1 Quendi Dihvo vo quechica ye esta̱do yahn Galilea. Hua nahn conan ye esta̱do yahn Judea, te sa̱hn ndina̱n yahn nación yahn Israel che vate se min ne, nahn ca̱hno se ihyan. 2 Ro min ne, a nda̱ nino vihco yahn vah cue che redin ihyan nación yahn Israel. 3 Tuhme ra̱hn dihno Dihvo vo ri ye ihyan:

―Cuique muhn, cuehn ya̱n Jerusalén ca̱va che namin ihyan che vate ye min, che ritahno ye di ne, ndihchero ye vederihno che redin. 4 Tihca̱, te cuahn che nahn vo che cadino ihyan yahn ntiyon che redin vo ne, va che ca̱hco ro vo. Chemin che tahque ndah, cuehn min, din vederihno na̱n che tahque ya̱hn ihyan rendo da̱ma ye.

5 Tihca̱ ra̱hn dihno ye, te nde ihyan chahn ne, hua ritahno ye ihyan. 6 Ndahconan Dihvo vo, ne ra̱hn ye ri ye ihyan:

―Metah nda̱ ura che cá̱hn, ate nchuhn ne, adecodehno ura che nahn ne, co ca̱hn ne. 7 Nchuhn ne, hua ta̱n ihyan nunde nduco ne, ate u che cua̱co ne, ta̱n ye nducó, te renevíh nunde yahn ye va̱cona̱n ye. 8 Cuahn nchuhn vihco. U ne, hua cá̱hn meniyon, te metah nda̱ ura che cá̱hn.

9-10 Chihno min ne, quenan ca Dihvo vo esta̱do yahn Galilea, ne cuahn dihno ye. Adive ne, cuahn che a chihno cuahn nducoya̱ca ihyan vihco me ne, tuhme cuahn ye dema̱n ye. 11 Sa̱hn ndina̱n yahn nación yahn Israel ne, rinuhn ndudo se ti quenan Dihvo vo. 12 A̱ma ya̱hn ihyan ne, rente ye yahn Dihvo vo. Na̱hn ye ne, ra̱hn ye: “Ihyan min ne, ndah ihyan ye.” Ate na̱hn ye ne, ra̱hn ye: “Hua ndah ihyan ye, te rihncheh ye ihyan.”

13 Nducoya̱ca ihyan ne, cua̱hn ndeh rente ye yahn Dihvo vo, yahn che va̱h che cadino sa̱hn ndina̱n yahn nación yahn Israel. 14 Cuahn che a menda̱hn vihco me ne, chenda̱ Dihvo vo chete ya̱co, cana̱n ricuahn ye ihyan. 15 Me sa̱hn ndina̱n chahn ne, a̱ma rahn ino se che a̱ma nda̱hca̱ ricuahn ye, ne ra̱hn se:

―¿Ti chehua ihyan tih che tihca̱ ricuahn ye?, te hua nahn ye escuela che rahn ihyan ricuahn.

16 Ra̱hn Dihvo vo ri ye sa̱hn:

―Che ricuáhn ne, ndiyu che cuande yahn má̱n, te che cuande yahn Dendiohs, ihyan min che dechuh ye u. 17 Ihyan che nahn dinahn ye che rihquentiyon Dendiohs ne, conahn ye te che ricuáhn ne, che cuande yahn Dendiohs, ihyan min che dechuh ye u, ndiyu che cuande yahn má̱n. 18 Ihyan che ricuahn ye vededevano yahn ma̱n ye ne, che nahn ye ne, che ndeva ihyan yavena̱n ye. Ate ihyan che ricuahn ye ca̱va che quenda̱h yavena̱n ihyan che dechuh ye ihyan ne, ricuahn ye numa cua̱co.

19 ’Moisés ne, dirun ye ley, chihco ye yahn nchuhn, ate nde a̱ma ne hua redinahn ne. Tahque ndah ne ne, nahn ca̱hno ne u.

20 Ndahconan ihyan chena̱hn, ne ra̱hn ye ri ye ihyan:

―Co quenun vaco chihnga̱ ndih, ne chemin che tihca̱ ra̱hn ne. ¿Duh nahn ca̱hno ndih?

21 Ra̱hn Dihvo vo ri ye ihyan chahn:

―Yahn a̱ma vederihno che dín ro che rahtetuhno ihyan ne, a̱ma rahn ino nducoya̱ca nchuhn. 22 Moisés ne, dirun ye yahn ley che renan seña nchuhn, nduhca̱ che chihquentiyon Dendiohs ihyan ndico yahn ye. Chemin che raconahn ne seña checa̱hya, andahre ro che rahtetuhno ihyan. 23 Nducote raconahn ne seña checa̱hya, andahre ro che rahtetuhno ihyan ca̱va che hua cuahcota̱hn ne yahn ley min ne, ¿me dehco che ri ta̱n ne nducó, yahn che ro che rahtetuhno ihyan dín che ndoyahn a̱ma sa̱hn che rechuhrihn se? 24 Ndotenan che nda̱hchenan nchuhn ne, cuendedecadino ndah ne, ne tumacadino ne che nda̱hca̱ redín.

25 A̱ma o ihyan che vate ye ya̱n min che a devano ye che nahn ca̱hno se Dihvo vo ne, retumerune vih ye:

―¿A ndiyu ihyan tih che rinuhn se ihyan, che nahn ca̱hno se ihyan ne? 26 Ma̱n ne, nga̱ ye, quenun ye ta̱n ricuahn ye, ne hua duhva retumaca̱h ihyan, ca̱va che co ye preso. A din ndete che, a nduco ihyan ndina̱n yuhn vo, ritahno ye che ihyan tih, che a va ca̱de che chi ye ndedevahn ye ihyan iyehnse. 27 Ate ndiyu ihyan tih chemin, te uvo ne, a devano vo ti chica ye. Cuahn che nda̱ ihyan min ne, nde a̱ma ihyan hua co devano ye ticua̱hn quenda̱h ye.

28 Dihvo vo ne, chihnevan ye che tihca̱ rente ihyan chahn. Tuhme a̱ma dito ra̱hn ye:

―Nchuhn ne, ra̱hn ne che a rendihche ne u ma̱n, a devano ne ti chicá ma̱n, ate ndere ra̱hn ne chemin. Ndiyu che cuande yahn má̱n che cochí, te cochí che cuande yahn Chidá, ihyan min che quenan cuma ye vederihquentiyon che a̱ma chahte, ihyan min che nde hua rendihche ne ihyan. 29 U ne, a rendihché ihyan, te a na̱n ye quenán, ne a ma̱n ye dechuh ye u.

30 Cuahn che chihnevan sa̱hn ndina̱n chahn che tihca̱ ra̱hn ye ne, nahn din se preso ihyan, ate nde a̱ma se, hua chihquino se din se preso ihyan, te ro min ne, metah nda̱ ro yahn ye che ca̱hno se ihyan. 31 Va̱n ihyan chahn ne, a̱ma ya̱hn ihyan chitahno ye ihyan, ne ra̱hn ye:

―A ihyan cuh che a va ca̱de che chi ye ndedevahn ye ihyan iyehnse, te ¿a chi ta̱ma ye che tahque din ca ye vederihno che co ihyan cuh?

32 Checadino sa̱hn fariseo che rendonan ihyan ya̱n Dihvo vo. Chemin che nte ca̱de se nduco chidocuya̱n ndina̱n, ne dechuh se policía yahn ya̱co, ngua se ihyan, co ye preso. 33 Cuahn che nda̱ se ne, ra̱hn Dihvo vo:

―Conan cá te neve ro nduco nchuhn, tuhme ná̱hn na̱n Ihyan che dechuh ye u. 34 Nda̱ ro min ne, nuhn nchuhn u, ate hua nta̱ca ne u, te hua co ca̱hn ne na̱n che conán.

35 Tuhme rente sa̱hn chahn va̱n ma̱n se nduco vih, ne ra̱hn se:

―¿Ti ra conan ihyan tih che ra̱hn ye che hua nta̱ca vo ihyan? ¿A ndihco ye che ca̱hn ye va̱n ihyan nación yuhn vo che chenan ye nación chena̱hn? ¿A min conan ye, cacuahn ye ihyan nación chena̱hn chahn? 36 ¿Deh conahn che tihca̱ rahn ye che nuhn vo ihyan, ne hua nta̱ca vo ihyan, te hua co cuhn vo na̱n che conan ye?

37 Ro vihco chahte me ne, chandi Dihvo vo na̱n nducoya̱ca ihyan, ne cahndudo ye:

―Adecoduhno ihyan che ya̱ca ye ne, chi ye ná̱n, cá̱h nune, cuh ye. 38 Nduhca̱ che a ndirun na̱n Ndudo yahn Dendiohs ne, ihyan che cotahno ye u ne, cuahtenan cuma ye vederihquentiyon, anduhneca̱ a̱ma nune che hua retihnan.

39 Che tihca̱ ra̱hn Dihvo vo ne, ca̱h ye, checadino ihyan, che ihyan che cotahno ye ihyan ne, conun Vaco Ndah yahn Dendiohs ihyan. Ro min ne, ametah co Vaco Ndah yahn Dendiohs, te metah na̱hn Dihvo vo vahchetero.

40 Cuahn che a chihno ca̱h cuande Dihvo vo ihyan ne, na̱hn ihyan ne, ra̱hn ye:

―Cua̱co niyon che ihyan tih, ihyan profeta che a va ca̱de che chi ye.

41 Na̱hn ye ne, ra̱hn ye:

―Ihyan tih ne, a ma̱n ihyan min che a va ca̱de che chi ye ndedevahn ye ihyan iyehnse.

Ate na̱hn ihyan ne, ra̱hn ye:

―Hua cua̱co chemin, te ihyan min che a va ca̱de che chi ye ne, ndiyu esta̱do yahn Galilea quenda̱h ye, 42 te na̱n Ndudo yahn Dendiohs ne, a ndirun che ihyan min ne, na̱n nda̱ta yahn rey David quenda̱h ye ma̱n, cuhndeya̱n ye ya̱n Belén, ya̱n va̱co David ma̱n.

43 Tihca̱ chi che a vih ra̱hn a̱ma, a vih ra̱hn ta̱ma ihyan chahn, yahn Dihvo vo. 44 Va̱n ihyan chahn ne, chenun a̱ma o se che nahn din se preso Dihvo vo, ate hua chihquino se.

45 Sa̱hn policía chahn ne, ndaconan se na̱n che chenun sa̱hn fariseo ma̱n, chidocuya̱n ndina̱n ma̱n. Tuhme ra̱hn se ri se sa̱hn policía chahn:

―¿Dehco che hua quenda nchuhn ihyan min?

46 Ndahconan sa̱hn policía chahn, ne ra̱hn se:

―Hua quenda nuhn ihyan, te nde a̱ma yune hua nihnevan nuhn che ricuahn ihyan nduhca̱ che ricuahn ihyan min.

47 Ra̱hn sa̱hn fariseo chahn ri se sa̱hn:

―Namin nchuhn ne, co a ca̱h yune ne che chihnecheh ye nchuhn. 48 Cuedevano ne, te nde a̱ma nuhn, hua ritahno nuhn ihyan min. 49 Sa̱hn ya̱n sih ne, hua devano se ley che dirun Moisés, ne chemin che ndinda se.

50 Va̱n sa̱hn ndina̱n chahn ne, ndi cuande a̱ma ihyan fariseo che duche ye Nicodemo. A ihyan min che chahn ye a̱ma vino, chendihchero ye Dihvo vo. Ihyan min ne, ra̱hn ye ri ye combiero yahn ye:

51 ―Ley che riquendi vo ne, rihquentiyon che hua co ca̱hmo vo che a ndinda a̱ma ihyan numanahn che metah cadino cua̱co vo deh nunde yahn ye va.

52 Ndaconan se yahn Nicodemo, ne ra̱hn se:

―¿A namin nduco di chique esta̱do yahn Galilea? Condihchenen na̱n Ndudo yahn Dendiohs, ne cadine te nde a̱ma ihyan profeta hua quenda̱h ye min.

53 Chihno min ne, cona̱hn queri a̱ma se ndeva̱co se.