1 Tama nosali bidi mebago Joapbolo te tama po wali, “Devitgo te Apsalomde homu dene mu ebaso, tama gela wabo sę idubao,” wali. 2 Tama te sogo te Devitgo ami bidi dabego te tama tiwai po odali, te king Devitgo te aga ogwa Apsalomde homu dene ebo gela udubo po odobaso, tama augwa te hwįanide te wiegi yai homu pemene yali tiwai ma ebeo. Menio, augwa haliga sęgę elaluali. 3 Tama te ami bidi dabe augwa te hanuba ma begasa asiyu, te dua dua mu asiyu, te hwįbo side wi aselabo ami bidi dabe tiwai elama, tama genuai hale dali elasa asasawai dao. 4 Tama te sogo te kingo aga gesabidi halua selama, tama homu dene ebo sę ebaso, te bomonama i weyu, te tama po wai, “O eno wainu, Apsalom. O Apsalom, eno wai, eno waio.” Te tama po wai.

5 Tialima, Joap te kingo beba pelama, tama agaba te tama po wai, “Odao. Megi nago te naga ami bidi tigidali te dwai hale mu ilibo sę yalio. Te sogode naga te bidi dabego nage tau salio. Tama nage dali, te nago we wai, me te nago si wali we hani dabe dali, te dage tigidali me dolobeo. 6 Tiali goli, nago te nage wei eyu godolo ebo bidi dabe te nago godolo ebo meni, tama nago te nage godolo meni sabo bidi dabe, te nago augwali godolo ebo da. Te nago kolesagade dabolo te tama tiwai dolo ola mani, nago homugo te naga ofisa dabe, me ami dabe te olo nai tiwai da homu ebao. Tama eno koneani, te Apsalom bidibadi, tama da tigidali isigi sogo da, teda tego nago homu wiegi yai pemene iligi dao,” Joapgo te po wali.

7 “Tialima, odao. Nage hogodasa pelama, te ami bidi dabe wiegi yai homu pemene ilabo po migi pao,” wali. “Te Genuai Bidigo nogide, eno mu po tama obao, te nago tama tisąyu da, teda te sogo hulide te tigidaligo nage taga pobaso, tama nage sęgę genuai mu saibao. Tama te sęgęgo te nage gesi ogwa bidide bidibadi nageba te pedelali tigidali sęgę te aiyaba elaluama, tama megi e sogoba usu nagasaibao,” wali.

8 Joapgo po ola simanobo si da, teda king Devit hogodasa pelama, te taun hanuba pabo sunumi pąba duagi pai. Tama aga ami bidi dabego tama po odali, te king aselama, te taun hanuba soabo sunumi pąba duayagaselama, tede bidibo po odai. Tama tibaso, te ami bidi dabe pelama, aga dali hodobo bidigi pai.

Te tigidali Israel dabe wi pelayu, te augwa bidali deli deli buluba ma pela silalio. 9 Tama te tigidali Israel hani we bidi augwa hasi tomode digi te konila po wai. Tama mebago te tama po wali, “King Devitgo te da tau selama, tama te Filistia dabego, me te gasa boi bidi dabego te da me dolobeo. Tiali goli, aga te Apsalomde wi peyu, tama dago bulu tǫ pedai taga pai dao. 10 Dago te Apsalom te dago king bidi pedalumainu nigilali, tiali goli augwa te hwįnama, tama augwaligo te aga ela muai dao. Tialima, magi baso te da olo tama bidiyu, tama dago te king Devit ma oda sigi pisąma ebawe?” Augwaligo te po wali.

11 Bidi mebago te Israel dabego te wabo po te Devitba walali, tama tibaso, king Devitgo po te pris Sadokba me te pris Abiatarbolo ola tolu, te tama po wai. “Eno homugo dagego eno po Juda bage tobolu bidi dabeba pusumainu homu ebao. Ena ede bidiyu, tama te Israel dabego wabo po eno odali. Tialima, magi baso dage Juda bagego te Israel hani dabego te polasa enaba hanalu, te ena eno beba ma asomainu ebo po omainu sula tagalu gogolobawe? 12 Da tigidali te deli kaneme dao. Tama tiyu, magi baso dagego te gasa bidi dabe te dageba poligi somainu elama, tama ena ma odasa asomainu ebo po omainu ebo dawe?” 13 Tama me Devitgo te pris siba po waliyu, te tama po Amasaba omainu yai, “Dadi si te deli kaneme dao. Eno nago te Joapgo pesage selama, tama eno ami dabego polalubo ofisa bidi nigilaibao. Te eno tama tisąbaso da, teda Godigo ena ela mumainu yaibao,” wali.

14 Tialima, Devitgo te wali pogo te Juda bidi dabe tigidaligo homu kekebaso, tama augwaligo agaba te tama po ola tolali, “Dago homugo te nage naga hani dabe dali, dage tigidali te Jerusalemba ma asomainu homu ebao,” wai. 15 Tialima, Devit dali, aga hani dabe te hogodama, palima, tama te wę Jordanba sabolali. Te Juda bidi dabego Devit te wę Jordan nogebo sogo, te Devit dali gesabidi deliba unulabo homu yai. Tama tiyu, augwali pelama, tama te wę Jordan pąde te bulu Gilgalba tonalugi pai dao. 16 Tama Simei, te Gerago ogwa, aga te Benjamingo hani bidi, tama aga te bulu Bahurimdu asai, aga te Juda dabe dali polo asesa, te Devit dali deliba gesabidi unulainu asai. * 2 Sml 16:5-13 17 Tama te Benjamingo hani bidi 1,000 te aga dali asai. Tama me, Siba, te Solgo hani sibi dabego sę bidi me, te aga ogwa dabe te 15 ogomani, me te aga sę bidi te bidi sese deli badi, tama augwa bolo asesa pelama, te king Devit asisąbadi, te wę Jordanba polasa sabolai. 18 Tama augwa te kingo we wai hani sibi dabe te wędu edaba nogebo te tau sainu yali. Tama augwa te tigidali sę yali te kingo homugo emainu ebo sę naga te augwaligo yalio.

Te king aga wę nogeainu sisi ebo sogo, tama Simei aga aselama, te aga gesabidi te king pąde te tǫba pǫgulali. 19 Tama Simeigo te tama po kingba wali, “O, genuai bidi, eno homugo te nago eno yali dwai sę tagalumainu homu ebao. Tama nago te Jerusalem taga soyu sobadi, te eno nageba yali dwai sę te nago homude munu ma homu kone palamuo,” wali. “Eno homugo nago eno te dwai kolesaga yalide te homu kone palobo te tigidali mu tagalumainu homu ebao. 20 King o, eno koneani, eno dwai sę yali, tama tiyu, te gasa not pedai badu bidibo hani te tudiba togolama, te ena bolo polasa aselama, tama ena genuai bidi, te eno nage dali gesabidi deliba ununainu, te ena nage tiąba asai dao,” te bidi Simeigo te po wali.

21 Tiali goli, Abisai, te Devitgo abe Seruiago ogwago, te tama po wai, “Te Simei isimaina ebo homu te wiegi yai da homu yai. Magi baso meni, agai te Genuai Bidigo nigilali kingba po dwai walio,” wali.

22 Tiali goli, Devitgo te Abisaide, te aga ama Joap dali siba te tama po wai, “Te dage sigo sę menio,” wali. “Dage si te Seruiago ogwa si da, magi baso megi dage sigo enaba boi bidi yabo homu ebawe? Megi eno koneani, ena te tigidali Israelgo king bidibao, tama te tobage sogo, dago te Israel bidi deli me ela mugobeo. Mu menio!” 23 Tama kingo bomai po te Simeiba weyu, aga nogo guni sisu weyu, te tama po wai, “Eno mu po nagebolo obao, augwaligo nage me ela mugobeo,” wali.

24 Tama Mefiboset, te Solgo ogwago ogwa, te wai, aga me aselama, te king dali deliba gesabidi ununani. Te Devitgo te Jerusalem taga soali sogo gagalasa, tama te king ma asobo sogoba usu nagasu, te Mefiboset te aga sągą wę me telasiąbadi, tama aga penane nisi me togosiąma, tama aga ugwa me wę me telayu isiąbadi te Devit Jerusalemba ma asobo sogoba usu nanio. * 2 Sml 9:1-13; 16:1-4 25 Mefibosetgo te Jerusalem taga soyu, tama aselama, te kingba sabolai. Tialima, kingo agaba te tama po hanalu wai, “Mefiboset, magi baso te nage ena dali wi pabewe?” te po wai.

26 Tama Mefibosetgo te tama po wei ponai, “Eno genuai bidi, nago koneani, ena sągą dwai elalubao. Tama te sogo nago te Jerusalem taga pali sogo, te eno augwaliba weyu, te eno donki dodolao po wali, te donkiba ena duagulama, te ena nage dali painogo yai. Tiali goli, ena sę bidigo ena tibo po ola mawai dao. 27 Tama aga nage wali peyu, tama ena nogi te aiyaba elalubo tibo po walio. Tiali goli, genuai bidi, nage te Genuai Bidigo mobo bidi ensel tiwai dao. Tama nago mena wiegi yai sę enaba yabo te wiegi yai da homu eyu da, nago te sę naga tama yao. 28 Nago te eno ayago hani we bidi tigidali eligi da. Tiali goli nago olo tau sabo wiegi yai homu ebo kolesaga enaba eyu, tama nago ena te nago bede sesemane sogo nai tuagasomainu ilali. Tama tibaso, te eno nageba te gasa nai me ma enaba mao olama, me hanalugobeo,” Mefibosetgo te po wali.

29 Tama kingo te po wai, “Te usu da, te po ma wagio. Eno homude te tama tiali, nage me Siba dage sigo te duga wąį Solgo tǫ dobayu, te bugulama, te me badu nago siyu, te me badu agai siyu emainu, te tama homu yalio,” wali.

30 Tiali goli, Mefibosetgo kingba te tama po wai, “Te Sibago tigidali somainu yaibao. Eno tede homu si me ebeo. Eno homugo te nage bugagia bidimaina homu yali, tama te nage ma asali dao.”

31 Tama Barsilai te Gileat bulu bidigo te Rogelim tǫ tagalama, tama te wę Jordanba dulama, te king dali te kingo te wę nogebo sogo bidali. * 2 Sml 17:27-29 32 Barsilaigo kibu be te bidi sese me si me si, te 80 kibu be bidai elaluai, tama aga monu dabe mu yai. Agai te mone doado bage hauwa elaluai, tama agai te king Devit tonalu, tama te Devit dali, aga hani dabe dali, augwali te hanu Mahanaimde bidali sogo nai geseyu bidai dao. 33 Tama kingo agabolo te tama po wai, “Nage ena dali te Jerusalemba aselama, te eno nage tonalueibao,” po wai.

34 Tiali goli, Barsilaigo te tama po wei ponai, “Genuai bidio, te kibu be hauwa isiąbadi, te ena isabo homu ebao. Tama tibaso, ena te nage dali te Jerusalemba painu wabo te usu meni baso, te tagalao. 35 Odao, eno kibu be te bidi sese me si me si, 80 kibu be megi elalubao, tama eno te mena nai me deli te wiegi yai, ma meni, te eno konebeo. Tama eno te nai me wę me tubaso da, eno te naigo pusu te odobowe, ma meni, te eno konebeo. Tama eno olo te wiegi yai meni baso, tama te we bidi dabego balia po wabo dogoni te eno odabo usu meni yaibao. Tama tibaso, magi baso te ena nage dali pelama, te nageba sęgę momainuwe? 36 Tama king, magi baso nago te wiegi yai kolesaga mu enaba yabo homu ebawe? Menio. Eno homugo te wę Jordan nogelama, tama ena nage dali dwasianu pelama gana, tama eno nage tama taga soyu, te ena ma soabo homu ebao. 37 Ae, nago ena te ena buluba ma pomainu elama, tama ena te ena aya de ida si muani pesage te gų pagede nosali pubulumainu yaibao. Tiali goli, eno ogwa, Kimham, te bidibao. Tama aga te nage dali pomainu yaibao. Tama nago aga mena sęgo tau sabo homu eyu da, teda te tama naga tiao,” Barsilaigo te po wali.

38 Tama kingo po wei ponoyu, te tama po wai, “Wiegi yai dao. Kimham te ena dali pomainu yaibao. Tama nago homugo eno mena sę agade emainu homu ebaso da, teda te tama naga eno te sę yaibao. Te nago enaba te mena sę emainu hanalu wali da, teda tagala, te sę eno yaibao,” Devitgo Barsilaibolo te po wali.

39 Tialima, king me aga hani we bidi dabe te wę Jordan nogelama, u badu tugi pali. Tama kingo te Barsilaiba te gesabidi nono nenama, tama Godiba hanalu, te Barsilai wiegi yai ilimainu yali. Tama Barsilai te aga buluba ma geasa palio. 40 Tialima, king te hanu Gilgalba pali, tama Kimham aga dali pai. Tama te Juda ami bidi tigidali dali, te Israel ami bidi hani me badu me, te king dali pela wali.

41 Devit te Gilgalde bidibadi, tama te Israel bidi tigidali asama, tama agaba te tama po wai, “Genuai bidio, magi baso dago ama dede, te Juda dabego, te da Israel dabede te po geme dualama, te augwa digi te nage dali, te nago we wai dabe me, te nago ami bidi dabe daligo te wę Jordan nogemainu, te odasa asaliwe?”

42 Te Juda bidi tigidaligo te po odolama, tama augwa po wei ponoyu, te tama po wai, “King aga te da deli hani elalubaso, tama tiyu, dago te tama kolesaga yali. Tialima, magi baso dagego daba hale sębę ebawe? Kingo te dago nai me abelama, tama agai te nai me deli te dabolo me mabeo,” wali.

43 Tama te Israel bidi dabego po wei ponoyu, te tama po wai, “Te bidi me deli king pedalubaso da, teda aga te dago tǫ pedai tonalubo king bidaibao. Tama te bulu tǫ pedai tomode, te da Israel te nogo si hani elalubao, tama dage Juda bagego hani te deli naga elalubao. Mu tama, Devit te dagego hanidu king bidibao, tama da nogo si hanigo te dage aiyaba elaluali. Tama tiyu, magi baso dagego da begela dolobawe? Dagego bugagia homu kone palao, dago digi te king edaba odasa asabo te homu kolesaga yabo page te dade elalubao,” wali. Tiali goli, te Juda dabego konila po te bomonama mu olama, tama te Israel dabego po aiyaba elaluai dao.