1 Nte Dihvo vo a̱ma ejemplo, chihnevan ihyan chahn, ca̱va che cadino ye te va che cova̱h ye cuahn da̱ma. 2 Ra̱hn ye:

―A̱ma cua̱n ya̱n ne, chihnde a̱ma juez che nde hua ritahno se Dendiohs, nde hua retumaca̱h se yahn ihyan. 3 Namin chihnde a̱ma nda̱hta va̱h ya̱n min, ne ndeh yune rahn te na̱n juez min, ne ra̱hn te: “Cochí rica nundé yahn a̱ma ihyan che hua ri rendihche ye u.” 4 Chuh ro, ne hua tumeca̱h juez me, techeca̱de se yahn te. Ate adive ne, ndedecadino se: “Andahre hua ritahnó Dendiohs, nde hua retumacá̱h yahn ihyan, 5 ate nducote ta̱hn nda̱hta va̱h tih a̱ma renda̱ te redenduh te u ne, techeca̱dé yahn te, ca̱va che hua quendi te denduh te u.”

6 Tuhme ra̱hn Dihvo vo:

―Cuihco nchuhn cuda̱do nduhca̱ che ndedecadino juez me, andahre duhtuno ihyan se. 7 ¿A ndiyu tahque nun conan Dendiohs ihyan che a tenda̱hnun ye? Dendiohs ne, hua rechuhrihn ye, andahre nde ro nde ra̱hn, reva̱h ihyan na̱n ye. 8 Cua̱co rá̱hn rí nchuhn te Dendiohs ne, nun conan ye ihyan yahn ye. U che rinducó nducoya̱ca ihyan ne, ¿a nda̱cá ihyan che ritahno ye u ro che ndá̱ ne?

9 Nte Dihvo vo ejemplo cuh ca̱va ihyan ya̱de che renda̱hchenan ye ihyan chena̱hn. Ra̱hn ye:

10 ―O se ne, chenda̱ se chete ya̱co, cova̱h se. A̱ma se ne, sa̱hn fariseo, ne ta̱ma se ne, sa̱hn rica tume ca̱de iyo. 11 Sa̱hn fariseo me ne, chandi se reva̱h se tuhca̱: “Dendiohs, nundihve cuahn ndih che din ne che u ne, ndiyu nduhca̱ ihyan chena̱hn, te rahtendihco ye nunde ma̱n, reduco ye ma̱n, redin duche yahn ye che nihneva̱co ye ma̱n. U ne, ndiyu nduhca̱ sa̱hn rica tume ca̱de iyo tih. 12 U ne, o yune rihnde ya̱hté che a̱ma ndate, ne rihcó riya yahn nducuahn che va yáhn na̱n ne, nduhca̱ che a ndihco ca̱de ne.” 13 Ate sa̱hn rica tume ca̱de iyo me ne, nde hua rihquino se ca̱hn nda̱ se na̱n ta, nde hua nahn ndonihyon na̱n se yahn che cuihna̱n se. Chendih se, chahn se ticua se, ne ra̱hn se: “Dendiohs, ¡cuenan va̱hino ne u!, te a̱ma quendihcó nunde na̱n ne.” 14 Cua̱co rá̱hn rí nchuhn te sa̱hn che necun me ne, a nchahco Dendiohs yahn se, ne cona̱hn se. Ate sa̱hn che ya̱de me ne, hua nta̱ca se vederenchahco. A tihca̱ va ca̱de, te adecoduhno ihyan che rendeva ma̱n ye yavena̱n ye ne, co cuihna̱n ye na̱n Dendiohs, ne adecoduhno ihyan che necun ye ne, ndeva Dendiohs ihyan.

15 A̱ma ro ne, nda̱ ihyan, nda ye checa̱hya yahn ye ca̱va che nahn ta̱h Dihvo vo, cova̱h ye ca̱va. Ate ihyan apóstol ne, hua nahn ca̱h yune ye che ca̱hn nda̱ ihyan chahn na̱n Dihvo vo. 16 Tuhme cah Dihvo vo ihyan apóstol chahn na̱n ye, ne ra̱hn ye:

―Hua ca̱hdenun nchuhn yune yahn checa̱hya che chi ná̱n, te dema̱n ihyan che necun ye nduhca̱ checa̱hya sih renevahnecun ye che rihquentiyon Dendiohs ihyan. 17 Cua̱co rá̱hn rí nchuhn te adecoduhno ihyan che hua necun ye nduhca̱ checa̱hya ne, hua co nevahnecun ye vederihquentiyon yahn Dendiohs.

18 A̱ma sa̱hn ndina̱n ne, tumerune se Dihvo vo:

―Ihyan Ricuahn Ndah, ¿deh va che dín ca̱va che conán vahchetero numacuahn ro ne?

19 Ndahconan ye:

―¿Dehco che rahn che ndah u? Metah nde a̱ma ihyan che ndah ye, atena̱n Dendiohs. 20 A devene vederihquentiyon yahn Dendiohs: “Hua cahne ihyan. Hua din doche yehn che nihnevaque. Hua doque. Hua cahme ndudo cuahnde. Cuendeva yavena̱n chide ma̱n, cheque ma̱n.”

21 Ra̱hn se ri se ihyan:

―Nducuahn vederihquentiyon cuh ne, redináhn nde ro che lihn u.

22 Chihnevan Dihvo vo che tihca̱ ra̱hn se, ne ra̱hn ye ri ye sa̱hn:

―Va ca ta̱ma na̱n che va che din. Condihcue nducuahn che va yehn, ne cuinen ihyan cheva̱h ca̱va che co conen vahchetero. Tuhme cochi, condoque u.

23 Cuahn che chihnevan se che tihca̱ ra̱hn ye ne, a̱ma chi nda̱che se, te a̱ma cuihca se. 24 Ndihchero Dihvo vo che a̱ma chi nda̱che se, ne ra̱hn ye:

―Ihyan cuihca ne, ¡a̱ma va̱hche ca̱va ye che nevahnecun ye che rihquentiyon Dendiohs ihyan! 25 Nde hua co nevahnecun ye. 26 Ihyan che chihnevan ye che tihca̱ ra̱hn Dihvo vo ne, ra̱hn ye:

―¿Duhra ihyan co ndevahn ye tuhme?

27 Ndahconan Dihvo vo yahn ye:

―Nducuahn che hua co din ihyan ne, Dendiohs ne, ri redin ye.

28 Tuhme ra̱hn Pedro:

―Ndihche ne, a chihcoma̱n nuhn nducuahn che va yahn nuhn, ne chinduco nuhn ndih.

29 Ra̱hn Dihvo vo ri ye ihyan chahn:

―Cua̱co rá̱hn rí nchuhn te adecoduhno ihyan che rihcoma̱n ye a va̱co ye ma̱n, a indihte yahn ye ma̱n, a dihno ye ma̱n, a ihyan nda̱hta yahn ye ma̱n, a da̱ya ye ma̱n, ca̱va che co nevahnecun ye che rihquentiyon Dendiohs ihyan ne, 30 ihyan min ne, tahque ndeh ca nuhnde menun yahn ye ma̱n ro cuh, ne adive ne, conan ye vahchetero numacuahn ro.

31 Nedin da̱ma Dihvo vo nduh che ndichio ihyan apóstol yahn ye, ne ra̱hn ye ri ye ihyan:

―Ma̱n ne, cuhn vo nduco nchuhn ya̱n Jerusalén. U che rinducó nducoya̱ca ihyan ne, min va che chuhríhn nduhca̱ che dirun ihyan profeta nde ro mena̱n. 32 Neca̱h ihyan u ta̱h sa̱hn ta̱ma nación, din duche yahn se u ma̱n, din ta̱n se nducó ma̱n, ca̱hnan dan se u ma̱n. 33 Cuihno cuahn se u ne, ca̱hno se u. Ate cuihno ino ro ne, ntuché va̱n tena̱hn.

34 Ihyan chahn ne, hua chenahn ye che tihca̱ ra̱hn Dihvo vo, te va̱hche ri yahn ye ca̱va che conahn ye.

35 Ura che cuahn nino Dihvo vo ya̱n Jericó ne, a̱ma sa̱hn na̱n ve ne, va se chihto yune, rica se che din ihyan vedeva̱hino nduco se. 36 Nducote a̱ma rechuh ihyan yune ne, tumerune se deh ri. 37 Ra̱hn ihyan ri ye sa̱hn:

―A ta̱n cochi Jesús yahn ya̱n Nazaret.

38 Tuhme ra̱hn se numa dito se:

―Jesús, Da̱ya David, ¡conan va̱hino ne u!

39 Ihyan che nda̱hna̱n ye ne, ra̱hn ye ri ye sa̱hn che cuhnde dihn chende se. Ate nde tahque yudo na̱n se ra̱hn se:

―Da̱ya David, ¡conan va̱hino ne u!

40 Tuhme chandi Dihvo vo, ne tahve ye che chehua sa̱hn. Cuahn che nda̱ se na̱n ye ne, tumerune ye sa̱hn:

41 ¿Deh nehn che dín ndoque ne?

Ndahconan se yahn ye:

―Dihvé, codin ne che co ro ná̱n.

42 Tuhme ra̱hn Dihvo vo ri ye sa̱hn:

―Nducote chitehne ne, a co ro nan.

43 Ndeta̱hno chi ro na̱n se, ne cuahn se nduco Dihvo vo, rendeva se numacuahn vedeyeno yavena̱n Dendiohs. Namin nducoya̱ca ihyan che ndihchero ye vederihno me ne, rendeva ye numacuahn vedeyeno yavena̱n Dendiohs.