri Diosichi yaca jera araleto, peman mate casan ya manqueyanae tie latinue. Ya casan ya tsachila quica jun ya itochunae tie latinue.

59 Junni ya testicolanan man parejori palaquitunue. 60 Junni fe mantá tan pateleri quitsale wiruito, Jesube itsanque panhanue:

—¿Niyaito beconan pátiyun? tinue. In testicolari nuca duque culpa quilaquinae tinue. ¿Junni nuri niyan tichun? tinue.

61 Jesús mantimini nosasa wirurato, natiya beconan patunue. Junni pateleri manan manpanhato itsantinue:

—¿Nuri Diosi wenteca Cristo tinun tsachi joyun? tinue. ¿Se tinun Diosichi Nao joyun? tinue.

62 Junni Jesuri yayoe tinue. Junni nulari laca, tsachi ica junca, jamochi manquiralaquichunae tinue. Sonban Diosichi tsa tede nanchi mantato chuminca quiralaquichunae tinue. Laca jamochi poyobi manpatanaminca nulari quiralaquichunae tinue. 63 Junni Jesús tsantinunsiri, fe mantá tan pateleri duque paito, tencachique camisaca chilenue painanunca miilaisa. Junto itsantinue:

—Amana testicolaca munaralaratiyoe tinue. 64 Chiquilanan Jesús Diosica seitonque pánaminca meralaquiyoe tinue. ¿Junni Jesuca niyan tilatinayun? tinue.

Junni jerale mantaminlari Jesuca totentsan joe tilatinue.

65 Junni aman weyanlari Jesuca pipichi quilaquinue. Junsi yachi cacaca doto, yaca lucarito tedechi quito quirato, itsantilatinue:

—¿Mo nuca tedechi quinan? latinue. Diosichi mantate nuchi tencabiri miiniide! latinue.

Junsi polisialanan yaca tedechi quilaquinue.

66 Tsanlaquinasanan Pédrori selabi chusanan, fe mantá tan patelechi peyun sona jun quelole polenue. 67 Junni ya peyun sonari Pedro nin lobainaminca quirato, itsantinue:

—Nunan ya Jesús tinun Nasaret tsachibe penenamin joe tinue.

68 Junni Pedro mantimini itsantinue:

—Te, yaca miratiyoe tinue. ¿Mo jonhoncan? tinue.

Junni Pedro tsantisi, sela tamolan fecári jinue. Junnasari walpa apaca panue. 69 Junni ya peyun sonari Pédroca manan manquirato, junte raminlabe cuenta quito, ja tsachinan Jesube penenamin joe tinue. 70 Junni Pédrori manan manpanue natiya tsan itoyoeque. Junni nasi wanbile junte ramin tsachilari Pédrobe itsanlatinue:

—Nuri Jesube penenamin tsachi joda. Yala cuwenta Galilea tsachi joe. Nu Galilea tsachi cuwenta pamin joe latinue.

71 Junni Pédrori yalachi fiquica meráto Diosi mirasa pánayoe tito juraquito itsantinue:

—Lari nula pánanun tsachica natiya miitoyoe tinue.

72 Junni tsantinasaleri, walpa apaca manan manpanue. Aman Pédrori walpa apaca manan panunca merasi, Jesuchi fiquica mantenhinue. Jesuri Pédrobe itsantica jominue: Walpa apaca palu ne capatusanan, nuri laca peman ne miitoyoe tichunae tica jominhe. Junni Pédrori Jesús tsanticaca mantenhito, duque warenue.