1 Te Hesekia aga king pedelali sogo agai kibu be 25 elaluali, tama aga Jerusalemde king bidibadi kibu be 29 yali. Aga ida te Abiya dao, te Sekaraiago wegi dao. 2 Hesekiago Genuai Bidigo gedude wiegi yai kolesaga yali, te aga wąį king Devitgo yali tiwai yali.

3 Te Hesekia aga king bidali sogo te namba wan kibu bede te namba wan poluade, te kibu bede agai Genuai Bidigo tempel be sunumi ma dayali, tama agai bidi mebabolo te sunumi ma dodolao po wali. 4 Tialima agai te pris hani meba me Livai hani augwali te Genuai Bidigo Bede giliga asobo badu te bidi sisinagasabo pesageba sisinagasao po wali. 5 Tama agai augwalibolo te po wali, “Dage Livai dabe, dage duga digi Genuai Bidibolo maiąo, te dago wąį dabego Godibolo. Tama te tempel be te agaduba be mu sa muao. Tama dagego Godigo gedude te be meda ilibo doado bage dabe sese buluba sela sąyao. 6 Dago wąį dabego dago Genuai Bidi dago Godigo po bugagia mu me wali pabeo, tama augwaligo agai gedude dolo isąwai kolesaga iyu yalio. Augwaligo God tagalama, tama augwali aga bidibo be taga peyu, tudi ola mawai dao. 7 Tama augwaligo Genuai Bidigo be sunumi dabe paliali, tama lam dabe sula sanama tagalali. Tama augwaligo wiegi yai denami hano holobo wiegi yai pauda me ulubeo. Tama augwaligo isigo mu dela silibo ofa ulubeo, te Israel dabego Godigo alta daide,” te po wali.

8-9 Te Hesekiago po me wadolama te po wali, “Te Juda dabe me Jerusalem dabe augwaligo te dwai kolesaga yali. Tama tibaso, Genuai Bidigo augwali dali sębę elama, tama agai augwali dene mawai dao. Agai te boi bidi dabe tagala palama, dago aya dabe ela silimainu yalio. Tama augwaligo dago we dabe me wai dabe kalabus elama, augwa kantriba odasa pai dao. Tama te gasa hani we bidigo Genuai Bidigo dago te taun dabeba te sę yali po odobo si da, teda augwali homu hauwa mu elama, wi geninama ma ebo dao. Dago te bugagia mu koneani dao,” kingo te po wali.

10 “Tama tialima, eno homugo dago megi da Israel dabego God dali wadolama bidabo po dąų wainao, tama agai da dali sębę munu me egobeo. 11 Dage te pris dabe me Livai dabe, dagego te koneąo, Genuai Bidigo dage agai sę emainu sa muai dao. Dage Genuai Bidigo gedude dolama tama agai sę yabo te elalubao, tama te we bidigo agaba mu lotu omainu ola maiabo te elalubao, tama me te wiegi yai hano holobo ofa yabo me te dao. Tialima dagego te sę bugagia mu yao,” Hesekiago te po wali.

12 Te Livai dabego te kingo po odali bagego nogi e dao. Mahat te Amasaigo ogwa, me Joel te Asariago ogwa. Te augwali si te Kohat hani wąį bidi dao. Me Kis te Apdigo ogwa, me Asaria te Jehalelgo ogwa, augwali si te Merari hani wąį bidi si dao. Me Joa te Simago ogwa, me Iden te Joago ogwa dao, augwali si te Gerson hani bidi si dao. 13 Me Simri me Juel te Elisafan hani bidi, me Sekaraia me Matania te Asap hani bidi, 14 me Jehuel me Simei te Heman hani bidi. Tama me Semaia me Usiel te Jedutun bidi hani dao. 15 Te Livai dabe augwali hogodama, augwa haniba pelama, augwaligo augwa digi Genuai Bidigo gedude wiegi yai pedalobo kolesaga wali pali. Augwali wiegi yai pedalama, tama augwaligo Genuai Bidigo bomai po wali peyu, tama augwaligo Genuai Bidigo tempel be dodolali, te kingo augwalibolo wali gilama tama tiali. 16 Tama tilama, te pris dabe augwali Genuai Bidigo tempel be tomoba pali, tama augwaligo Godigo gedude meda yai nai dabe sese sela sąyani. Augwaligo te nai dabe te genuai sisinibo pesage te Genuai Bidigo be gesabidi baduba sesali. Tama Livai dabego te nai dabe tolasa Jerusalem bulu badu pelama, te Kidron Odogo Malu buluba sągi pali. Tama nosali te pris dabego te be Genuai Bidigo gedude wiegi yai ma ilali. 17 Augwaligo te sę te dei namba wan te namba wan poluade te sę gagalali, te Genuai Bidigo obo tomode elalubo nai dabe wiegi yai ilimainu. Augwaligo sę ela pidubadi, dei namba 8 teba sabolali. Tama augwali te be sunumiba sabolali. Tama augwali gasa 8 sogo ma sę yali, te Genuai Bidigo be aga gedude wiegi yai ma pedalomainu. Tama augwaligo te sę te dei namba 16de silali. Tama te be augwaligo Genuai Bidiba lotu wabo usu elama sisi yai elaluali.

18 Te pris dabe me Livai dabe augwaligo sę silibo si da, teda augwaligo te king Hesekia sugi pali, tama agabolo te po wali, “Dago te Genuai Bidigo tempel bede tigidali nai dabe sese wiegi yai ilai dao. Te isigo sese dela silibo ofa ebo alta, me te altago doado bage dabe, me augwaligo Godibolo mabo bret mubo tebol, me te tebolgo tigidali doado bage dabe sese tama wiegi yai pedelali. 19 Tama me dago te king Ahas agai God tudi ola menama Genuai Bidigo bede sela sąwani te dis dabe me plet dabe, dago te nai dabe sese tama ma Genuai Bidigo beba ma sesalio, tama Genuai Bidigo gedude te nai dabe wiegi yai ma ilalio. Tama dago te Genuai Bidigo alta pąde munama elalubao,” wali.

20 Te king Hesekia agai te po oda selama, tama kigamu hulide mu agai te Jerusalem bulu tobolu bidi dabe sisinagasao po wali. Sese tama sisinagasobo si da, teda agai augwali sese tama Genuai Bidigo beba odasa pali. 21 Tama augwaligo te 7 kau kibu omai, me sipsip kibu omai te 7; te 7 sipsip kibu gǫų, me te 7 omai meme kibu augwali peyu tama selasa pali. Te a naga olama si te meme kibu omai te Juda we bidi me king aga hani we bidigo sęgę sela sąyabo sela pali, me te be te Genuai Bidigo mu dao wabo dali tama sali. Tama kingo te Arongo hani pris bidi dabebolo te hasa dabe te Genuai Bidigo altade ofa yao po wali. 22 Tialima augwaligo te 7 kau kibu omai bolo hasia elali, tama te kau dabego kaneme te pris dabebolo mani, tama augwaligo te kaneme altaba sąyani. Tama augwaligo nosali te 7 sipsip kibu omai me te 7 sipsip kibu gǫų dabe augwaligo elali, tama augwaligo te sipsip dabego kaneme me te alta daiba sąyani. 23 Tama nosali king dali te bidi dabe dali augwali dolaluali, tama augwaligo te 7 meme kibu omai sesali, tama te king me te bidi dabe augwali deli deligo nogo te meme kibu tigiba nogo muyu ela pali. 24 Tama tialima, te pris dabe augwaligo te 7 meme kibu elama, tama augwaligo kaneme te alta daiba segeni sąyani. Te Israel dabe sesego sęgę sela sąbo ofa tiwai yali. Magi baso meni, kingo te po wali, “Te sęgę sela sąbo ofa me iside sese dela silibo ofa, te Israel we bidi tau sabo ofa dao,” wali

25 King Hesekiago polobadu Genuai Bidigo profet Gat me Natan sigo pedauwalidu mani po te Devitbolo mani po wali pali, tama agai te Livai dabebolo olama tama augwaligo te musik elebo te gita dabe selama, Genuai Bidigo tempel be tomoba dolalugi pali. 26 Tialima te Livai dabe augwali dolaluyu, te gita dabe te Devit te Israel dabego kingo sabilali nai tiwai tolaluali. Tama te pris dabe augwali dali dolaluyu, augwa biugel bu wabo nai tolaluali. 27 Augwali dola selama usu elalubadi, Hesekiago te pris dabebolo te isigo sese mu dela silibo ofa yao po wali. Tama augwaligo te ofa ebo gagalobadi te Livai dabego Genuai Bidiba wiegi yai homu ebo tęąbi po gagalali. Tama te pris dabe augwaligo biugel bu weyu, me te Livai dabego augwa gitago wiegi yai musik eliyu me tama yali. 28 Tama te we bidi tigidali augwaligo Godiba lotu weyu, me Livai dabego tęąbi po weyu, me te pris dabego biugel bu weyu yali, tialima augwaligo te tama sę ela pidubadi te isigo dela silibo ofa mu siligi paboba usu nigi pali. 29 Te augwaligo te ofa ela silibo si da, teda king Hesekia me te we bidi augwaligo bogoli sugunama Godiba lotu po wali. 30 Tama king me tobolu bidi dabe augwaligo te Livai dabebolo te Devit de profet Asap sigo asęani tęąbi te Godigo nogi ugwaba sabo tęąbi po wao wali. Tialima te Livai dabe augwali wiegi yai homu hauwa mu iyu, te tęąbi po dabe tama wali. Tama nosali augwali bogoli sugunama, Godiba lotu po wali.

31 Tama nosali Hesekiago te sisinalubo digi bidali we bidibolo te po wali, “Megi dage duga digi duga Genuai Bidibolo te mani dao. Tama tialima, dagego Genuai Bidi dali homu deli ebo ofa siyu, me Genuai Bidibolo buba hwi wabo ofa siyu elama, Genuai Bidigo beba sesao,” wali. Tialima te we bidigo te kingo po wali pelama, augwaligo te ofa dabe sesali. Tama me badugo te isigo mu dela silibo ofa yainogo yali. 32 Tama augwaligo 70 kau kibu omai, me 100 sipsip kibu omai, me 200 sipsip kibu gǫų sesali, te Genuai Bidiba ofa yabo. 33 Tama me augwaligo 600 kau kibu omai me 3,000 sipsip kibu omai Genuai Bidiba sesali, te ofa tiwai yali. 34 Te pris hani dwasianugo naga Genuai Bidigo gedude wiegi yai pedalobo kolesaga yali. Tama tialima te ofa ebo kibu dabe elebo sęgo augwali edelali. Tama tibaso, te Livai dabego augwali te kibu dabe elebo tau sali, te sę polo silimainogo. Te tama tiali po page da e dao. Te Livai dabe augwali augwa digi Genuai Bidigo gedude wiegi yai pedalobo kolesaga polo yalio. Tiali goli te pris dabe augwaligo polo yai menio. Nosali da te pris dabe augwali augwa digi Godigo gedude wiegi yai pedalobo kolesaga yali. Tama te Livai dabego te sę me ebeo. 35-36 Te pris dabego iside mu dela silibo ofa hauwa mu yali. Tiali goli augwaligo te sę deli naga ebeo. Menio. Augwaligo homu deliba ebo ofa kibu ili me ulali, tama augwaligo te we bidigo te isigo mu dela silibo ofa dali ulabo wain me augwaligo sali, tama augwaligo ofa tiwai gelali. King Hesekia me te we bidi augwaligo Godigo augwali tau selama, te sę dabe polo silimainu yali kone palali. Tialima augwaligo Godiba wiegi yai homu pemene mu yali. Tama te kolesagago augwaligo te ofa ebo kolesaga me Genuai Bidigo tempel be tomode lotu wabo kolesaga ma gagalali.